« ភាពស័ក្ដិសមមិនមែនជាភាពល្អឥតខ្ចោះ » ដើម្បីកម្លាំងនៃយុវជន ខែ វិច្ឆិកា ឆ្នាំ ២០២២ ។
សម័យប្រជុំពេលរសៀលថ្ងៃសៅរ៍
ភាពស័ក្ដិសមមិនមែនជាភាពល្អឥតខ្ចោះ
ការដកស្រង់
មនុស្សមួយចំនួនទទួលយកសារលិខិតដោយយល់ខុសថា ការប្រែចិត្ត និងការផ្លាស់ប្ដូរគឺមិនចាំបាច់នោះទេ ។ សារលិខិតរបស់ព្រះគឺថា ការប្រែចិត្ត និងការផ្លាស់ប្ដូរគឺសំខាន់ណាស់ ។ …
មនុស្សមួយចំនួនទទួលយកសារលិខិតដោយយល់ខុសថា ការប្រែចិត្តគឺជារឿងដែលត្រូវធ្វើតែម្ដងប៉ុណ្ណោះ ។ សារលិខិតរបស់ព្រះ គឺដូចដែលប្រធាន រ័សុល អិម ណិលសុន បានបង្រៀនថា « ការប្រែចិត្ត … គឺជាដំណើរការមួយ » ។ …
មនុស្សមួយចំនួនទទួលយកសារលិខិតដោយយល់ខុសថា ដោយសារពួកគេមិនអាចបោះបង់ចោលទម្លាប់អាក្រក់ទាំងស្រុងបាន នោះពួកគេមិនស័ក្ដិសមដើម្បីចូលរួមយ៉ាងពេញលេញក្នុងដំណឹងល្អឡើយ ។ សារលិខិតរបស់ព្រះគឺថា ភាពស័ក្ដិសមមិនមែនជាភាពល្អឥតខ្ចោះនោះទេ ។ ភាពស័ក្ដិសមគឺជាការប្រព្រឹត្តដោយស្មោះត្រង់ និងព្យាយាម ។ យើងត្រូវតែស្មោះត្រង់ជាមួយព្រះ ថ្នាក់ដឹកនាំបព្វជិតភាព និងមនុស្សទាំងឡាយដែលស្រឡាញ់យើង ហើយយើងត្រូវខិតខំកាន់តាមព្រះបញ្ញត្តិទាំងឡាយរបស់ព្រះ ហើយកុំចុះចាញ់ដោយសារយើងគ្រាន់តែភ្លាត់ភ្លាំងនោះឡើយ ។ …
មនុស្សមួយចំនួនទទួលយកសារលិខិតដោយយល់ខុសថា ព្រះកំពុងរង់ចាំដើម្បីជួយយើង បន្ទាប់ពី យើងប្រែចិត្តសិន ។ សារលិខិតរបស់ព្រះគឺថា ទ្រង់នឹងជួយយើង នៅពេល យើងប្រែចិត្ត ។ …
… ព្រះគុណទ្រង់គឺមិនមែនគ្រាន់តែជារង្វាន់សម្រាប់តែភាពស័ក្ដិសមនោះទេ ។ វាគឺជា « ជំនួយដ៏ទេវភាព » ដែលទ្រង់ប្រទានឲ្យ ដែលជួយយើងឲ្យមានភាពស័ក្ដិសមបាន ។ វាមិនគ្រាន់តែជារង្វាន់មួយសម្រាប់មនុស្សសុចរិតប៉ុណ្ណោះទេ ។ វាគឺជា « អំណោយទានពិសិដ្ឋនៃកម្លាំង » ដែលទ្រង់ប្រទានឲ្យ ដែលជួយយើងឲ្យក្លាយជាមនុស្សសុចរិតបាន ។ យើងមិនគ្រាន់តែកំពុងដើរ ឆ្ពោះទៅរក ព្រះ និងព្រះគ្រីស្ទប៉ុណ្ណោះទេ ។ ពួកយើងកំពុងដើរ ជាមួយ ទ្រង់ទាំងទ្វេ ។ …
… នៅពេលបងប្អូនមានអារម្មណ៍ថា បានធ្លាក់ជាច្រើនដងពេកក្នុងការព្យាយាម សូមចងចាំពីដង្វាយធួនរបស់ព្រះគ្រីស្ទ និងព្រះគុណដែលអាចធ្វើបានគឺមានពិតប្រាកដមែន ។ « ដៃនៃសេចក្ដីមេត្តាករុណា [ របស់ទ្រង់ ] សន្ធឹងទៅរកអ្នក » [ នីហ្វៃទី៣ ៩:១៤ ] ។ សូមបងប្អូនទទួលបាននូវក្តីស្រឡាញ់—នៅថ្ងៃនេះ ក្នុងអំឡុង ២០ ឆ្នាំទៀត និងជារៀងរហូតតទៅ ។