Ang Kaluwasan sa Gagmay nga mga Bata Nga Namatay: Unsay Atong Nahibaloan ug Wala Mahibaloi
Kini nga mga kamatuoran gikan sa ulahing adlaw nga pagpadayag mao ang pipila sa labing talagsaon nga mga kamatuoran sa ebanghelyo.
Mga litrato gikan sa Getty Images
Usa ka higala nako mipaambit kaniadto og kasinatian niya sa iyang misyon sa Brazil. Siya ug ang iyang kompanyon nakahimamat og usa ka babaye kinsa kusganong mideklarar nga dili siya interesado sa bisan unsa nga relihiyosong mensahe. Usa ka relihiyosong lider misulti kaniya kaniadto nga ang iyang masusong anak nga lalaki kinsa namatay dili na gayod maluwas tungod kay siya wala mabunyagi. Ang paghunahuna niana nakapasubo sa iyang kasingkasing. Gisultihan niya ang mga misyonaryo nga gawas kon sila adunay mas maayo nga mensahe, gusto siya nga walay bisan unsa nga kalabotan sa ilang relihiyon.
Maayo gani, sila adunay mas maayo nga mensahe.
Ang doktrina sa Ang Simbahan ni Jesukristo sa mga Santos sa Ulahing mga Adlaw bahin sa kaluwasan sa gagmay nga mga bata mahimong masumada sa usa ka bersikulo sa kasulatan: “Tanan nga mga bata kinsa namatay sa wala pa sila moabut sa panuigon sa pagkamay-tulubagon maluwas diha sa celestial nga gingharian sa langit” (Doktrina ug mga Pakigsaad 137:10).
Bisan tuod og klaro kini nga doktrina, daghang tawo gihapon ang adunay mga pangutana o sayop nga pagsabot niini nga hilisgotan. Atong hatagan og katin-awan ang pipila sa labing komon nga mga pangutana.
Sa Unsang Paagi ang Gagmay nga mga Bata Maluwas?
Daghang mga tawo ang naghunahuna nga ang gagmay nga mga bata maluwas tungod lamang kay sila walay sala. Bisan og ang gagmay nga mga bata inosente gayod, ang Basahon ni Mormon yano nga nagtudlo nga kon wala ang Pag-ula ni Jesukristo, bisan “ang gagmay nga mga bata … dili maluwas,” tungod kay “diha ni Adan, o pinaagi sa kinaiyahan, sila mapukan” (Mosiah 3:16).
Bisan og inosente sila sa bisan unsa nga sala, ang gagmay nga mga bata ubos gihapon sa pisikal ug espirituwal nga kamatayon nga miresulta sa Pagkapukan. Isip resulta, kon wala ang Pagkabanhaw ug Pag-ula ni Jesukristo, sila mapukan hangtod sa kahangtoran, sama kanatong tanan (tan-awa sa 2 Nephi 9:6–10).
Maayo gani, ang Basahon ni Mormon nagklaro nga “ang dugo ni Kristo giula alang sa” gagmay nga mga bata (Mosiah 3:16), ug “ang tunglo ni Adan gikuha gikan kanila” (Moroni 8:8). Tungod sa Pag-ula sa Manluluwas, ang gagmayng mga bata luwas gikan sa mga epekto sa Pagkapukan ni Adan ug Eva, “kay sila walay sala” (Moises 6:54).
Sa Unsa nga Pangidaron ang mga Bata Maluwas?
Ang Doktrina ug mga Pakigsaad 137:10 nagtudlo nga “ang tanan nga mga bata … maluwas diha sa celestial nga gingharian sa langit.” Ang bugtong kondisyon mao nga sila “namatay sa wala pa sila moabut sa panuigon sa pagkamay-tulubagon.” Si Elder Bruce R. McConkie (1915–85) sa Korum sa Napulog Duha ka mga Apostoles mipasabot: “Ang pagkamay-tulubagon dili mahitabo og kalit diha sa usa ka bata sa bisan unsang gutlo sa iyang kinabuhi. Ang mga bata mahimong may tulubagon sa hinay-hinay, sulod sa daghang mga katuigan. Ang pagkahimong may tulubagon usa ka proseso. … Hinoon, adunay panahon nga moabot, nga ang pagkamay-tulubagon tinuod ug mahitabo gayod ug ang sala ipaangkon sa mga kinabuhi niadtong kinsa nagtubo sa normal nga paagi. Kini mao ang otso anyos nga panuigon, ang edad sa pagbunyag.”1
Sa laing pagkasulti, ang pagkamay-tulubagon padayon nga naglambo sa mga bata samtang sila nagtubo, apan sa otso anyos sila may igo nga tulubagon nga mabunyagan ug busa may igo nga tulubagon sa ilang kaugalingon nga mga sala.
Apan, sama sa nahibaloan sa bisan kinsa nga ginikanan, wala kini magpasabot nga ang mga bata dili makahimo sa pagbuhat og butang nga ilang nahibaloan nga sayop. Unsay buot ipasabot niini mao ang dili pa sila igo nga responsable alang niining sayop nga mga pagpili.
Ang mga bata tingali adunay tukma nga matawag nga “lugway [grace period],” diin dili sila responsable alang sa ilang sayop nga mga binuhatan samtang nagkat-on ug naglambo sila ngadto sa pagkamay-tulubagon. Kon sila mamatay diha niana nga panahon, nan sila maluwas pinaagi sa grasya ni Kristo nga walay bunyag o bisan unsa nga paningkamot sa ilang bahin (tan-awa sa Moroni 8).
Unsa man Sama ang Gagmay nga mga Bata Dihang Mabanhaw na Sila?
Si Presidente Joseph F. Smith (1838–1918) nawad-an og daghan nga mga anak tungod sa sayo nga pagkamatay. Nahupay siya sa doktrina nga ang gagmay nga mga bata mabanhaw isip gagmay nga mga bata ug ipadako ngadto sa kahingkod pinaagi sa ilang matarong nga mga ginikanan human sa Pagkabanhaw. Si Presidente Smith mipaambit kaniadto sa mosunod: “Si Joseph Smith nagtudlo sa doktrina nga ang masuso nga bata nga namatay na mobangon sa pagkabanhaw isip usa ka bata; ug, nagtudlo ngadto sa inahan sa wala nay kinabuhi nga bata, siya miingon ngadto kaniya: ‘Makabaton ka sa hingpit nga kalipay, sa kahimuot, ug katagbawan sa pag-amuma niini nga bata, human sa pagkabanhaw niini, hangtud nga makab-ot niini ang sukod sa gidak-on sa espiritu niini.’ Adunay pag-uli, adunay pagtubo, adunay kalamboan, human sa pagkabanhaw gikan sa kamatayon. Gimahal nako kini nga kamatuoran. Nagdala kini og dakong kalipay, sa hingpit nga kalipay ug pasalamat sa akong kalag. Salamat sa Ginoo nga iyang gipadayag kini nga mga baruganan ngari kanato.”2
Dili lang makab-ot sa gagmay nga mga bata ang hingpit nga pagkahingkod; makab-ot usab nila ang hingpit nga kahimayaan. Si Abinadi mitudlo nga “ang gagmay nga mga bata usab makabaton og kinabuhi nga dayon” (Mosiah 15:25). Ang Propeta Joseph Smith mitudlo nga “maangkon ninyo ang inyong mga anak; kay makabaton sila og kinabuhing dayon, tungod kay nabayaran na ang ilang utang.”3
Aron maangkon ang labing taas nga ang-ang sa celestial nga gingharian, kadtong kinsa may tulubagon kinahanglang mosulod sa bag-o ug walay kataposan nga pakigsaad sa kaminyoon (tan-awa sa Doktrina ug mga Pakigsaad 131:1–3). Ang gagmay nga mga bata kinsa namatay magkanaa niini nga oportunidad sa umaabot. Si Presidente Joseph Fielding Smith (1876–1972) mipasabot: “Ang Ginoo mohatag ngadto niini nga mga bata sa katungod sa tanang panalangin sa pagsilyo nga may kalabotan sa kahimayaan. … Kon sila motubo, human sa pagkabanhaw, ngadto sa hingpit nga pagkahingkod sa espiritu, sila adunay katungod sa tanan nga mga panalangin nga ila untang maangkon kon sila duna pay kahigayonan sa pagpabilin dinhi ug modawat niini.”4
Nganong Mamatay ang Gagmay nga mga Bata?
Kini nga pangutana lisod tubagon, ilabi na alang niadtong kinsa namatyan og anak. Tingali ang labing maayong paagi sa pagsugod sa pagtubag niini nga pangutana mao ang paggamit sa mga pulong ni Nephi, kinsa mipamatuod, “Ako nasayud nga [ang Dios] nahigugma sa iyang mga anak; bisan pa niana, ako wala masayud sa kahulugan sa tanan nga mga butang” (1 Nephi 11:17).
Wala kita masayod sa tanan nga mga rason alang sa matag trahedya nga mahitabo dinhi sa mortalidad, apan makasiguro kita nga ang Dios nahigugma kanato. Bisan kinahanglan nga dili nato hunahunaon nga ang mga trahedya mao ang kabubut-on sa Dios, ang Iyang plano naghatag og paagi sa pagbuntog sa tanan nga mga trahedya.5 “Sa langit way kasakit di masulbad.”6
Ang Propeta Joseph Smith ug ang iyang asawa, si Emma, adunay rason nga mangutana kon nganong mamatay ang gagmay nga mga bata—namatay ang unom sa ilang mga anak. Ang Propeta miingon: “Ako namalandong niana nga hilisgutan, ug nangutana sa pangutana, ngano nga ang mga masuso, inosente nga mga bata, gipanguha gikan kanato, ilabi na gayud kadtong maingon og pinakamaalamon ug makapadani. Ang pinakalig-on nga mga katarungan nga nagpakita mismo sa akong hunahuna mao kini: Kini nga kalibutan maoy usa ka hilabihan ka dautan nga kalibutan. … Daghan ang gikuha sa Ginoo, bisan pa gani sa pagkamasuso, aron sila makaikyas sa pagkamasinahon sa tawo, ug sa mga kagul-anan ug mga kadautan niining kalibutan karon; hilabihan ra kaayo sila ka putli, hilabihan ka matahum, aron mopuyo sa yuta; busa, kon hunahunaon sa husto, imbis nga magbangutan aduna kita’y katarungan sa pagmaya kay gilikay sila gikan sa dautan, ug ato ra sila nga maangkon pag-usab.”7
Lain nga sulugoon sa Ginoo, si Elder McConkie, nakasinati sa kamatayon sa usa ka apo nga babaye nga masuso. Sa iyang haya miingon siya, “Adunay piho nga mga espiritu kinsa moanhi niini nga kinabuhi aron modawat og mga lawas lamang; alang sa mga rason nga wala kita mahibalo, apan nahibaloan sa walay kinutoban nga kaalam sa Amahan sa Kahangtoran, wala sila nagkinahanglan sa pagsulay, temporaryo nga mga kasinatian sa mortalidad.”8
Walay Panalangin nga Mapugngan
Forever and Ever [Hangtod sa Kahangtoran], ni Greg K. Olsen
Bisan og walay bisan unsa niini nga kinabuhi ang makawagtang sa mga pagbati sa pagkawala nga masinati sa usa ka pamilya sa kamatayon sa usa ka bata, mahimo kitang makakaplag og kahupayan diha sa doktrina nga mahimaya ang gagmay nga mga bata kinsa namatay. Nasayod kita niini tungod kay kini gipadayag sa atong mahigugmaong Amahan sa Langit ug gitudlo sa Iyang mga propeta ug apostoles sa modernong panahon.
Kini nga mga kamatuoran gikan sa ulahing adlaw nga pagpadayag mao ang pipila sa labing talagsaon ug labing makapahupay nga mga kamatuoran sa ebanghelyo.