Itulau i le lotoifale
Tapuaiga Aso Sa KOVITI-19 mo se Aiga i Brisbane
Talu ai o le tele o nofoaga i le itulagi o le Pasefika i Saute o loo “lokaina” ona o le KOVITI-19, o loo ua faataunuuina sauniga o tapuaiga faalelotoifale a Le Ekalesia a Iesu Keriso o le Au Paia o Aso e Gata Ai i luga o le initoneti.
Sa faasoa ai lata mai nei e Tai Makai e ala i ata pu’e auala e tapuai ai lona aiga i aso Sa i Ipswich, Ausetalia.
O lana au paia o le Ekalesia e faataunuuina a latou sauniga o tapuaiga, e ta’ua o le sauniga faamanatuga, e muamua i le initoneti, ona faaaoga lea o potu vaevae mo vasega eseese.
E faapotopoto le aiga o Makai i le potu malolo e tapuai ai, ona saili lea e tagata uma ni nofoaga filemu e vaevae i ai ni nai vasega.
O Tai o se taitai i le Peraimeri a tamaiti ma na te aoaoina se vasega e auai ai lana tama, o Ieremia, ma fanau a lana fanau, o Heavenly ma Levi, mai le potu malolo.
O lana tama teine ua faaipoipo, o Tiana, e vaaia le Peraimeri ma vaai mulimuli ane i le fesootaiga mo suesuega mo le Aualofa a tamaitai, o se faalapotopotoga e lagolagoina le faatuatua, aiga ma le auauna atu i isi.
O lana fanau tama, o Javarn ma Johnny-Mack e auai i luga o le initoneti mo vasega a Alii Talavou. O Javarn e fesootai atu mai le isi potu malolo. Latou te talanoaina ma fuafuaina auala e ola ai ma faasoa atu le talalelei, auauna atu mo isi ma faamalolosia aiga.
O le toalua o Tai, o Jason, o se tagata faigaluega i le FIFO (lele atu lele mai) i se nofoaga taumamao o Kuiniselani, lea e seāseā lelei ai le initoneti. Fai mai Tai, “I taimi e mafai ai e lo’u toalua ona maua lelei le initoneti, e matamata mai o ia ia i matou e ala i le fesootaiga tau vitio i le taimi o a matou lesona o Afiafi Faaleaiga, e faia e ia le tatalo ma taitai le matou fonotaga faaleaiga i taimi uma.”
A o tomanatu i ona lagona e uiga i le tapuai i le fale i le taimi o le KOVITI, sa faapea mai Tai, “Ou te faamautinoa lelei o loo i ai ia potu vaevae ma le tekinolosi e faaaoga e lo’u aiga, e le faamalosia se tasi e alu i luga o le initoneti, ae faafefea ona matou le faaaogaina lenei avanoa maoae? Ua ia i matou ni taitai ofoofogia i totonu o le matou uarota. E matua fiafia lava la’u fanau e o i vaega ma fiafia e vaai i tagata uma i le [sauniga] faamanatuga. I le faamaoni lava, o lena mea e faafaigofie ai la’u galuega.”
Toe faapea mai Tai, “Ua tele naua le matafaioi a le tekinolosi i le faatumauina o le malolosi o i matou o se aiga. E le mafai ona ou ta’u atua ia te outou le faamanuiaina ma le faafetai o loo i ai suesuega faavae i le aiga o le Sau, Mulimuli Mai Ia Te A’u, ma le lava saunia a o le i taia i tatou e le Koviti. O avanoa e aoao ma faataitai ai i totonu o le aiga o taimi ia e mafai ona faalatalata atili atu ai i lo tatou Faaola.
“E ui lava ou te le i ola a’e o se tagata o le Ekalesia, ae sa ou alu i le lotu faatasi ma o’u matua. Ou te manatua pea le faapea mai a lo’u tama i le matou aiga, ‘Afai e te faamuamua le Alii, o le a pa’ū mea uma i o latou tulaga sa’o.’”
Ua iloa e Tai e le uigaese lona tulaga i totonu o le Ekalesia, ma, o le ola i le faatuatua, ua faapea mai o ia e na ona ia “fetuutuunai lava i suiga e manaʻomia ona fai… Ua matua faamanuiaina lava i matou i taimi o afa.”