Mga Baroganan sa Pagpangalagad

Pagpangalagad ngadto Niadtong adunay mga Hagit sa Pisikal nga Kahimsog

Pwede kitang mahimo nga mga kamot sa Manluluwas aron sa paghupay ug pagtabang.

Ang sakit, allergy, kakulangan sa panglawas [disability], o edad makaapekto sa abilidad sa usa ka miyembro nga mosimba o moserbisyo. Kon ang tigpangalagad nga mga kaigsoonan sensitibo niini nga mga panginahanglan, adunay daghan nga paagi sa pagtabang sa mga miyembro kinsa adunay pisikal nga mga hagit nga mas makatagamtam sa mga panalangin sa ebanghelyo.

Human ang usa ka batan-on nga inahan nadayagnos nga adunay kanser, mibati siya nga nag-inusara ug napuno sa kahadlok. Apan samtang ang balita sa iyang sakit nahibaloan sa iyang tibuok ward, siya sa wala madugay gilibotan sa gugma ug pag-atiman sa kauban niya nga mga sister. Samtang nagsugod ang iyang lisod nga mga pagtambal, ang mga sister mihatod kaniya ngadto sa iyang mga appointment ug miuban kaniya atol sa dugay nga mga sesyon sa chemotherapy. Nag-ampo sila uban kaniya, midasig kaniya, midala kaniya og pipila ka lamian nga pagkaon nga iyang makaon, ug midala og mga pagkaon ngadto sa iyang pamilya matag semana. Ang uban nga mga sister migahin og panahon gikan sa ilang busy nga mga kinabuhi aron sa paglimpyo sa iyang balay. Usa ka sister nasayod nga dunay piho nga mga pagtambal nga naghimong lisod sa pagkatulog, mao nga nagplano siya og lawom sa gabii nga mga pagbisita aron motan-aw og komedya nga mga salida. Imbis sa pagsulay og katulog apan dili makahimo, ang batan-on nga inahan nakahimo sa pagwagtang sa mga kahadlok sa makadiyot ug mibati sa makaayo nga gahom sa katawa ug panaghigalaay. Pinaagi niini nga mga pagpangalagad, mga panalangin sa pagkapari, ug mga pagpuasa sa ward, gisuportahan siya latas niining hilabihan ka lisod nga panahon, ug namugna ang lig-on nga mga relasyon sa gugma tali sa tanan nga naapil.

Ang pagpangalagad ngadto niadtong adunay mga hagit sa panglawas dili kanunay sayon. Apan makasunod kita sa ehemplo sa Manluluwas sa mahigugmaon nga pagtabang sa atong mga kaigsoonan kon mahitabo ang mga hagit sa panglawas. Pwede kitang mahimo nga Iyang mga kamot aron sa paghupay ug pagtabang niadtong anaa sa atong palibot, lakip niadtong kansang mga hagit dili daling makita sa atong pisikal nga mga mata.

Mga Ideya nga Ikonsiderar

1. Tahora ang ilang pagkapribado. Ang ubang mga tawo maulaw kabahin sa mga problema sa panglawas nga tingali dili ra gayod ninyo ipanumbaling. Pangutana kanunay kon OK ra ba nga ipakigbahin ang ilang sitwasyon sa uban sa dili pa ninyo buhaton.

2. Idasig ang batakan nga medikal nga pag-atiman [standard medical care]. Likayi ang pagrekomendar sa mga produkto o mga serbisyo sa panglawas nga wala pa mapamatud-i o gawas sa batakan nga medikal nga pag-atiman. Pagpaambit og mga ideya ug mga kasinatian kon bation ninyo nga giaghat, apan awhaga ang uban sa pagbuhat og ilang kaugalingon nga pagsiksik ug sa pagpakigtambag sa nabansay nga medikal nga mga propesyonal.

Mga paghulagway sa litrato gikan sa Getty Images

3. Serbisyohi sila ug pag-ampo alang kanila. Kon ang mga tawo mag-atubang og panagsa, mubo ra og tagal nga mga problema sa panglawas o dili matag-an nga mga sitwasyon sama sa pagpanganak o operasyon, ang inyong serbisyo, mga pagkaon, kamabination, ug mga pag-ampo magpakita nga kamo nagpakabana. Sa panahon sa emerhensiya, ang inyong dihadiha nga kaandam sa pagtabang mahimong bililhon kaayo.

4. Tabang sa pagpasarang [empower] kanila. Ilabi na kon ang mga tawo nag-atubang og seryoso o dugay og tagal nga mga problema sa panglawas, nagkinahanglan sila og labaw pa kaysa inyong tabang o serbisyo, bisan pa sa kamahinungdanon kaayo niini. Mahimong magkinahanglan usab sila og tabang sa pagkat-on sa paghimo sa mosunod alang sa ilang kaugalingon:

1. Pag-ila sa ilang mga panginahanglan. Unsay ilang nahibaloan sa pagkakaron mahitungod sa ilang kahimtang? Unsa man ang ilang gibati mahitungod niini? Unsa ang ilang mga kabalaka ug mga panginahanglan sa pagkakaron ug sa umaabot? Paminaw nga adunay kaluoy ug walay paghukom aron sa pagtabang kanila nga matinuorong moatubang sa unsay tinuod.

2. Hinumdomi ang ilang mga kalig-on. Pangutana mahitungod sa ubang matang sa kalisdanan nga ilang nasinati ug unsay ilang nakat-onan gikan niadto nga mga kasinatian. Ipaila ang ilang positibo nga mga kinaiya, mga mithi, ug mga kahanas nga inyong namatikdan. Pangutana kon unsa nga personal nga mga mithi ang labing importante ngadto kanila aron sa pagpuyo niining bag-o nga sitwasyon. Sa unsang paagi kaha sila magpuyo niadto nga mga mithi?

3. Paghimo og plano. Unsa nga mga desisyon ang kinahanglan nga himoon dayon, ug unsa ang dugang nga impormasyon nga ilang gikinahanglan aron sa paghimo niadto nga mga desisyon? Unsa ang dihadiha nga tabang o mga kapanguhaan ang ilang gikinahanglan, ug unsa ang ilang kinahanglanon sa dugay nga panahon? Unsa nga mga kapilian ang ilang nakita? Unsa ang positibo ug negatibo nga mga bahin sa matag usa?

4. Organisaha ang ilang grupo [team]. Kinsa ang makatabang? Ang direkta nga pamilya ang adunay unang responsibilidad sa pagtabang, apan ang kaparyentehan, mga higala, ubang mga miyembro sa ward, mga propesyonal sa panglawas, anaa [available] nga mga serbisyo publiko, ikaw ug ang imong kompanyon, ug ang Espiritu Santo mamahimong apil tanan sa ilang grupo. Kon angay ug uban sa ilang pagtugot, apila ang presidente sa Relief Society ug presidente sa korum sa mga elder sa pagtabang kanila sa pagsusi kon sa unsang paagi kamo, ubang mga miyembro, ug mga kapanguhaan sa Simbahan tinud-anay nga makatabang.

5. Dapita ang Espiritu. Pag-ampo uban ug alang kanila, nga magdapit sa Ginoo sa pagmatuod ug paggiya sa ilang mga desisyon ug pagtabang kanila nga mobati sa Iyang gugma.

Dugang nga mga Kapanguhaan

• Aron makapangita og mga ideya alang sa mga tig-atiman, basaha ang “Pagtambayayong sa Usag Usa nga mga Alantuson,” Liahona, Hunyo 2018, 26–31.

• Sa unsang paagi kamo makatabang niadtong adunay mga allergy sa pagkaon? Basaha ang “Pagdumala sa mga Allergy sa Pagkaon diha sa Simbahan,” Liahona, Hunyo 2020, 22–27.

• Basaha ang mahitungod sa “Pagpangalagad ngadto Niadtong adunay mga Kakulangan,” Liahona, Abril 2021, 30–31.