« ដោយព្រះចេស្ដានៃព្រះដោយសិរីល្អដ៏អស្ចារ្យ » ដើម្បីកម្លាំងនៃយុវជន ខែ វិច្ឆិកា ឆ្នាំ ២០២២ ។
សម័យប្រជុំរសៀលថ្ងៃសៅរ៍
ដោយព្រះចេស្ដានៃព្រះដោយសិរីល្អដ៏អស្ចារ្យ ( នីហ្វៃទី១ ១៤:១៤ )
ការដកស្រង់
ពេលបានចុះសេចក្ដីសញ្ញាតាមរយៈពិធីបរិសុទ្ធទាំងឡាយនៃបព្វជិតភាពដែលមានសិទ្ធិអំណាច នោះវាអាចចងភ្ជាប់យើងទៅនឹងព្រះអម្ចាស់ព្រះយេស៊ូវគ្រីស្ទបាន ហើយវាជាចំណុចស្នូលដ៏សំខាន់នៃកិច្ចការនៃសេចក្តីសង្រ្គោះ និងភាពតម្កើងឡើងនៅទាំងសងខាងវាំងនន ។
កិច្ចការផ្សព្វផ្សាយសាសនា ព្រមទាំងកិច្ចការពង្សប្រវត្តិ និងព្រះវិហារបរិសុទ្ធគឺជាផ្នែកដែលបំពេញឲ្យគ្នា និងទាក់ទងគ្នាទៅវិញទៅមកនៃកិច្ចការដ៏អស្ចារ្យមួយ ដែលផ្ដោតលើសេចក្ដីសញ្ញា និងពិធីបរិសុទ្ធដ៏ពិសិដ្ឋ ដែលធ្វើឲ្យយើងអាចទទួលបានអំណាចនៃភាពជាព្រះនៅក្នុងជីវិតរបស់យើង ហើយនៅទីបំផុត អាចត្រឡប់ទៅកាន់វត្តមានរបស់ព្រះវរបិតាសួគ៌វិញបាន ។ …
យើងទទួលយកនឹមរបស់ព្រះអង្គសង្គ្រោះដាក់មកលើខ្លួនយើង នៅពេលយើងរៀន ទទួលដោយភាពស័ក្ដិសម និងគោរពតាមសេចក្ដីសញ្ញា និងពិធីបរិសុទ្ធទាំងឡាយ ។ យើងត្រូវបានចងភ្ជាប់ទៅនឹង ហើយជាមួយនឹងព្រះអង្គសង្គ្រោះដោយសុវត្ថិភាព នៅពេលយើងចងចាំ ហើយរស់នៅដោយស្មោះត្រង់ស្របតាមកាតព្វកិច្ចនានា ដែលយើងបានទទួលឲ្យអស់ពីសមត្ថភាពរបស់យើង ។ ហើយចំណងជាមួយនឹងទ្រង់នោះ គឺជាប្រភពនៃកម្លាំងខាងវិញ្ញាណនៅក្នុងគ្រប់រដូវកាលនៃជីវិតរបស់យើង ។ …
ការសន្យា និងពរជ័យនៃសេចក្ដីសញ្ញាអាចកើតឡើងបានតែតាមរយៈព្រះអង្គសង្គ្រោះរបស់យើង គឺព្រះយេស៊ូវគ្រីស្ទប៉ុណ្ណោះ ។ ទ្រង់អញ្ជើញយើងឲ្យមើលទៅឯទ្រង់ មករកទ្រង់ រៀនអំពីទ្រង់ និងចងភ្ជាប់ខ្លួនយើងទៅនឹងទ្រង់ តាមរយៈសេចក្ដីសញ្ញា និងពិធីបរិសុទ្ធនៃដំណឹងល្អដែលបានស្ដារឡើងវិញរបស់ទ្រង់ ។ ខ្ញុំសូមថ្លែងទីបន្ទាល់ និងសន្យាថា ការគោរពតាមសេចក្ដីសញ្ញានឹងប្រដាប់យើងដោយសេចក្ដីសុចរិត និងដោយព្រះចេស្ដានៃព្រះដោយសិរីល្អដ៏អស្ចារ្យដល់ពួកយើង ។ ហើយខ្ញុំធ្វើជាសាក្សីថា ព្រះអម្ចាស់ព្រះយេស៊ូវគ្រីស្ទគឺជាព្រះអង្គសង្រ្គោះរបស់យើង ។