Sili atu ma le 100,000 Igoa ua Faavasegaina

O Carol Dunkley e 77 ona tausaga, ua faamanuiaina e avea ma tina o se fanau e toalima, valu fanau a fanau ma le 3 fanau a fanau a fanau, sa fiafia muamua i se olaga faaletino o le auauna malosi, ma o ia o se faifaatoaga mataala. I aso nei, o Carol, o se tasi o le Paranesi a Townsville Muamua, lea o se vaega o le Itu o Townsville i Kuiniselani i Matu, i Ausetalia, ua faia e ia le mea na te mafai e auauna ai i le Alii aua o lona tino ua i ai ni tapulaa.

O loo manatua lelei e ia le aso i le 2010 ina ua faasilasila mai e se fomai-uaua lona ma’i: “Ua e maua i le ma’i tetete (Parkinson’s)” I le tolu tausaga talu ai na suia ai lona suilapalapa, na masalomia e Carol se mea na sese i lona suilapalapa aua na le mafai ona savali lelei ma alu ai i lona fomai (GP), lea na faasinoa o ia i se tagata tomai faapitoa—o le fai mai la o lona ma’i o le ma’i tetete (Parkinson’s) sa matua faateia ai o ia.

E le i i ai se fofo o le faamaʻi. Muamua sa faigata ia Carol ona savali; paga lea, na faateteleina i le le mautu ma le le mautonu i tulaga o lona fealuai. “Faafetai lava o loo i ai fualaau ma togafiti faaletaotoga o loo matua fesoasoani tele,” fai mai a Carol. Sa amata e ia ona inu fualaau ma sa lelei atili ai lana faalogona. Ae na avea lagona le mautonu o se vaega o lona olaga a o manaomia ona faalagolago atu i isi e faia mo ia mea sa le toe mafai ona ia faia mo ia lava—e pei o le faitogalaau.

“Ou te iloa e le mafai ona togafitia. E leai se taotoga e mafai ona faaleleia ai. O se tasi o lesona silisili ua ou aoaoina o le talia o aso taitasi e pei ona faasolosolo mai. Afai o se aso lelei e tuuina atu la’u tatalo o le faafetai. Afai o se aso leaga—ia e tatau ona sili atu taeao. Afai e faasolo ina leaga tele mea, ou te faitau. E aveesea aʻu mai oʻu faafitauli ma ou alu atu i se isi lalolagi; Ou te iloa o loʻu faatuatua o se mea e maoae ona lelei. E le o tuua lava na o aʻu. O Lana fesoasoani ma le faamafanafanaga e i ai lava iina i taimi uma. E tele mea e tatau ona faafetai ai, e ui ina e i ai taimi e tatau ai ona ou matua vaai malosi e iloa ai faamanuiaga,” o le tala lea a Carol.

Faatasi ai ma le faatapulaaina o lana tautua faaletino, na saili ai Carol mo se auala atonu e mafai ona ia tautua ai pea i le Alii i se auala loloto—na ia maua ai le faavasegaina o igoa—ma mo le iva tausaga ua mavae, na maua ai e ia le fiafia tele i le fesoasoani e faapotopoto mai Isaraelu i lenei taumafaiga taua.

O le faigamalaga a Carol agai i le auaunaga faaletalafaasolopito o aiga ua leva se taimi ae faatoa oo mai. Sa maliu lona tama a o fitu ona tausaga, ma o le mea e leaga ai sa faamutaina le sootaga a lona tina ma le aiga o lona tama ona o se feeseesea’iga i le aiga. O loo moomoo o ia maimau pe ana sa ia faaalu se taimi e faaputuputu ai faamatalaga mai ona aiga a o soifua e uiga i o latou aafiaga ma sootaga a o soifua i latou.

O le olaga faaipoipo i Egelani o se tauiviga ma na la faia ai ma lona toalua le filifiliga e malaga atu i Ausetalia i le 1966 o ni ‘10—pauni turisi’—o le aofai na totogi ia i latou taitasi e malaga i vaa e siitia atu ai i Ausetalia. O le taimi lava na faamautu ai i lo latou laueleele fou, na latou sailia ai se lotu. Toetoe lava a le talitonuina, le tu’itu’i mai loa o faifeautalai o Le Ekalesia a Iesu Keriso o le Au Paia o Aso e Gata Ai i lo latou faitotoa ma valaaulia ma le naunautai e o mai i totonu. A o aoaoina atu mataupu faavae ma aoaoga faavae o le talalelei, na lagona e le ulugalii le masani ai i nei aoaoga, ma latou fiafia e aoao e uiga i feagaiga e mafai ona latou osia ma Tama Faalelagi.

Faapea mai Carol: “Ina ua aoaoina i matou i le tulafono o le sefuluai, sa ou mautinoa o le a matou matua fia aai. Ae faatasi ai ma le faatuatua sa matou usiusitai ma na amata ona maua avanoa e faaleleia atili ai lo matou tulaga faaletupe. O se siitaga i le galuega mo Mikaele, lo’u toalua—ma na solo mai pea faamanuiaga. O le sefuluai e le faatatau i tupe; e faatatau i le faatuatua. Sa papatisoina i matou ma matou te le i toe tepa i tua. O se tasi lea o filifiliga sili ona lelei o o matou olaga.

“Na tatalaina mai e le talalelei se lalolagi fou atoatoa mo a’u. O le folafolaga a Elia—o le liliuina o loto o fanau i matua, ma [loto] o matua i fanau . . . sa liliuina lo’u loto i o’u tuaa.”

Ina ua faatoa sailiili lava e Carol on tuaa i le 50 tausaga talu ai—na faigata ma taugata, aemaise lava i le taimi na sue ai ona aiga Peretania a o nofo o ia i Ausetalia. Ua avea le FamilySearch ma se faamanuiaga tele ia te ia; ua le toe manaomia nei e nofo ma faitau ata matamataninii e sue ai lona aiga.

Fai mai a ia, “E oo mai i le taimi nei ua ou faavasegaina igoa e 95,614 ma toe iloilo le 19,050, o le aofai e 114,664.

“E tele lava ina ou faavasegaina faamaumauga faaPeretania aua ou te masani i igoa o nofoaga ma faaiu faaPeretania. . . . E malie foi—i se tasi taimi sa ou alu ai i ni faamaumauga faaPeretania ma o ni isi i le amataga lava na maua a’e e tusia i le faaLatina.

“Muamua lava, sa na o na ou tago lava toe faafoi le lisi! Ona ou manatu ifo lea, ‘atonu o le a ou talia lenei luʻi.’ O lea, na ou toe iloiloina ai le lisi e maua ai sina lagona malamalama i faamaumauga. Ona ou sue lea i le google o upu faaLatina mo le Fanau mai, Faaipoipoga, Maliu, Tina ma Tama, lea na mafai ai ona ou faamaeaina ai le faavasegaina o igoa, o lea mea sa ou lagona ai lava le fiafia ia te a’u lava o lea na mafai ona ou faavasegaina ni faamaumauga sa tusia i le faaLatina.

“Ou te manatua lo’u fiafia tele ina ua ou vaai atu i le kopi o le uluai tusi faaipoipo a lo’u tamamatua i luga o le ata matamataninii, ma ou vaai ai i lana saini ma le saini a lo’u tinamatua. Ou te mautinoa e le’i i ai ma se manatu o lo’u tamamatua o le a i ai se aso o le a nofo ai le tama teine a lona afafine i le masini faitau ata matamataninii ma vaai i le ata o le tusi lava e tasi mai Ausetalia mamao.”

Sa faia ni nai aoaoga o “auala e fai ai” i le maea ai o sauniga aso Sa a Carol ma sa valaaulia ai le autalavou. Sa maofa lava Carol i le vaai atu i le agaga mautinoa o tagata talavou a o faaaogaina komepiuta. I le taimi lenei, o loo i ai se numera o a latou talavou o le Ekalesia o loo taumafai malolosi e faavasega igoa, ma matua fiafia lava i le galuega.

“Ia o ai na iloa,” fai mai ai Carol, “a oo mai lo’u taimi ou te me’i atu ai i le isi laasaga o la’u faigamalaga faavavau, atonu o le a ou feiloai atu i se tasi o na uso po o tuagane i le talalelei lea sa ou faavasegaina lona igoa, ma o se tasi sa faaaoga le avanoa e talia ai sauniga o le talalelei a o faia galuega mo lona igoa i le malumalu. O se oliolisaga lena!

“Pe a ou faavasegaina igoa i le FamilySearch, ou te tatalo o le a i ai se toatele o e ua fiafia tele e saili o latou tuaa i luga o le FamilySearch e ala i taumafaiga a i latou uma o loo volenitia e auai i le galuega o le faavasegaina o igoa o le faaolataga.”