Faatuatuaina Au Peresitene o Korama a Toeaina ma le Aualofa

Saunia e Elder Kazuhiko Yamashita

Peresitene, Au Peresitene o le Eria a le Pasefika

E oo lava i le taimi lenei o le pepesi o le Koviti-19, o loo faaauau pea le tuputupu a’e o Le Ekalesia a Iesu Keriso o le Au Paia o Aso e Gata Ai. Ona o le alofa o le Atua mo i tatou, o loo Ia taialaina ai i tatou e ala mai i lo tatou Perofeta soifua, o Peresitene Russell M. Nelson.

O aoaoga faavae ma mataupu faavae o le talalelei e le suia ae ua ou vaai i le tele o isi suiga e mafai ona aumaia ia i tatou faamanuiaga e tele i le Ekalesia ma le aiga. O se tasi o suiga sili ona lata mai e faapea o ‘au peresitene o korama a toeaina ma le Aualofa e tatau ona galulue atili i le galuega o le faaolataga.

I se faasilasilaga i taitai o siteki ma uarota i le aso 6 Oketopa 2018, sa faamatuu atu ai i ‘au peresitene o korama a Toeaina ma Aualofa ia tiutetauave o le galuega faafaifeautalai a tagata o le Ekalesia, ma le galuega faalemalumalu ma le talafaasolopito o aiga i totonu o le uarota. O nei ‘au peresitene e tatau foi ona latou vaai ma faamaopoopo taumafaiga faaleauaunaga, ma ia tausia i latou o loo manaomia le fesoasoani.¹

O se suiga matagofie! Ua matuai ou faafetai mo lenei suiga.

O le a ea le uiga o lenei suiga matagofie? Ia te a’u, o lona uiga o au peresitene o korama a Toeaina ma le Aualofa e mafai ona fesoasoani e faamāmā atili le avega a epikopo e ala i le faaalualuina i luma o le galuega faafaifeautalai, ma galuega faalemalumalu ma talafaasolopito o aiga, ma mataupu faaleuelefea.

A o vaaia pea e le epikopo fesoasoaniga tautupe ma le faaaogaina o taulaga anapogi i le uarota, e tatau ona galulue au peresitene o korama a Toeaina ma le Aualofa faatasi ma aiga e a’oa’o atu mataupu faavae o le ola tutoatasi, ma fefautuaa’i ma tagata matutua e faatatau i mataupu tau i galuega, paketiina o tupe, po o luitau i sootaga faaleaiga.

E tatau i epikopo ona ua’i atu i le faamalolosiina o le autalavou—o ta’ita’i faia’e o le tupulaga sosoo mai—ina ia tumau i le ala o feagaiga.

E manaomia e tagata uma o le Ekalesia ona malamalama i lenei suiga maoa’e. Ae o le a se mea e mafai ona faia e i tatou o tagata o le Ekalesia?

Galulue ma au peresitene o korama a Toeaina ma le Aualofa.

Ia tatou mulimulitai i mataupu faavae maoa’e o le Alofa, Faasoa atu ma Valaaulia e valaaulia ai isi e o mai ia Keriso. Ia tatou galulue ma faifeautalai. Ia tatou umia pepa faataga aogā o le malumalu, ma saili igoa o o tatou tuaa ma ave i latou i le malumalu. Ia tatou fesili atu i o tatou faufautua mo le malumalu ma talafaasolopito o aiga mo se fesoasoani.

Ia faatuatuaina au peresitene o korama a Toeaina ma Aualofa.

A tatou feagai ma luitau tau i galuega, tupe, sootaga i aiga, ma mataupu i fanau ma faaipoipoga, e tatau ona tatou o atu i au peresitene o korama a Toeaina ma Aualofa ma fesili i ai mo la latou fesoasoani. E mafai ona latou aumaia ia i tatou musumusuga, taiala ma fautuaga a o latou saili musumusuga mai tusitusiga paia, le Tusitaulima a le Ekalesia ma ala atu i a latou tatalo faifaipea i aso uma.

Na fautua mai Tuafafine Jean B. Bingham, Peresitene Aoao o le Aualofa, “Nai lo le amata mai i le epikopo, e manaomia ona aoao e le au paia e amata mai i le au peresitene o le Aualofa ma le korama a Toeaina.”²

Faia auaunaga ma le filiga.

E tusa ai ma le Tusitaulima a le Ekalesia, o le uiga o le auaunaga o le auauna atu i isi e pei ona faia e le Faaola (tagai i le Mataio 20:26–28). Sa Ia alofa, a’oa’o atu, tatalo mo, faamafanafanaina, ma faamanuiaina i latou o e na siomia o Ia (tagai i le Galuega 10:38). I le avea ai ma soo o Iesu Keriso, tatou te saili ia auauna atu i fanau a le Atua.

E finagalo le Alii ia maua e tagata uma o Lana Ekalesia ia ituaiga o tausiga. Mo lenei mafuaaga, ua tofiaina ai latou e umia le perisitua e avea ma uso o auaunaga i aiga uma o tagata o le Ekalesia. O tuafafine o auaunaga ua totofi atu i tuafafine matutua uma taitoatasi. O nei tofitofiga e fesoasoani ia faamautinoa ai o loo manatuaina ma tausia tagata o le Ekalesia (tagai i le Moronae 6:4).

O le auaunaga o se auala taua tatou te tausia ai le poloaiga ia alofa i le Atua ma alofa i ou tuaoi (tagai i le Mataio 22:36–40). O se auala sili ona taua foi e fesoasoani e ausia ai le galuega o le faaolataga ma le faaeaga.

E fesoasoani au peresitene o korama a Toeaina ma le Aualofa i uso ma tuafafine o auaunaga e a’oa’o le auala e auauna atu ai i isi. Latou te tuuina atu foi musumusuga, taiala, ma le lagolago. E mafai ona latou faia lea i taimi o faatalatalanoaga o auaunaga³, i sauniga o le Aso Sa, ma i talanoaga patino.⁴

Uso e ma tuafafine, ia tatou faia auaunaga ma le filiga, e pei lava ona sa faia e le Faaola.

Faatuatuaina uso ma tuafafine o auaunaga.

Na fautua mai Elder Paul B. Pieper, Fitugafulu Pulega Aoao: “E manaomia ona tatou faatuatuaina o tatou uso ma tuafafine o auaunaga ua valaauina ma tofia e le Atua e fesoasoani ia i tatou. E tatau ona tatou talitonu o le laina muamua lena a le Alii e aapa mai ia i tatou. E manaomia ona tatou faaaogaina i latou.

“E mafai uma ona faalauteleina i latou i ala tutusa e pei ona mafai e epikopo ona fesoasoani e faafetaiaʻia manaoga o tagata o le Ekalesia. E te le tau alu i le epikopo e maua ai lena mana o le perisitua.”⁵

A o tatou auauna atu le tasi i le isi o ni uso ma tuafafine o auaunaga, e mafai ona tatou atinaeina le malo o le Atua i lo tatou eria.

Faaauau taumafaiga e tutotonugalemu i le aiga, lagolagoina e le Ekalesia.

I le avea ma tagata taitoatasi ma aiga, e tatau ona tatou faaauau pea ona faia le aoaoina o le talalelei e totonugalemu i le aiga. E ala i le suesueina o tusitusiga paia i le aiga, o le a faamalosia ai lo tatou faatuatua ia Iesu Keriso ma a tatou molimau.

Ou te molimau atu o lo tatou Tama Faalelagi ma Lona alo pele o Iesu Keriso e alolofa ia i tatou ma silafia i tatou. La’ua te taialaina i tatou i le asō e ala i lo tatou perofeta soifua, o Peresitene Russell M. Nelson. Ou te matuā faafetai i le ofoofogia o lana taitaiga ma lona tulaga faaleso’o. Ia tatou faatuatuaina ma lagolagoina o tatou au peresitene o korama a Toeaina ma le Aualofa ma galulue ma i latou. A o tatou faia o lea, o le a sili atu ona avanoa o tatou epikopo ma au epikopo e fesoasoani e faamalolosia a tatou talavou i le talalelei a Iesu Keriso.

I le suafa o Iesu Keriso, amene.