Sefuluai—o se Faamanuiaga, E Le o se Avega

Saunia e Elder Moisés Villanueva

O Le Fitugafulu

Ua tuuina mai e le Atua ia i tatou le tulafono o le sefuluai e faamanuia ai i tatou i le faaletino ma le faaleagaga.

O a’u o se tagata liliu mai o Le Ekalesia a Iesu Keriso o le Au Paia o Aso e Gata Ai. Ina ua 10 o’u tausaga, sa tuitui mai faifeautalai i le faitotoa o lo’u fale ma sa faataga i laua e lo’u tina i totonu. Sa papatisoina o ia i le silia ma le sefulu tausaga talu ai, ae sa taumamao ese mai o ia lava mai le Ekalesia mo le tele o tausaga. Sa aoaoina i matou e faifeautalai. Sa toe toaga lo’u tina, ma sa papatisoina i matou ma nai o’u tei e toafa.

I na taimi, sa matou ola ai i tulaga faigata o le tamaoaiga. O lo’u tina, o le sa tetea ma lo’u tama, sa galue e tausi i matou. E ui lava i le faigaluega ai i ni galuega eseese se tolu, ae sa tau le lava le tupe na ia maua e faatau ai mea sa matou manaomia. Ae ui i lea, i le avea ai ma se tagata toaga o le Ekalesia, sa naunau lou tina e faataunuu ana feagaiga o le papatisoga ma usitai i poloaiga ua tuuina mai e le Atua ia i matou, lea e aofia ai le tulafono o le sefuluai. E ui lava ina sa faigata ia te ia ma mo le aiga atoa, sa ia totogiina le sefuluai.

Sa fiafia foi lou tina e valaaulia faifeautalai e aai i lo matou fale. O nisi taimi na te valaaulia ai le silia ma le 10 faifeautalai. Ma sa tupu se vavega i lo matou aiga e talitutusa ma le vavega i le Feagaiga Fou ina ua fafagaina e le Alii le 5,000 i potoi areto e lima ma i’a e lua, ma sa sili atu nai lo le na o le faamalieina o lo latou fia aai. O le mea lena na tupu i lo’u aiga ina ua taumamafa faifeautalai i lo matou fale. Ina ua matou faatuatuaina le Alii, sa i ai se ala sa lava ai meaai.

Sa aoaoina a’u e lo’u tina e ala i mataupu ma faataitaiga ua tuuina mai e le Atua ia i matou le tulafono o le sefuluai e faamanuia ai i matou i le faaletino ma le faaleagaga.

O Le Tulafono o le Sefuluai

Ou te talitonu i le tulafono o le sefuluai. Sa i ai lenei tulafono talu mai aso anamua ma e aofia ai le foai atu o le 10 pasene o a tatou faatelega i le Ekalesia mo le faamoemoega o le faamanuiaina o fanau a lo tatou Tama Faalelagi. Faatasi ai ma isi mea, e fesoasoani le sefuluai e:

Faatupe le fauga ma le tausiga o falesa ma malumalu.
Lagolago le talaiina o le Talalelei a Iesu Keriso.
Faafaigofie le lolomiina o tusitusiga paia i gagana eseese.
Faatupe aoga a le Ekalesia, faapea foi aoaoga faalelotu e ala i le seminare ma le inisitituti.
Saunia mo le faapotopotoina, faafuainumeraina, ma le faaleleia o faamaumauga o talafaasolopito o aiga.

O Se Faamanuiaga, E Le o se Avega

Mo au, o le tulafono o le sefuluai o se faamanuiaga ae le o se avega. I le Malaki 3:10, o loo fetalai mai ai le Alii, “Ia outou tofotofo mai ia te au i lenei mea … pe ou te le toina pupuni o le lagi mo outou.” Ou te fiafia i lenei valaaulia tuusao. Ia te au lava ia, e pei o loo fetalai mai le Alii ia te au lava ia, “Afai e te le talitonu mai ia te au, tau lava o le faia, ona e vaai lea.”

O le mea o le a Ia fetalai ai e faatumulia ai au i le mautinoa ma le faamoemoe: “Ma [o le a Ou] sasaa atu le manuia mo outou, ina seia siliaili ona tele” (Malaki 3:10). Ou te molimau atu e faataunuuina e le Alii Ana folafolaga.

“O ai A’u, ua faapea mai ai le Alii, ua folafola atu ma ou le faataunuuina?

Ou te poloai atu a ua lē usiusitai mai tagata; ou te aveese ma latou lē maua ai le faamanuiaga.

“Ona latou fai ifo lea i o latou loto: E le o le galuega lenei a le Alii, aua ua le taunuu ana folafolaga” (Mataupu Faavae ma Feagaiga 58:31–33).

“Aisea Na Le Faamanuiaina Ai Au?”

I se tasi taimi, i le faaiuga o se sauniga faamanatuga, sa sau ai se tuafafine ia te au ma fesili mai po o le a se fautuaga e mafai ona ou tuuina atu ia te ia. Sa ia fai mai ua leai sona faatuatua i le tulafono o le sefuluai. Sa ia faamatala mai, mo se taimi sa ia sailia ai se siitaga i le galuega. E ui ina sa ia totogiina ma le faamaoni lana sefuluai ma ole atu i le Atua e faamanuia o ia i lenei siitaga, ae na te lei mauaina lenei faamanuiaga na matuai manao lava i ai. O la’u fautuaga mo lenei tuafafine sa tutusa lava ma lo’u faasoa atu nei ia te outou.

Ua ou aoaoina afai e folafola mai e le Alii ia i tatou le tele o faamanuiaga o le a le lava se avanoa e teu ai, o nisi taimi tatou te mafaufau ai o lona uiga o le a vave ona tatou maua oa faaletino, e pei o se sii o le totogi po o se siitaga i le galuega. Peitai, na saunoa Elder David A. Bednar o le Korama a Aposetolo e Toasefululua e faapea “a o tatou ola ai i le tulafono o le sefuluai, e masani ona tatou maua faamanuiaga taua ae maaleale ia e le o mea tatou te faamoemoeina i taimi uma ma e faigofie ona le amanaiaina.”¹

Iloaina o Faamanuiaga

E taua le ta’ua faapea o nei faamanuiaga e mafai ona faigofie ona faailoaina e ala i le Agaga Paia. Ia te au lava ia, ou te lagona le faamanuiaina ona sa i ai sa’u galuega mautu mo le tele o tausaga. Ou te lagona le faamanuiaina ona ua faatagaina au e le Alii, lou toalua, ma la’u fanau ia olioli i le soifua maloloina lelei. Ua Ia faamanuiaina a’u e aoao e pulea lo’u taimi ma a’u punaoa ma ia maua se aoaoga faaopoopo. Ua Ia fesoasoani ia te a’u e aoao e pulea a’u punaoa faaletino e faia faatele ai mea ua Ia tuuina mai ia te a’u.

Ua aoaoina au e le Agaga Paia e tatau ona ou faafetai mo nei mea uma. O lena mea, mo a’u lava ia, o le uiga lena o le tatalaina o pupuni o le lagi ma maua faamanuiaga seia silisili ona tele.

E Le Tuusaunoaina mai Tofotofoga

O le totogiina o le sefuluai e le tuusaunoaina ai i tatou mai tofotofoga, ae ua ou iloaina ua faamanuiaina au e le Alii i le malosi ma le poto ma ua saunia le ala ina ia mafai ona ou faatoilaloina taimi faigata.

A o pepe lo’u atalii matua, sa ou maua se valaau i lo’u ofisa. Sa i ai se tasi na osofaia lo’u fale. O lo’u popolega sili lava sa mo le manuia o lo’u toalua ma lo’u atalii. O le tele o a matou meatotino na aveina, e aofia ai o matou tusifolau ma visa, lea faatoa uma ona matou faagaoioia ina ia mafai ona auai i se kosi i fafo. E ui lava i mea na leiloloa, sa ou lagonaina le faamanuiaina tele ona sa lei i ai lo’u toalua ma lo’u atalii i le fale i le taimi na osofaia ai. O se faamanuiaga moni lava lena mea.

Sa tatalaina e le Alii pupuni o le lagi ma tuu tagata sa’o i lo matou ala o e sa mafai ona fesoasoani ia i matou e toe faagaoioia ia pepa o faamatalaga sa matou manaomia e auai ai i le kosi. Ma e ui lava i lagona faavauvau e mafai ona fatuina e se gaoi, sa matou mauaina ma lou aiga le faamanuiaga o le faamautinoaga faaleagaga o le a lelei mea uma.

I se taimi mulimuli ane, o le pisinisi sa ou faigaluega ai sa matuai aafia lava i se feteenaiga faaupufai i lo’u aai. Sa ou popole ona o mea uma sa ou fausia ma le galue malosi ma le ositaulaga o le a leiloloa. Ma sa tatala mai foi pupuni o le lagi. Faatasi ai ma le faatuatua, faapalepale, ma le galue malosi, na toe manuia ai le pisinisi.

“O mea a lena fafine mativa ua oti lana tane, ua lafo i le mea e teu ai tupe, ua sili ia ia i latou uma na lafo i ai:

“Aua … ua latou lafo nisi mea mai a latou mea ua tele; ao ia ua mativa ua ia lafo ana mea uma sa ia te ia.”

Mareko 12:43–44

O Tupe Iti a le Fafine ua Oti Lana Tane, saunia e James Tissot

Ma Le Manatu Tonu I Ai

I le Ekalesia a Iesu Keriso, tatou te matua faatauaina le natura paia o sefuluai ma taulaga. O le tulafono o le sefuluai e tofotofoina ai e mauoa ma e matitiva foi. Atonu e faapea mai e matitiva, “Ou te manaomia le sefulu pasene lenei ia ola ai.” Pe atonu foi e faapea mai le mauoa, “E tele tele le sefulu pasene.” Ae pe tatou te matitiva pe mauoa, ua poloaiina i tatou e le Alii e tuuina atu a tatou taulaga ma le faamoemoe atoa o le loto, ma le manatu moni i ai. E tusa lava po o le a le aofaiga o a tatou taulaga, e tatau ona avea o se sefuluai atoa. Manatua le tala i tupe iti a le fafine ua oti lana tane:

“Sa nofo Iesu e feagai ma le mea e teu ai tupe, ua silafia foi e ia le vao tagata o lafo tupe i le mea e teu ai tupe; e toatele foi o e mauoa, ua tele a latou ua lafo i ai.

“Ua alu ane foi le tasi fafine mativa ua oti lana tane, ua lafo ane ai tupe iti e lua, o le kotane e tasi ia.

“Ona valaau atu lea o ia i ona soo, ua fetalai atu ia te i latou, E moni, ou te fai atu ia te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai:

“Aua o i latou uma, ua latou lafo nisi mea mai a latou mea ua tele; ao ia ua mativa ua ia lafo ana mea uma sa ia te ia, o ana mea uma e ola ai” (Mareko 12:41−44).

Ou te molimau atu o le tulafono o le sefuluai o se faamanuiaga i lo’u olaga. E tatala moni lava e le Alii pupuni o le lagi ma sasaa mai faamanuiaga seia silisili ona tele. O nei faamanuiaga e le oo mai i taimi uma tatou te mananao ai, ae e manaomia ona tatou sailia le taitaiga a le Agaga ina ia mafai ai ona tatou iloa mea ua tuuina mai e lo tatou Tama Faalelagi ia i tatou. Ou te tatalo ia faamanuia outou e le Alii ina ia outou iloaina i o outou lava olaga ia faamanuiaga o le tulafono o le sefuluai.