O le iloaina o loo i ai le malamalama i totonu ia te a’u na fesoasoani ou te iloa ai le malamalama o loo siomia ai a’u.
Ata
o se tamaitai o loo faasaga atu i le susulu mai o le la mai se faamalama
I le tausaga ua te’a, sa ou oo ai i le faateleina o le popole ma le atuatuvale. E ui lava sa ou tauivi i taimi uma ma le soifua maloloina faalemafaufau, ae o le taimi lenei sa sili atu ona leaga. Sa iu ina ou sailia se fesoasoani faafomai, ae o se vaega taua o lo’u faamalologa sa taulai atu foi i le aapa atu i lo’u Faaola.
A o ou tatalo mo se toomaga, sa uunaia a’u e vaavaai mo le malamalama i le lalolagi o siomia ai au. Sa ou faia le mea sili ou te mafaia. Sa i ai taimi na lagona ai e pei o le malamalama na ou mauaina o se tama’i mumu lea na vave ona toe pe. O le tele o taimi, sa ou mafaufau ai sa ou tu i le pogisa ma faatalitali mo le oso a’e o le la, ma le iloaina o le a toe mou atu i le po. Sa pei e puupuu ma le tumau le malamalama.
Ina ua mavae ni masina o lenei mea, sa ou oo i se manatu loloto: “O loo i ai le malamalama i totonu ia te a’u.” Ua aoao mai le Mataupu Faavae ma Feagaiga 88:13 o le malamalama o Keriso e “i mea uma” (tagai foi fuaiupu 7). Ou te le tau tulia ave o le malamalama i aso taitasi. E mafai ona ou tauaveina le malamalama i taimi uma.
Sa amata ona ou vaai ia te a’u lava o faasoa atu se vaega o le malamalama paia o lo’u Tama Faalelagi ma Iesu Keriso, ma sa ou iloaina sa ou mauaina se malamalama e le mafai ona pe. A o ou aapa atu i lo’u Faaola, sa ou iloaina ai mo a’u lava ia e faapea “ona ua faatumulia le atulaulau i le Malamalama o Keriso, e mafai ona tatou aoao faaleagaga, alualu i luma, ma tuputupu ae.”1
Pe a ou mafaufau e uiga i le Malamalama o Keriso, ua ou tosina atu i le manatu faapea ua tofu i tatou uma ma le gafatia e faateleina ai le malamalama ua tatou tauaveina i totonu o i tatou ma e mafai ona tatou musuia isi ia faia foi faapea.