“O Le Pogai Tatou Te Totogi Ai Sefuluai,” Liahona, Tes. 2022.
Aoaoga Autu o le Talalelei
O Le Pogai Tatou Te Totogi Ai Sefuluai
E tuuina atu e tagata O Le Ekalesia a Iesu Keriso o le Au Paia o Aso e Gata Ai le tasi vaesefulu o a latou tupe maua i le Ekalesia. O lenei mea ua ta’ua o le sefuluai. E faaaoga le tupe e faatino ai le galuega a le Ekalesia i le lalolagi atoa.
O Le A Le Sefuluai?
O se tasi o poloaiga a le Atua o le totogi o le sefuluai, o le tasi vaesefulu lea o a tatou tupe maua, i Lana Ekalesia. Pe a tatou totogiina le sefuluai, tatou te faaali atu lo tatou lotofaafetai i le Atua mo o tatou faamanuiaga. Tatou te faaali atu tatou te faalagolago i le Alii ma ua tatou naunau e usitai ia te Ia i mea uma.
Mekisateko—Tausi Faleteuoloa, saunia e Clark Kelley Price
Tala o le Feagaiga Tuai
Ua totogi e le nuu o le Atua le sefuluai talu mai taimi o le Feagaiga Tuai. Mo se faataitaiga, na totogi e Aperaamo ia sefuluai (tagai Kenese 14:18–20). O le tulafono o le sefuluai sa aoaoina foi e perofeta anamua, e aofia ai Mose ma Malaki (tagai Levitiko 27:30–34; Neemia 10:35–37; Malaki 3:10).
Toefuataiga o le Tulafono o le Sefuluai
I le 1838, na fesili atu ai le perofeta o Iosefa Samita i le Alii pe faapefea e tagata o le Ekalesia ona totogi sefuluai. O le tali a le Alii o loo tusia i le Mataupu Faavae ma Feagaiga 119, lea e fai mai e tatau i tagata o le ekalesia ona tuu atu le tasi-vaesefulu o a latou mea faaopoopo i le Ekalesia (tagai fuaiupu 4). Ua aoao mai taitai o le Ekalesia e faapea o “mea faaopoopo” o lona uiga o tupe maua.
Ata na pueina e Jamie Dale Johnson
O Le Auala e Totogi ai le Sefuluai
E mafai ona tatou totogi le sefuluai e ala i le faatumuina o le fomu o foai i le initoneti i le donations.ChurchofJesusChrist.org. Pe e mafai foi ona tatou faatumuina se fomu pepa ma avatu le tupe i se tasi o le au epikopo po o le au peresitene o le paranesi. E auina atu tupe uma i le laumua o le Ekalesia, lea e filifili ai ma le agaga tatalo e taitai o le Ekalesia (le Au Peresitene Sili, Korama a Aposetolo e Toasefululua, ma le Au Epikopo Pulefaamalumalu) le ala o le a faaaogaina ai.
Faamanuiaga
Ua folafola mai e le Alii o i latou o e totogi sefuluai o le a faamanuiaina faaletino ma faaleagaga. O le sefuluai e faamanuiaina ai foi fanau uma a le Atua i le avanoa e aoao ai e uiga ia te Ia ma tuputupu ae i le talalelei.
Auala e Faaaoga ai Tupe o le Sefuluai
O tupe o le sefuluai e faaaoga e fausia ai le Ekalesia a le Alii i le lalolagi atoa. E aofia ai le fausiaina o malumalu ma isi fausaga a le Ekalesia, lolomiina o tusitusiga paia ma isi anomea, faatupeina o aoga a le Ekalesia, ma le fesoasoani i talafaasolopito o aiga ma le galuega faafaifeautalai.
Tautinoga o le Sefuluai
E faatasi i le tausaga ona feiloai tagata o le Ekalesia ma lo latou epikopo (po o le peresitene o le paranesi) e ta’u atu ia te ia pe o i latou o ni tagata e totogi atoa le sefuluai.