E Na’o Le Faatekinolosi: Autalavou Matutua
Sailia o Keriso i le Taimi o le Kerisimasi
E faafaigofie e le lalolagi ona galo le uiga moni o le Kerisimasi, ae o ni nai mea nei ou te manatua e fai e saili ai o Ia.
E ui lava ou te tauivi e faia na mea i nisi taimi, ae ou te savalia lava i taimi uma le vevesi o le vaitau o le Kerisimasi e taulai atu i lo’u Faaola, o Iesu Keriso. Ou te taumafai e auauna atu i isi ma faasoa atu le savali o Lona soifua mai ma le malamalama i tagata uma ou te mafaia.
Faatasi ai ma fefaatauaiga ma Santas, ou te faaeteete afai e galo ia te a’u lou Faaola, o le a ou tuuto atu au lava i tu masani o le Kerisimasi a le lalolagi. Nai lo lena, ou te manao e taulai atu i le tagata e faia le upu tonu lava—o Keriso. O le aoaoina o le maoae o Lona soifua mai ua taitai atu ai i aafiaga ofoofogia faaleagaga i lo’u olaga. O le taimi lenei o le tausaga ua toe aumaia ai au i le totonugalemu o lo’u faatuatua ia te Ia aua o ia o le mafuaaga mo mea uma e lelei i lo’u olaga.
O le Kerisimasi e faailogaina i le tele o kalena o se mea sili ona taua o le tausaga, ma mo au o se taimi e toe manatunatu ai i le fanau mai, soifuaga, maliu, ma le toetu o lo’u Togiola.
Ina ia aoao e uiga ia te Ia ma aoao mai ia te Ia.
O lenei taimi o le tausaga e fesoasoani ou te mafaufau loloto ai i mea sa Ia faia mo au ma mea o loo Ia faia pea lava pea mo au. O le manatunatu filemu e uiga i Ana galuega o le auauna atu, o Ana taulaga, ma Lona natura, faapea foi ma le faitauina o tala o Lona soifua mai ma le mafaufau loloto i Lona soifuaga, e masani ona fesoasoani ou te lagona ai le latalata atili atu ia te Ia.
Sa gauai atu o Ia i Lana auaunaga i isi a o faamoemoe e faataunuu Lana misiona paia. A o faamanatu mai ia te au Lana faataitaiga o le auauna atu i le taimi o le Kerisimasi, ou te lagona le musuia e faasoa atu lo’u faamoemoe ma le faatuatua ia te Ia i lenei vaitau faapitoa faatasi ma i latou ou te alofa tele i ai ma ia gauai atu i manaoga o tagata uma o siomia au.
Mo se faataitaiga, o le Kerisimasi ua te’a, sa tele meaai o le Kerisimasi sa totoeia te au ma lo’u aiga. Sa ou faaaluina sina taimi e mafaufau loloto ai ma le agaga tatalo i mea e mafai ona matou faia i meaai faaopoopo uma. Sa ou lagonaina le malosi e tatau ona ou aveina atu i totonu o le aai lea sa ou vaai ai i le toatele o tagata e leai ni aiga i le taimi o au faigamalaga atu ma mai i le iunivesite.
I le tumu ai o la’u uta i pusa e lua e tumu i meaai, sa ou alu atu ai e sue nisi o tagata e mafai ona faaaogaina se meaai. E lei leva ae ou mauaina se vaega o tagata e leai ni fale e nonofo ai o e sa fiafia e talia le taumafataga o le Kerisimasi. Sa ou lagonaina le mafanafana a o latou faasoa atu le lotofaafetai sa latou lagonaina i lena aso. O le faailoaga o lo latou lotofaafetai na faatumulia ai foi lo’u lava loto. A o ou saunia se taumafataga e fafagaina ai i latou faaletino, o le fafagaina faaleagaga na ou mauaina mai le auauna atu ia i latou na faatumauina ai loʻu maona i se taimi umi ina ua mavae lena Kerisimasi.
I le taimi o le ma talanoaga, sa fai mai se tasi o tamaitai e leai se fale e nofo ai, sa tele ana mea e ai ae sa manao e faasoa atu le taumafataga na ofo atu i se isi tagata sa manaomia le fesoasoani. Ma mulimuli ane, a o ou tuua le aai, sa ou tietie atu ma pasia le fafine lava lea e tasi ma vaavaai atu a o ia tuuina le meaai sa ou tuuina atu ia te ia i talaane o se alii e leai se fale e nofo ai ma savali ese lemu atu.
O le taimi a o taumafai e avea atili e faapei o Keriso e ala i le auauna atu i isi na ou iloa ai o au lava le tagata na auauna atu i ai. Sa ou vaai i le malamalama o Keriso i lena aso. Sa ou vaai ia Keriso i lo’u tina o saunia ma le maelega pusa meaai ma i le fafine e leai se fale e nofo ai o le sa auauna atu i se isi tagata ae sa le tele ni ana mea e foai atu.
E pei ona aoao mai Elder Dale G. Renlund o le Korama a Aposetolo e Toasefululua: “O le vaitau o le Kerisimasi o se taimi masani ma matagofie e suesue ai Lona soifuaga ma taumafai e faataitai i Ona uiga ma uiga auaumama. A o e faia e mafai ona e iloa o Iesu o le Keriso, le Alo o le Atua, ma na Ia togiolaina au agasala.”1
O le savali o le soifua mai o Keriso e aumaia ai le faamoemoe ma le olioli i lou olaga, ma e mafai ona ou faasoa atu lena savali i isi. E mafai ona ou faaopoopo atu lo’u malamalama i le fetu lea na taitai atu ai le au makoi, ma e mafai ona ou fesoasoani i isi ia maua le Faaola. Ua ou iloa o faamanuiaga o le mauaina o meaalofa ma le lagonaina o le alofagia e fesoasoani ia te au e talia le faataitaiga a le Faaola o le foai atu. A o ou auauna atu i isi ma molimauina la latou auaunaga i lenei vaitau, ou te lagona le fesootai moni atu i le Faaola.
Afai tatou te taumafai uma e vaavaai i tua atu o le leo ma le pisi o le vaitau o le Kerisimasi ma saili ia avea atili e faapei o Keriso, ou te iloa e mafai ona tatou lagonaina le fesootai atili atu ia te Ia i o tatou lava olaga ma taitai atu ai foi isi ia te Ia. A o ou faailoa atu i latou o e atonu e lagonaina le le vaaia, faalogo ia i latou o e lagona le le lototoa, ma auauna atu ia i latou e le tagolima—aemaise lava i lenei taimi paia o le tausaga—ua ou iloa ai o le avanoa e avea atili ai e faapei o Ia o se tasi o meaalofa silisili ua tatou maua mai ia te Ia.
Po o le a lava le tala a le lalolagi e uiga i lenei vaitau o aso malolo, e mafai ona liliu atu o tatou loto i le Faaola. O ia o le vaega taua o le agaga o le Kerisimasi.