“Sailia o Keriso i a Tatou Tu masani o le Kerisimasi,” Liahona, Tes. 2022.
Sailia o Keriso i a Tatou Tu masani o le Kerisimasi
Sa tonu ia i maua e vaai po o a tu masani ma teuga uma o le Kerisimasi e mafai ona aoao ai i matou e uiga ia Iesu Keriso.
Ata o le laau na tusia e David Green
Ua aoaoina i tatou e perofeta ma aposetolo ina ia saili atu e le aunoa ia Keriso “ae maise lava i lenei taimi o le tausaga—Kerisimasi.”1 I tausaga ua mavae, sa faaalu ai e lo matou aiga se vaitau atoa o le Kerisimasi e taumafai ai e fai lenei mea.
Sa tonu ia i maua i lena tausaga e “ofu” ni ofu e pupula ai o matou mata ma taliga faaleagaga e vaai ma faalogo i molimau a lo tatou Faaola i mea uma o le Kerisimasi. O nisi nei o molimau a Keriso na tatou mauaina. Matou te faamoemoe o le a outou iloaina ma lou aiga o outou lava malamalamaaga a o outou filifili e vaai ma faalogo ia te Ia i a outou tu masani o le Kerisimasi.
Laau Kerisimasi: I le tu masani o le laau Kerisimasi, sa matou maua ni lala laau na tumau pea le lanulauava e lei pepe i le taumalulu. Latou te molimau mai i le ola e faavavau, o le Toetu, ma le Togiola a Iesu Keriso. O le laau Kerisimasi na faamanatu mai ai ia i tatou le laau o le ola lea e tupu moni, pe sa’o, agai i le lagi—e sailia le malamalama. O lenei mea na mafua ai ona matou fesili ifo ia i matou lava, “Pe o tatou faia ea lea mea e tasi?” O le matou laau Kerisimasi na avea ma se nofoaga taua o le faapotopotoina e manatunatu ai pe mafai faapefea ona matou faasino atu o tatou olaga i le lagi e ala i le tumau ai i luga o le ala o feagaiga.
Moli o le Kerisimasi: I moli o le Kerisimasi, sa matou maua ai se faamanatu o Iesu o le Malamalama o le Lalolagi ma e ala i Lona malamalama, ua mafai ai ona matou toe maua lo tatou ala e toe foi atu ai i lo tatou aiga faalelagi. Faatasi ai ma lenei mea i le mafaufau, o moli uma o le Kerisimasi sa matou fiafia i ai na avea ma se faamanatu susulu o lo tatou Faaola.
Fetu o le Kerisimasi: Sa faamanatu mai e fetu o le Kerisimasi ia i matou o alii ma tamaitai popoto e mulimuli i le malamalama o le upumoni i la latou sailiga mo Iesu Keriso. E pei lava ona mulimuli le Au Makoi anamua i se malamalama taiala a se fetu ma maua ai le tamaitiiti o Keriso (tagai Mataio 2:9–11), e mafai foi ona tutusa le faamanuiaina o i tatou a o tatou filifili e mulimuli i le malamalama faaleagaga o le talalelei lea e faamalamalamaina le ala o feagaiga o le avea ma soo, e taialaina ai i tatou e toe foi atu i le ola e faavavau.
Pale i faitotoa o le Kerisimasi: Sa faamanatu mai e le pale laulaau ia i matou o le a i ai se aso e toe foi mai ai Iesu i le lalolagi e nofotupu o se Tupu o tupu, ma sa amata ona matou vaai o loo faatalitali mai se pale o le “pale o le amiotonu” ia i latou o e tausia lo latou faatuatua ia Iesu Keriso (tagai 2 Timoteo 4:7–8).
Meaai māmā tao: O meaai tao ma meaai mama e faamanatu mai ai ia i tatou ua faamatalaina e Iesu o Ia lava “o le areto o le ola” (Ioane 6:35) ma o le igoa o le nuu na fanau ai Iesu, o Peteleema, o lona uiga moni lava o le “fale o le areto.” Pe a matou tuuina atu pe maua ni meaai tao o le Kerisimasi, matou te mafaufau ia Iesu, le Areto o le Ola, ma Lona naunautaiga e lagolago i tatou ma tauave a tatou avega i Ona lava luga. Na te tuuina mai le toomaga matagofie ma le mafanafana e ala i le faamagalo atu.
Lole tootoo: O le lanu paepae matagofie o nei lole tulagaese o le Kerisimasi na aumaia ai le mama a’ia’i o Keriso i o matou mafaufau. O le foliga pio na mafua ai ona matou mafaufau i le tootoo o le leoleo mamoe ma le ala e avea ai Iesu ma Leoleo Mamoe Lelei, o le o le a leoleoina ma puipuia i tatou, o Ana mamoe (tagai Ioane 10:11–12, 14). O le suamalie o le lole na faamanatu mai ai ia i matou e aua lava nei suitulagaina le leaga mo le lelei—po o le oona mo le suamalie, e pei ona lapatai mai Isaia o le a tupu i aso e gata ai (tagai Isaia 5:20).
O le faataitaiga a lo matou aiga o le sailia o Keriso i mea uma o le Kerisimasi na matuai tauia ai i matou i ni auala e lei faamoemoeina. Sa matou maua ni molimau o Keriso o siomia i matou, e oo lava i agaifanua e pei o totini Kerisimasi, Santa Claus, ma ofumoe o le Kerisimasi. Sa matou faia le galuega faaleagaga e manaomia e vaai ma faalogo ai i molimau ia Iesu i le vaitau atoa o le Kerisimasi.
O le sailia ma le loto i ai o Keriso i le Kerisimasi o loo faaauau pea ona faaopoopo i ai le taua ma le matagofie i le ala tatou te faamanatuina ai le vaitau. Matou te faamoemoe a o outou sailia Keriso i le Kerisimasi, o le a taiala oe e le Agaga i molimau e finagalo le Tama Faalelagi e aoao ai oe ma lou aiga.
Matou te molimau atu o le filifili e “taulai atu ma le loto i ai i le Faaola”—e pei ona uunaia ai i tatou e Peresitene Russell M. Nelson e fai i le taimi o le faigalotu o le Kerisimasi 2020 a le Au Peresitene Sili2—e valaaulia ai le Agaga ma fesoasoani ia i tatou ia sili atu ona naunau e tumau ai i vaaiga faapelepele, leo, manogi, tofo, ma molimau o le Kerisimasi.
E alala tusitala i Iuta, ISA.