“Pe o le a Ou Toe Vaai ea i Lo’u Tina?,” Liahona, Tes. 2022.
Ua Na‘o Tusiga Faaeletonika: Atatosi o le Faatuatua
Pe o le a Ou Toe Vaai ea i Lo’u Tina?
O lo’u aafiaga i le malumalu na faamamaina ai lo’u loto. I lena taimi, na aluese uma ai o’u tiga ma le ita.
Ata na pueina e Christina Smith
Ina ua tetea o’u matua, sa o lo’u tina ma lo’u tuagane e nonofo ma lo’u tinamatua. I se taimi puupuu mulimuli ane, sa ou fanau ai i Matagalpa, Nicaragua. E lua tausaga talu ona ou fanau, sa tigaina ai lo’u tina i le kanesa, sa ia fai atu i lo’u tama e tausi i ma’ua. Sa teena e ia.
O lena mea na ou matuai tiga ai lava. Peitai, ina ua maliu lo’u tina, sa amata ona sui lo’u tama ma asiasi mai ia i ma’ua. Ae sa leai so’u alofa mo ia. Sa ou ita ia te ia. I le ono tausaga talu ona maliu lo’u tina, sa maliu ai o ia i se faalavelave faafuasei tau-taavale.
Ona sa agaleaga lo’u tama i lo’u tina, sa ou maua ai se manatu leaga o le faaipoipoga. Ina ua 15 o’u tausaga, sa ou mafaufau mamafa e uiga i le avea ma se taupousa ina ia ou le faaipoipo ai. Ae sa ta’u mai e se tagata faigaluega ia te a’u: “E tele isi auala e auauna atu ai i le Atua. E mafai ona e faaipoipo i se tane lelei, ma e mafai e oulua uma ona auauna atu faatasi i le Atua. Ole atu ia te Ia e ta’u atu ia te oe po o fea le ala e ui ai.”
Sa ou mafaufau i ana upu i lena po i le taimi o la’u sifi po i le falemai. Soo se taimi lava e i ai ni o’u faafitauli po o ni luitau, ou te misia lava lo’u tina. A o ou iloiloina faamaumauga o le falemai, sa ou moe ma moemiti e uiga ia te ia.
I la’u miti, sa ou ulu atu i se lotu tuai ma nofo i lalo i le laina pito i luma. Ina ua ou faliu atu, sa ou vaai i lo’u tina. Na te lei fai maia se tala, ae sa i ai sana vaaiga faanoanoa i ona foliga ma talotalo mai ou te alu ese. Sa ou malamalama na te lei manao ou te avea ma se taupousa.
I le mavae ai o la’u miti, sa amata ona ma sueina ma le uso o lo’u tina se lotu fou e auai ai. Sa ma asiasi i ni nai lotu. Sa ou fiafia ia i latou uma, ae ou te lei lagonaina e sa’o i latou. Sa ma mananao i se lotu e mafai ona ma lagonaina ai le faatasi mai o le Atua.
A o ma asiasi atu i lotu eseese, sa ou fesili atu i o latou taitai i a’u “fesili tetele o le agaga.”1 Sa ou fesili atu, “Pe o le a ou toe vaai ea i lo’u tina? Pe o le a ia iloaina a’u o lana tama teine? Pe o le a ou iloaina o ia o lo’u tina?” O le toatele o i latou na fai mai ia te au o le a ou iloaina o ia e pei o so’u uso, ae le o lo’u tina. Ou te lei manatu e tonu lena mea.
E Tatau Ona E Faia Lau Vaega
Ina ua ou feiloai i faifeautalai mai Le Ekalesia a Iesu Keriso o le Au Paia o Aso e Gata Ai, na iu lava ina ou maua tali sa ou sailia.
“Pe o le a iloaina e lo’u tina a’u o le pepe teine e lua tausaga le matua, lea na leiloa ina ua maliu o ia?” Sa ou fesili atu ai ia i la’ua.
“Ioe,” na la tali mai ai, “ma o le a e iloaina o ia o lou tina.”
“Pe o le a mafai ea ona ou toe fusiina o ia?”
“Ioe,” sa la fai mai ai ia te au, “ae ina ia tupu lena mea, e tatau ona e faia lau vaega.”
“O le a le mea e manaomia ona ou faia?”
“Sei o ma aoaoina oe,” na la fai mai ai. “Ona manaomia lea ona e tatalo e uiga i mea e te aoaoina. Ma afai e te lagonaina e moni mea ma te aoao atu ia te oe, e tatau ona e papatiso.”
O lena lava aso sa la aoaoina ai foi au e uiga i le malumalu. Sa matou faia se talanoaga faapitoa tele. Sa ou iloa o mea sa la aoaoina ai au e moni. Sa papatisoina a’u, le uso o lo’u tina, o lana fanau e toalua ma faamauina i le lua masina mulimuli ane.
Ina ua uma ona papatisoina i matou, sa ou naunau ia faia galuega faalemalumalu a lo’u tina ae le o le galuega a lo’u tama. Peitai, sa faamalosiau mai faifeautalai ia te a’u.
“O se vaega o le faia o lau vaega,” na la fai mai ai. “O loo faatalitali mai foi lou tama mo oe ina ia faia ana galuega.”
“Sa ou tau atu ia i laua ou te le ano i ai. Sa ou faanoanoa pea ia te ia.
“Ua matou mauaina le talalelei,” na fai mai ai le uso o lo’u tina ia te au. “E tatau ona e faamagalo atu ia te ia ma faia lana galuega.”
Ma le musuā, sa ou taliaina la latou fautuaga. Ina ua mavae le tausaga talu ona ou papatiso, sa ou aveina atu igoa o ou matua i le Malumalu o le Aaai o Kuatemala i Kuatemala. O se aafiaga mamana, ma lofituina. Sa papatisoina a’u mo lo’u tina ma mo le toatele o isi tagata. Ona saunia lea o lo matou peresitene o le paranesi e papatiso mo lo’u tama. Ou te lei fia matamata, o lea na amata ai ona ou savali ese.
Ina ua uma ona ulufale atu le peresitene o le paranesi i le vaipapatiso, sa ou faalogoina le igoa o lou tama i le taimi o le sauniga. Mulimuli ane, sa ou lagonaina le faatasi mai o lou tama. O lena aafiaga na ou lagona ai le maasiasi ona o le le manao e fai lana galuega.
“Faamagalo mai ia te au le Tama Faalelagi,” sa ou tatalo ai a o amata ona ou tagi. “Sa ou manatu faapito.”
Ina ua ou toe foi atu i Nicaragua, sa ou alu i le fanuatanu lea sa tanu ai lo’u tama. Mo le taimi muamua, sa ou asiasi atu i lona tuugamau ma tuu ai fugalaau i luga. Sa ou fai atu ia te ia e faamagalo au, ma sa ou fai atu ia te ia ou te alofa ia te ia. Ona ou toe tagi ai lea.
O lo’u tama, e pei o lo’u tina, sa faatalitali mai mo a’u e ave lona igoa i le malumalu, lea na faatagaina ai a’u e le Tama Faalelagi ia maua se aafiaga matagofie. O lena aafiaga na faamamaina ai lo’u loto. I lena taimi, o le tiga ma le ita uma sa ou lagonaina na alu ese atu atu ma au.
Mo lena mea ua ou lotofaafetai ai e faavavau.
Magdalena o loo gaugau tagamea ma lana fanau
O Magdalena ma lona toalua o loo tootutuli faatasi i le tatalo