Para sa mga Magulang

Ang Plano ng Kaligtasan at Pagtitiwala sa Panginoon

Minamahal naming mga Magulang,

Magagamit ninyo ang mga sumusunod na artikulo at mga larawan nito para masimulan ang talakayan sa inyong pamilya at matulungan silang maunawaan ang mahahalagang paksa tulad ng plano ng kaligtasan, kasaysayan ng Simbahan, at pagtitiwala sa Panginoon.

Mga Talakayan tungkol sa Ebanghelyo

Plano ng Kaligtasan

Gamitin ang “Mga Pangunahing Alituntunin ng Ebanghelyo” sa pahina 6 upang ituro sa inyong mga anak ang tungkol sa plano ng kaligtasan. Talakayin kung paanong ang kaalaman tungkol sa plano ng kaligtasan ay nagpapala sa inyo at sa inyong pamilya. Isiping ipadrowing sa inyong mga anak ang mga larawan ng plano ng kaligtasan at sabihing ipaliwanag ng bawat isa sa kanila ang bawat isa sa mga bahagi nito.

Mga Pagpapala sa Pag-aaral ng Kasaysayan ng Simbahan

Kapag binasa ninyo ang artikulo sa pahina 30, talakayin sa inyong mga anak kung paano rin sila magkakaroon ng mas malakas na patotoo sa pamamagitan ng pag-aaral pa ng tungkol sa kasaysayan ng Simbahan. Anong mga kuwento o karanasan mula sa kasaysayan ng Simbahan ang maibabahagi ninyo sa inyong pamilya para matulungan silang harapin ang kanilang mga pagsubok nang may pananampalataya?

Magtiwala sa Panginoon

Basahin ang karanasan ni Brother Milton Camargo sa pahina 39. Habang tinatalakay ninyo ito sa inyong mga anak, itanong: Paano ipinakita ng missionary na nagtitiwala siya sa Diyos? Paano ninyo ipinapakita na nagtitiwala kayo sa Panginoon? Ano ang ilang paraan na napagpala kayo nang magtiwala kayo sa Diyos?

Paglutas sa Pang-aabuso

Gamitin ang mga ideya sa artikulo sa pahina 20 para malaman kung paano mahihiwatigan ang pang-aabuso, maiwasan ito, at maturuan ang mga bata kung paano protektahan ang kanilang sarili.

Masayang Pag-aaral ng Pamilya

Akin Kayong Aakayin

Doktrina at mga Tipan 78:17–18

Aakayin tayo ng Panginoon kapag nakikinig tayo sa Kanya sa pamamagitan ng Kanyang mga propeta. Ngunit ang mga mensahe ng mundo ay magkakasalungat at nakakalito. Maglaro kasama ang buong pamilya ng larong “Gawin Mo ang Ginagawa Ko at Hindi ang Sinasabi Ko,” gaya ng nakasaad sa ibaba.

1. Pumili ng isang tao para maging tagapagturo.

2. Ang tagapagturo ang magsasabi ng isang aksyon habang iba ang ginagawa niyang aksyon. Halimbawa, sasabihin ng tagapagturo, “Pumalakpak,” pero ang gagawin niya ay hahawakan ang kanyang braso.

3. Gagawin ng mga kapamilya ang ginagawa ng tagapagturo, hindi ang sinasabi nito.

4. Ulitin ang laro, magsalitan sa pagiging tagapagturo.

Talakayan: Nahirapan ba kayong sundin ang tagapagturo? Kung minsan ang mga sinasabi ng mundo ay nakakalito, ngunit ang mga kautusan ng Panginoon ay malinaw. Ano ang maaari nating gawin para makinig sa Panginoon habang inaakay Niya tayo?

Isinumite ni Lisa Thomas

Ngayong Buwan sa Magasing Para sa Lakas ng mga Kabataan

Karapat-dapat Ba Ako?

Gamitin ang kuwento ng dalagitang ito para turuan ang inyong mga tinedyer tungkol sa katapangan, kabanalan, at kapangyarihan ng Pagbabayad-sala ni Jesucristo sa sitwasyon ng pang-aabuso.

Bakit Dapat Kang Magalak

Kapag mahirap ang panahon, binibigyan tayo ni Jesucristo ng mga dahilan para magalak. Ituro sa inyong pamilya kung paano sinusuportahan ni Jesucristo ang mga naniniwala sa Kanya.

Mga Tanong at mga Sagot

Nahihirapan ba ang inyong anak na tinedyer na pahalagahan ang kanyang sarili? Basahin ang mga makatutulong na mungkahi mula sa mga kabataan sa iba’t ibang panig ng mundo tungkol sa kung paano nila inaalala ang kanilang kahalagahan.

Ngayong Buwan sa Magasing Kaibigan

Tulong sa Pumarito Ka, Sumunod Ka sa Akin

Hayaang mamuno ang inyong anak sa home evening o sa pag-aaral ng mga banal na kasulatan gamit ang isang aktibidad mula sa “Masayang Oras para sa Pag-aaral ng mga Banal na Kasulatan.” Makakakita rin kayo ng mga lingguhang ideya para sa pagtuturo ng mas maliliit na anak sa “Masayang Oras sa Pag-aaral ng mga Banal na Kasulatan para sa Maliliit na Bata.”

Mga Pioneer sa Bawat Lupain

Basahin ang tungkol sa isang batang lalaki sa Tonga na nag-iisang miyembro ng Simbahan sa kanyang paaralan. Siya ay lumaki at naging temple president ng Nuku’alofa Tonga Temple.

Alamin ang tungkol sa Plano ng Diyos

Basahin ang kuwento sa banal na kasulatan sa buwang ito tungkol sa pangitain ni Joseph Smith sa Doktrina at mga Tipan 76. Maaari din kayong maglaro ng board game na plano ng kaligtasan kasama ang buong pamilya.

Mga Resource tungkol sa Pang-aabuso

Gamitin ang kuwentong “Paper Doll Cover-Up” para kausapin ang inyong mga anak tungkol sa pagkakaiba ng mga sekreto at mga sorpresa. Kabilang dito ang isang pahina tungkol sa pag-iwas at paggaling mula sa pang-aabuso.