“Ou te Iloa Lena Pese,” Liahona, Tes. 2022.
O Leo o le Au Paia o Aso e Gata Ai
Ou te Iloa Lena Pese
Sa galo ia te a’u ia Uso Tingey, ae na manatua o ia e le Atua.
Mo se gaoioiga faalevaiaso, sa faatulaga ai e taitai o Tamaitai Talavou a le matou uarota se asiasiga i se fale tausi soifua i le lotoifale. Matou te usuina pesepesega o le Kerisimasi, faasoa atu ni ataata, ma toe foi i le lotu mo le koko vevela ma kuki.
Ou te lei manao moni lava e ulu atu i le le manuia o na potu e pei o le falemai, faatasi ai ma o latou manogi vailaau, o teuga laiti, ma lagona o le faanoanoa. Ou te tautino atu sa sili atu ona ou fiafia i le koko ma le faatasi ai ma a’u uo nai lo le pepese i tagata matutua.
Sa matou taunuu atu ma savavali atu ma pasia se tamai laina o moli o le Kerisimasi i potu. A o matou usuina ni pesepesega faapelepele, sa maligi loimata o nisi o tagata matutua, o nisi sa taumafai e pepese faatasi, ma o nisi sa foliga mai e le fiafia i ai. Sa faafetai uma mai ia i matou a o matou tuua o latou potu, ae ou te lei lagonaina le olioli lea e masani ona o faatasi ma le auaunaga. Sa ou lagona le faanoanoa, ma mafaufau pe toafia ni tagata na asiasi atu i le fale tausi soifua i le na o le taimi o le Kerisimasi.
“O le a tatou o i le potu o Uso Tingey i le taimi nei,” o le tala lea a se tasi o o matou taitai. “E i ai lona ma’i o le Galonimo, o lea na te le manatua ai le tele o mea. Tou te iloa na maliu Sister Tingey i se taimi talu ai nei.”
Sa tuia lo’u loto i se tiga o le faanoanoa. Sa galo ia te au mea uma e uiga i le au Tingeys. O Uso Tingey ma lona faletua pele oni agelu lauulu sinasina o le matou aulotu. Sa ou manatuaina o la foliga ataata, le pa’i agamalu o Sister Tingey, ma le faafeiloaiga faaleuo a Brother Tingey. Ou te lei iloaina le taimi na la le toe auai ai i le lotu. Ou te lei manatuaina foi ua maliu Sister Tingey.
Sa matou ulufale atu i le potu o Uso Tingey ma faapotopoto i se afal’io faataamilo i lona nofoa faataavalevale. Sa faatumulia le potu i a matou pesega, ae sa nofo filemu o ia, ma lona ulu ua faanounou. Ina ua mavae ni pese se lua, sa fautua mai se tasi o o matou taitai ia matou usuina le “O le Atua Lou Tama.”1
Ina ua matou amata, sa faafuasei ona ea i luga le ulu o Uso Tingey, pupula ona mata, ma tilotilo mai ia i matou. Sa ataata o ia ma i se leo malu na faapea mai, “Ou te iloa lena pese.”
Sa amata ona tafe ifo loimata mai ona mata i ona alafau. E oo ane i le taimi na uma ai a matou pesepesega, ua matou fetagisi uma lava. Ona matou opoina lea o Uso Tingey ma faatofa atu.
E ala i le faigofie o se pese ma leo le atoatoa o se vaega o teineiti talavou, sa faamanatu atu ai ia Uso Tingey o ia lava o se atalii o le Atua ma e lei faagaloina o ia e le Atua. Talu mai lena asiasiga, e faapena foi au.