« មានពេលវេលាសម្រាប់ព្រះអម្ចាស់ » ដើម្បីកម្លាំងនៃយុវជន ខែ វិច្ឆិកា ឆ្នាំ ២០២២ ។
សម័យប្រជុំរសៀលថ្ងៃអាទិត្យ
មានពេលវេលាសម្រាប់ព្រះអម្ចាស់
ការដកស្រង់
ឥទ្ធិពល និងសម្ពាធពីខាងពិភពលោកនេះមានភាពទាក់ទាញ និងមានចំនួនយ៉ាងច្រើន ។ ប៉ុន្តែឥទ្ធិពលជាច្រើននោះ គឺជាទម្រង់បោកបញ្ឆោត ប្រលោមចិត្ត និងអាចនាំយើងឲ្យដើរខុសផ្លូវនៃសេចក្តីសញ្ញា ។ ដើម្បីជៀសវាងពីការខូចចិត្តដែលនឹងកើតឡើងយ៉ាងពិតប្រាកដនេះ ខ្ញុំសូមអង្វរបងប្អូននៅថ្ងៃនេះ ឲ្យប្រឆាំងនឹងការល្បួងខាងពិភពលោកនេះ តាមរយៈការមានពេលវេលាសម្រាប់ព្រះអម្ចាស់នៅក្នុងជីវិតរបស់បងប្អូន—ជារៀងរាល់ថ្ងៃ ។
ប្រសិនបើព័ត៌មានភាគច្រើនដែលបងប្អូនបានទទួលនោះចេញមកពីប្រព័ន្ធផ្សព្វផ្សាយសង្គម ឬប្រព័ន្ធផ្សព្វផ្សាយផ្សេងទៀត នោះសមត្ថភាពរបស់បងប្អូនដើម្បីស្តាប់ឮការខ្សឹបប្រាប់មកពីព្រះវិញ្ញាណនឹងចុះអន់ខ្សោយ ។ ប្រសិនបើបងប្អូនមិនបានខិតខំស្វែងរកព្រះអម្ចាស់តាមរយៈការអធិស្ឋាន និងការសិក្សាដំណឹងល្អប្រចាំថ្ងៃទេ នោះបងប្អូនកំពុងបណ្តោយខ្លួនឲ្យធ្លាក់ទៅក្នុងទស្សនវិជ្ជាដែលហាក់ដូចជាគួរឲ្យចាប់អារម្មណ៍ ប៉ុន្តែមិនពិតហើយ ។ សូម្បីតែពួកបរិសុទ្ធដែលស្មោះត្រង់ក៏ដោយ ក៏អាចត្រូវធ្លាក់ចេញពីផ្លវដោយសារការល្បួងដ៏មិនចេះចប់របស់ពិភពលោកនេះដែរ ។
បងប្អូនប្រុសស្រីរបស់ខ្ញុំ ខ្ញុំសូមអង្វរបងប្អូន សូមឲ្យមានពេលវេលាសម្រាប់ព្រះអម្ចាស់ ! សូមធ្វើឲ្យគ្រឹះខាងវិញ្ញាណផ្ទាល់ខ្លួនរបស់បងប្អូនរឹងមាំ ហើយអាចទប់ទល់នឹងការសាកល្បង តាមរយៈការធ្វើនូវរឿងទាំងឡាយដែលអនុញ្ញាតឲ្យព្រះវិញ្ញាណបរិសុទ្ធគង់នៅជាមួយបងប្អូន ជានិច្ច ។ …
គ្មានអ្វីដែលយាងអញ្ជើញព្រះវិញ្ញាណ ខ្លាំងជាងពេលដែលបងប្អូនកែតម្រូវការផ្តោតអារម្មណ៍របស់បងប្អូនទៅលើព្រះយេស៊ូវគ្រីស្ទឡើយ ។ សូមនិយាយអំពីព្រះគ្រីស្ទ អររីករាយក្នុងព្រះគ្រីស្ទ ទទួលទានព្រះបន្ទូលរបស់ព្រះគ្រីស្ទ និងឈានទៅមុខដោយខ្ជាប់ខ្ជួននៅក្នុងព្រះគ្រីស្ទ ។ សូមធ្វើឲ្យថ្ងៃឈប់សម្រាករបស់បងប្អូនមានក្ដីសោមនស្ស កាលដែលបងប្អូនថ្វាយបង្គំទ្រង់ ទទួលទានសាក្រាម៉ង់ និងរក្សាថ្ងៃរបស់ទ្រង់ឲ្យបរិសុទ្ធ ។
ដូចដែលខ្ញុំបានបញ្ជាក់នៅព្រឹកនេះ សូមមានពេលវេលាសម្រាប់ព្រះអម្ចាស់នៅក្នុងដំណាក់ដ៏បរិសុទ្ធរបស់ទ្រង់ ។ …
… ទ្រង់នឹងដឹកនាំ ហើយណែនាំ បងប្អូន នៅក្នុងជីវិតបងប្អូនផ្ទាល់ បើបងប្អូន មានពេលវេលាសម្រាប់ទ្រង់ នៅក្នុងជីវិតរបស់បងប្អូន—ជារៀងរាល់ថ្ងៃនោះ ។