Itulau i le lotoifale
Sa Pepese Agelu ma i Matou
I le taeao o le aso Sa o le konafesi a le Siteki o Aukilani Papatoetoe ia Aperila 2021, a o gaogao pea lava le falesa, sa faatumuina e tagata o le Uarota o Massey Park ia nofoa i tua atu o le pulelaa e sauni mo la matou faataitaiga mulimuli a le matou aufaipese. I le itiiti ifo ma se afa itula, o le a matou usuina le muai pesepesega a o lei amataina le sauniga, e valaaulia ai le Agaga Paia ma seti ai le agaga o la matou sauniga faaiu o le konafesi.
I le piano, sa ou faatalitali mo la’u faailoga e amata. Sa saunia e la matou taitaipese, o Tuagane Moronae Westerlund, ia le aufaipese ona ta’ita’i loa lea o le ulua’i nota a le aufaipese . . . ma goto ifo ai lo’u fatu. Ua fia masina o matou a’oa’o, ae o lea lava e le i lelei ona ogatasi i le ala e tatau ai.
I luga a’e o le leo o la’u piano, sa mafai ona ou lagona atu le tele o leo le mautinoa. Sa ou lagona atu vaega o mou atu ina ua faatuutuu vaega i lo latou le mautonu, ma i lo’u mafaufau, sa ou tatalo: “Ae Tama Faalelagi . . . sa matou matua taumafai lava.”
A o amata le matou faataitaiga mulimuli, sa ou tomanatu i a matou sauniuniga uma lava mo lenei aso. Sa matua naunautai lo matou epikopo e taliaina lenei tofitofiga faaleaufaipese a le siteki, faatasi ma lona faatuatua atoatoa i lana uarota. Sa filifilia e lo matou taitai faamaopoopo o musika, o Tuafafine Benjy Maugatai, lana taitai pese ma le ta laau, ona faatulaga ai lea o a matou musika ma valaau loa faataitaiga uma. Sa matou filifilia ituaiga o faatulagana o viiga ia sa matagofie ma faigofie, aua sa matou iloa e toalaiti lava tagata o le matou uarota e iloa faitau nota, ma o le toatele e lei pepese lava i se aufaipese muamua.
Ae sa latou o mai i taimi uma. E ui i le tele o isi tuatuano’a, sa faasolo ina matua toatele le matou aufaipese, sa toetoe lava ina le ofi i le tulaga . . . ma sa matua tele a matou faataitaiga.
Sa manino mai lava i le amataga o le a le matua sili ona lelei le matou aufaipese, ae ia Tuagane Westerlund, o le mea taua lava o le fiafia o le matou au pepese ma taumafai i le lelei sili latou te mafai, ma saunoa mai o ia, ‘Tuu latou e pepese.”
Sa faaiuina le matou faataitaiga faaiu faavaivai loto, ma sa ou vaai atu ia Tuagane Westerlund. Sa na o le ataata lava o ia ma saunoa atu i le aufaipese mo se toe taimi.
“Tatou te le usuina lenei musika ina ia faaali atu ai o tatou tomai,” na ia saunoa atu ai, “ae ina ia faasoa atu ai a tatou molimau. A o e pese, ia manatua o loo i ai se tasi i le au paia o loo manaomia ona lagona lou agaga ma lou faatuatua. O lo tatou tofiga moni lena iinei i le asō.”
Sa le i umi ae faatumulia le falesa, e oo i le pito lava i tua o le fale. A o alala i lalo taitai faalesiteki ma faaleeria, sa faailoa mai e Tuagane Westerlund ia tula’i le matou aufaipese.
Sa ou tāina le vaega amata a le piano mo le matou muai viiga, ma ina ua tatagi mai le nota muamua lava a le aufaipese, sa matua le talitonu o’u taliga. O se leo atoatoa, lototele, ma le ogatasia! Sa ou tilotilo a’e mai la’u musika ma le maofa tele. “O ai o loo pepese?”
E moni a, o la matou vaega masani lava o tagata fiafia ma faatuatua o le uarota, ae sa ou lagonaina foi se aufaipese le vaaia ma tomai o loo faamalolosia le aufaipese. Sa matagofie le matou muai viiga. Sa faapena foi le manaia o isi a matou pese e lua na sosoo ai, ma faapena foi le suamalie o le agaga sa faatumulia ai le sauniga atoa.
E le na o a’u na maitauina se vavega i lena aso. O Desmond Maugatai—se tasi o a matou tena—na mulimuli ane faapea mai ia te a’u, “E mafai ona ou molimau atu. . .ina ua amata ona matou pepese, sa ou faalogoina leo fou e lua, o se tasi i talaane o lo’u tauau agavale, o se tasi i lou taumatau, ma o laua e le o ni isi ou te iloa i totonu o la tatou aufaipese.”
Sa faailoa atu e Kayla Tagavaitau, e sefululua ona tausaga, se aafiaga foi faapea i lona tina. O se taimi muamua lea na pese ai i se aufaipese faaleuarota, ma ina ua maea le konafesi sa ia faapea atu, “Mama . . . sa ou lagona e pei lava ina ua matou pepese, sa matou pepese faatasi ma agelu.
Sa avea aʻu ma se vaega o le tele o aufaipese a le Ekalesia i le tele o tausaga, ae o le aufaipese lea na faamaonia maia ia te aʻu se mamanu ua masani ona ou maitauina. A tatou faia le mea sili tatou te mafaia e aoao ai musika, pe a taumafai le mea sili tatou te mafaia e tuuto ai i faataitaiga, pe a tatou le faavaivai, e oo lava i faafitauli ma mea e le fiafia ai, pe a tatou, “galulue ma le maelega . . .” e ui lava i o tatou vaivaiga ma, “pe a uma mea uma e mafai ona tatou faia,” (2 Nifae 25:23), o le a faaatoatoaina e le Tama Faalelagi o tatou le atoatoa, “ma o lona alofa tunoa e mafai ai ona [tatou] atoatoa ia Keriso” (Moronae 10:32).
E mafai foi ona Ia auina mai Ana agelu e pepese faatasi ma i tatou.