O Le Meaalofa o le Kerisimasi Ou Te Lei Manao e Tuu Atu

Saunia e Warren Park, Texas, ISA

Atonu o le a le fia vaai mai le tamaloa ia i maua, ae sa tonu ia i maua e momoli atu pea se meaalofa.

I le taimi o la’u misiona i Karolaina i Matu, ISA, sa ma asiasi atu ai i se alii sa foliga fiafia mai i le taimi muamua ae na amata ona finau mai o le Tusi a Mamona e sese. Sa ia faaalia foi isi manatu le lelei e uiga i le Ekalesia. O le ma lesona sa le o se lesona lelei. Sa ma faia se tatalo faaiu ma o ese atu.

Mo se taimi, sa ou teuina ai ni lagona e le pei o se faifeautalai mo lenei alii, ae na iu lava ina galo ia te au o ia. Seia oo mai le taimi o le Kerisimasi.

Mo le Kerisimasi, sa tuuina mai e nisi o tagata o le Ekalesia ia i maua ni tapu lapopoa se lua o popcorn. Sa ma tatalaina le tapu muamua ma amata ona aai, ae sa amata ona ma mafaufau e uiga i le tamaloa sa ma asia.

A o ma tilotilo atu i la ma tapu lona lua, sa ma manatuaina sa nofo lenei tagata na o ia lava. Sa ma manatu atonu e manao foi o ia i se popcorn, ae sa ma manatuaina lona le fiafia tele. Atonu o loo malaga o ia e asiasi atu i le aiga, ma o le a le manao o ia e vaai mai ia i maua e tusa lava pe na i ai o ia i le fale. E le gata i lea, o le ma popcorn lea.

Peitai, o lena uunaiga muamua, e lei alu ese lava. Sa ma tulei ese alofaga ma filifili ai e tuu atu ia te ia le ma tapu lona lua o le popcorn.

Ina ua tuua le lotu i lena Aso Sa, sa ma o atu i lona fale ma tuitui i le faitotoa. Sa amata ona ou maua ni mafaufauga lona lua, ae na matala le faitotoa.

“Manuia le Kerisimasi!” sa ma fai atu ai. O le ataata sili ona tele na oo mai i ona foliga, ma sa ia faafeiloaia i maua i totonu.

“Uso e, o loo i ai se ma meaalofa mo oe,” sa ma fai atu ai. Ona ma avatu lea ia te ia o le tapu lapoa o le popcorn. Sa sili atu le tele o lana ataata ma fai mai ma te nonofo i luga o lona nofoa. A o matou talanoa, sa ou iloaina e seasea ona ou vaai i se tasi o fiafia tele faapea.

Sa ma aoaoina e lei i ai sona aiga na latalata ane. Sa ia fuafua e fai Kerisimasi na o ia. O meaalofa na afifi sa ou vaaia i lalo o lana tamai laau Kerisimasi sa na o ni pusa gaogao na afifiina mo le teuteuina.

“Ou te lei manatu na popole se tasi ia te au,” o lana tala lea. “Ou te lei manatu o le a ou maua se meaalofa i lenei tausaga.”

A o ma o ese atu, sa ou lagonaina le olioli tele lea sa ou le iloa ai pe faapefea ona taofiofi. Ou te lei fiafia foi i lenei tamalii, ae o lea ua ou lagonaina le alofa faamaoni mo ia.

O le Kerisimasi e le faatatau ia te oe po o au. E faatatau ia Iesu Keriso, le meaalofa silisili o meaalofa uma, ma e uiga i le faasoa atu o Lona alofa i isi. Pe a tatou alolofa ma fesoasoani i isi, tatou te lagonaina le olioli aua e fiafia le Tama Faalelagi i la tatou filifiliga e mulimuli i Lona Alo.