Faatinoina o le Faatuatua ia Iesu Keriso

Ata

o se tamā o loo aoaoina lona aiga

Matua Pelē,

O Iesu Keriso o le Mesia, ma ua Ia saunia le tele o auala mo i tatou e maua ai se molimau i Lana matafaioi ma le mana i o tatou olaga. O lenei lomiga o le mekasini e mafai ona fesoasoani ia te oe e aoao ai lau fanau e uiga i le faatuatua ia Iesu Keriso ma le ala e mafai ai ona tatou faailoa atu faamanuiaga ua tuuina mai e Ia ma le Tama Faalelagi i o tatou luga. E mafai foi ona e faaaogaina manatu nei e fesoasoani ia te oe e faaleleia ai suesuega o le Sau, Mulimuli Mai ia te A’u a lou aiga ma amata talanoaga e uiga i le taua o le totogiina o le sefuluai.

Talanoaga o le Talalelei

O Meaalofa o le Faaola

I le itulau e 4, o loo faasoa mai ai e Peresitene Henry B. Eyring se savali o le Kerisimasi o le olioli ma le fiafia i le meaalofa silisili ua tuuina mai e le Atua ia i tatou—o Lona Alo, o Iesu Keriso. Faitau lana tusiga ma talanoaina pe aisea ua avea ai le Faaola o se meaalofa i lou olaga.

Faatinoina o Mea Ua Tatou Aoaoina

E faapefea ona tatou mataalia atili i le faatinoina o mea tatou te aoaoina i la tatou suesuega o le talalelei? I le itulau e 10, faitau manatu mai le Au Peresitene Aoao o le Aoga Sa e uiga i le ala e mafai ai ona sili atu le avea o i tatou ma “e anaana i le upu” (Iakopo 1:22).

Faamanuiaga o le Sefuluai

I le itulau e 40, o loo faamatala ai e Elder Moisés Villanueva le ala na ia maua ai, o se tagata liliu mai e 10 tausaga le matua i le Ekalesia, se molimau o le sefuluai e ala i le vaavaai atu i lona tina o totogi ma le faamaoni le sefuluai. Ona ia faamalamalama mai lea o le taua o le faailoaina o faamanuiaga maaleale—i le faaletino ma le faaleagaga—lea e oo mai o se taunuuga o le totogiina o le sefuluai. I le avea ai o se aiga, e mafai ona outou faitauina vaega o lana tusiga ma talanoa i faamanuiaga maaleale e oo mai i le totogiina o le sefuluai.

Mea Malie Faaleaiga o le Sau, Mulimuli Mai ia te A’u

Faamanatu o Keriso

O le Feagaiga Tuai o loo aofia ai faatusa o le Faaola ma Lana Togiola lea e fesoasoani tatou te aoao ai e uiga ia te Ia.

Tuu atu i tagata taitoatasi e filifili se tasi o faatusa nei o Keriso o loo faaaogaina i le Feagaiga Tuai:
- Tamai Mamoe (Esoto 12:5; 1 Peteru 1:18–20).
- Manai (Esoto 16:4, 12–21, 31; Ioane 6:30–40).
- Vai (Esoto 17:1–6; Ieremia 2:13; Ioane 4:7–14).
- Gata apa uamea (Numera 21:4–9; Ioane 3:14–15).
- Maa (1 Samuelu 2:2; 2 Samuelu 22:2–3; Isaia 28:16).
- Lala (Isaia 11:1–2; Ieremia 23:5; 33:15).
- Malamalama (Salamo 27:1; Isaia 60:19; Ioane 8:12).
I le faaaogaina o pepa po o isi sapalai, fatu se meateuteu e mamanu e pei o le faatusa ua filifilia ma faaali atu i se nofoaga faapitoa e manatua ai le Faaola.
Suesue mau faasino o loo lisi atu i faatusa taitasi o i luga.

Talanoaga: O le a se mea o aoao mai e faatusa taitasi e uiga i le Faaola? O le a le uiga o Iesu Keriso i lou olaga?

Mo nisi suesuega i lenei autu, e mafai ona e faitau pe faalogologo i le saunoaga a Peresitene Russell M. Nelson i le konafesi ia Aperila 2017 “Mauainao le Mana o Iesu Keriso i o Tatou Olaga” (Liahona, Me 2017, 39–42).