PŌPOAKI MEI HE KAU TAKI FAKAʻĒLIÁ
Fili ke Fili
ʻOku tau fehangahangai mo ha ngaahi pole mo e faingataʻa lahi he ʻaho kotoa pē ʻo ʻetau moʻuí. Ko ha niʻihi ʻoku angamaheni pē ia hangē ko e kiu he halá. Ko ha niʻihi ʻoku mafatukituki ange pea ʻe lava ke ne uesia ʻetau moʻui lelei fakatuʻasinó, fakaelotó mo e fakalaumālié.
Kuó u ngāue ʻi ha ngaahi taʻu lahi ko ha palōfesinale ʻi he moʻui lelei fakaʻatamaí lolotonga iá ʻoku ou fua fatongia ʻi ha ngaahi uiuiʻi fakatakimuʻa kehekehe ʻi he siasí. ʻI heʻeku feinga ke fakaʻaongaʻi e ngaahi tefitoʻi moʻoni ʻo e ongoongoleleí ki heʻeku ʻilo fakapalōfesinalé, kuó u ʻiloʻi ai ʻoku tokoni lahi moʻoni e ngaahi fili ʻe fā ko ʻení ʻi he taimi ʻoku tau fehangahangai ai mo ha ngaahi faingataʻa lalahi mo iiki fakatouʻosi. ʻIkai ngata aí, ʻe ala tokoni ʻa e ngaahi fili ko ʻení ke tau fakatupulaki ʻa e moʻui fakafalala fakaeloto mo fakalaumālie pē kiate kitautolú, ʻa ia ʻe tokoni ai ke tau haʻu ki hotau Fakamoʻui ko Sīsū Kalaisí pea aʻusia ʻa e mālohi faifakamaʻa, faifakamoʻui mo fakaivia ʻo ʻEne Fakaleleí ʻi heʻetau moʻuí.
1. Fili Hoʻo Tali ki Hoʻo Ngaahi Tūkungá
Kuo tā tuʻo lahi ʻetau tuku e ngaahi meʻa ʻoku hoko ʻi heʻetau moʻuí ke ne fakapapauʻi e ngaahi ola ʻo ʻetau moʻuí. ʻOku faingofua ke tau taʻefiemālie ʻi he ngaahi meʻa ʻoku hoko kiate kitautolú. Ko e lahi taha ʻo e ngaahi meʻa ko iá ʻoku ʻikai ke tau lava ʻo mapuleʻi, hangē ko e ʻeá, pe ko e ʻulungia e timi ʻoku tau saiʻia taha aí, pe mafatukituki angé, ko e ngaahi meʻa fakamamahi ʻi heʻetau moʻuí pe ʻi he moʻui ʻo kinautolu ʻoku tau ʻofa aí. Ka te tau lava ʻo fili ke fiefia, ke nēkeneka neongo e faingataʻa peheé. ʻOku ʻikai ʻuhinga ʻeni ki he fakakaukau leleí pē pe ko hono tukunoaʻi e ngaahi polé. ʻOku maʻu ia mei he ʻunu ke ofi ange kia Sīsū Kalaisi.
Naʻe fakamatalaʻi ʻe Palesiteni Lāsolo M. Nalesoni, “ʻOku lava e kāingalotú ʻo fiefia ʻi ha faʻahinga tūkunga pē. Te tau kei fiefia pē neongo ko ha ʻaho, uike, pe ko ha taʻu ne fakamamahi.
“ʻOku siʻi ha kaunga e fiefia ʻoku tau maʻú, ki he tūkunga ʻetau moʻuí [ka ʻoku kaunga kotoa ia ki he meʻa ʻoku tuku taha ki ai ʻetau tokangá ʻi heʻetau moʻuí].
“ʻI hono tuku taha ʻetau tokangá ki he palani ʻa e ʻOtuá ki he fakamoʻuí, pea mo Sīsū Kalaisi mo ʻEne ongoongoleleí, te tau lava ʻo ongoʻi fiefia ʻo tatau ai pē pe ko e hā e meʻa ʻoku hoko—pe ʻikai ke hoko—ʻi heʻetau moʻuí. ʻOku haʻu e fiefiá meiate Ia pea koeʻuhí ko Ia. Ko Ia e tupuʻanga ʻo e fiefia kotoa pē.”1
2. Fili ke Ngāue
ʻI he taimi ne fanauʻi mai ai kitautolú, ne tau maʻu ha meʻaʻofa fakaofo mo pelepelengesi ʻe ua. Ko e ʻuluakí ko hotau sino fakamatelié. Ko e meʻaʻofa hono uá ko e tauʻatāina ke fili ki he totonú, pe ko e malava ke fili ki he leleí pe koví. Ko ha meʻangāue mālohi ʻeni ke ikunaʻi ai e mamahí, siva e ʻamanakí, loto-taʻotaʻomiá mo e loto-hohaʻá ʻi heʻetau moʻuí. Ka kuo pau ke tau ngāue ʻaki fakapotopoto ia.
ʻOku hoko hono fakaʻaongaʻi hoʻo tauʻatāina ke filí ke fakaafea ai e Laumālie Māʻoniʻoní pea mo e mālohi fakaivia ʻo e Fakalelei ʻa Sīsū Kalaisí ki hoʻo moʻuí pea ʻomi ha fakamoʻui.
Te u fokotuʻu atu ha kiʻi ngāue faingofua ʻe lava ke ne ʻomi ha ngaahi nunuʻa mālohi ki hoʻo moʻuí. Lotua ke ʻiloʻi e ngaahi faingataʻa lalahi ʻi hoʻo moʻuí. Hili iá pea lau pe mamata ʻi he konifelenisi lahi fakamuimuitahá. Hiki ha fokotuʻu ʻe taha pe ua mei he lea takitaha ʻa ia ʻokú ke fakakaukau ʻe ala ʻaongá. Toe fokotuʻutuʻu e lisi ko ʻeni ʻo e ngaahi meʻa ʻe lava ke ke faí ke taupotu taha ki ʻolunga ʻa e meʻa ʻoku ʻaonga tahá, pea fakahokohoko hifo ai ki he ngaahi meʻa ʻe ala ʻaongá. Kuó ke faʻu leva eni ha lisi ngāue.
Hili iá, peá ke fakahoko leva ha meʻa ʻe taha pe ua mei he ngaahi fokotuʻu ko ʻení he taimi taki taha. ʻI hoʻo fakakakato iá hiki leva ki he meʻa ʻe taha pe ua ʻi hoʻo lisí pea fai pehē ai pē. ʻI he ngaahi founga ʻe niʻihi ʻoku ʻikai ke fuʻu mahuʻinga ia pe ko e hā e meʻa ʻokú ke fili mei he lisí ke fakahokó. ʻI hono fakaʻaongaʻi hoʻo tauʻatāina ke filí ʻaki hoʻo ngāué, ʻokú ne ʻomi ai ha ngaahi tāpuaki maʻongoʻonga fakalaumālie pea te ne fakamālohia hoʻo tuí.
Kuo akonaki mai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo pehē, “ʻOku tataki kita ʻe heʻete tui kia Kalaisí ki ha ngāue māʻoniʻoni, ʻa ia ʻoku fakatupulaki ai hotau ivi malavá mo e mālohi fakalaumālié. Ko hono maʻu ko ia ha mahino ko e tuí ko ha tefitoʻi moʻoni ia ʻo e ngāué mo e mālohí, ʻoku fakalotoa ai kitautolu ke tau fakaʻaongaʻi ʻetau tauʻatāina ke fili ki he totonú ke fenāpasi mo e moʻoni ʻo e ongoongoleleí, ʻokú ne fakaafea ʻa e mālohi huhuʻi mo fakaivia ʻo e Fakalelei ʻa e Fakamoʻuí ki heʻetau moʻuí, fakalahi e mālohi ʻiate kitautolú ʻa ia ʻoku tau hoko ai ko ha kau fakafofonga pē kiate kitautolú, pea ʻoku mahuʻinga ia ki hono fakaafea ha ueʻi fakalaumālie, ʻo fakafou ʻi he kole, fekumi pea mo e tukituki.”2
3. Fili ke Fakamālohisino
Ko hotau sinó ko ha ngaahi temipale ʻa ia ʻoku nofo ai hotau laumālié, kae pehē foki ki he laumālie ʻo e ʻOtuá ʻi he taimi ʻoku tau moʻui taau aí. ʻE lava ke faitāpuekina fakatuʻasino, fakalaumālie mo fakaeloto kitautolu ʻi heʻetau tokangaekina hotau sinó. Kuo fakautuutu hono fakahaaʻi ʻe he fakatotolo fakafaitoʻó ko e fakamālohisinoʻi ko ia ʻo e mafú ʻa ia ʻoku tau ueʻi ai e ngaahi uoua lalahi hotau sinó (vaʻé mo e nimá ke feʻunga ke tā vave hotau mafú) ʻi ha miniti ʻe 30 he ʻaho, tuʻo nima he uike ʻi ha ngaahi founga fakamānako, ʻe lava ke lelei ia ki hono mapuleʻi e loto-taʻotaʻomiá, loto-hohaʻá mo e loto-mafasiá. ʻOku lelei foki ia ki heʻetau moʻui lelei fakatuʻasinó mo fakalaumālié pea ʻe lava ke fakalahi ai ʻa e tuʻunga lelei mo e fuoloa ʻo ʻetau moʻuí.
Ko e moʻoni foki ʻoku kehekehe pē ʻa e ngaahi tūkunga fakafoʻituituí, pea ʻoku totonu ke ke fekumi ki ha faleʻi fakafaitoʻo fakapotopoto kimuʻa peá ke kau ki ha polokalama fakamālohisino. Ka ʻe lava ke fai ʻe he kakai tokolahi ha meʻa, ʻo tatau ai pē pe ko e tuʻu ki ʻolunga mei ha sea ʻo luelue ʻi he taimi mo e mamaʻo ʻe ala lavá.
4. Fili ke Fakatomala
ʻOku ʻikai ke tupu ʻa e ngaahi faingataʻa, ʻahiʻahi, mamahi, pe mahaki kotoa pē ʻi heʻetau moʻuí mei he angahalá. Ko ha konga lahi ʻoku tupu ia mei he moʻui ʻi ha māmani fakamatelie kuo hinga. Ko ha niʻihi ʻoku tupu ia mei he ngaahi angahala pe fehalaaki ʻa e niʻihi kehé. Ka ʻe lava ke tau fili ʻa e fiefiá kae ʻikai ko e siva e ‘amanakí. Ko e taha e ngaahi founga lelei taha mo hokohoko lelei ke ongoʻi ai e fiefia moʻoní, neongo hotau ngaahi tūkungá, ko e fakatomala he ʻaho takitaha.
Naʻe fakamatalaʻi ʻe Palesiteni Lāsolo M. Nalesoni ʻa e ʻuhinga ʻo e fakatomala moʻoní. “[K]o e taimi ʻoku kole mai ai ʻa Sīsū kiate koe mo au ke ta ʻfakatomalá,’ ko ʻEne fakaafe ia ke liliu ʻetau fakakaukaú, ʻetau ʻiló, hotau laumālié—pea naʻa mo e anga ʻo ʻetau moʻuí. Ko ʻEne kole ia ke liliu e anga ʻo ʻetau ʻofá, fakakaukaú, ngāué, fakaʻaongaʻi hotau taimí, tōʻonga ki hotau uaifí [pe husepānití], akoʻi ʻetau fānaú, pea naʻa mo hono tokangaʻi hotau sinó.”
ʻIkai ngata aí, “ʻOku hala ha meʻa ʻe toe fakatauʻatāina ange, fakaʻeiʻeiki ange, pe toe mahuʻinga ange ki heʻetau fakalakalaka fakafoʻituituí ka ko e tokanga fakaʻaho maʻu pē ki he fakatomalá. Ko e fakatomalá ʻoku ʻikai ko ha meʻa pē ʻoku hoko; [ka] ko ha ngāue [ia]. Ko e kī ia ki he fiefia mo e nonga ʻo e ʻatamaí. Ko e taimi ʻoku fakatahaʻi ai mo e tuí, [ʻoku] malava leva ʻe he fakatomalá ʻo ʻai ke tau maʻu ʻa e mālohi ʻo e Fakalelei ʻa Sīsū Kalaisí . . .
“Ko e taimi ʻoku tau fili ai ke fakatomalá, ʻoku tau fili ke liliu! ʻOku tau fakaʻatā ke liliu kitautolu ʻe he Fakamoʻuí ki hotau tuʻunga lelei tahá. ʻOku tau fili ke tupulaki fakalaumālie mo fiefia—ʻa e fiefia ʻo e huhuʻi ʻiate Iá. Ko e taimi ʻoku tau fili ai ke fakatomalá, ʻoku tau fili ke tau hangē ko Sīsū Kalaisi!”
Naʻe toe tānaki mai ʻe Palesiteni Nalesoni ʻo pehē, “Ko e fakatomalá ko e kī ia ke taʻofi e mamahi ʻoku fakatupu ʻe he ngaahi tauhele ʻa e filí.”3
ʻIkai ko ia pē, kapau kuo tau fakatomala moʻoni pea kuo fakamolemolea ʻetau ngaahi fehalaaki mo e angahala he kuohilí tā ʻoku fie-maʻu leva ke tau laka ki muʻa, tukuange ia, pea tanu ia ke puli. Ko hono keli hake ʻa e ngaahi angahala he kuohilí ʻoku ʻikai ko ha founga ia ke ongoʻi ai e nongá mo e fiefiá ʻi heʻetau moʻuí.
Fakamoʻoni
ʻOku ou fakamoʻoni ʻo makatuʻunga ʻi heʻeku aʻusia fakafoʻituituí pea mo e aʻusia ʻa ha niʻihi kehe tokolahi, ʻoku ʻafioʻi mo ʻofa ʻa hotau Fakamoʻui mo e Huhuʻi ko Sīsū Kalaisí ʻiate kitautolu fakafoʻituitui, pea ʻokú Ne finangalo ke tau fiefia mo aʻusia ʻa e fiefiá ʻi heʻetau moʻuí, neongo e ngaahi ʻahiʻahi mo e ngaahi fefaʻuhi mo e ngaahi faingataʻa ʻokú Ne ʻafioʻi ʻoku tau fehangahangai mo iá. ʻI heʻetau fakamālohia ʻa e tui kiate Iá, tafoki kiate Ia he ʻaho takitaha ʻi he faʻa lotu ʻi he loto-fakatomalá, fakaʻaongaʻi fakapotopoto ʻetau tauʻatāina ke fili ki he totonú, mo fakamālohisino hotau sinó mo e ʻatamaí mo e laumālié, te tau lava ai ʻo aʻusia ʻa e fiefia mo e nonga ʻoku lava ke maʻu pē ʻi he mālohi faifakamaʻa, fai fakamoʻui mo fakaivia ʻo ʻEne Fakaleleí.