Avea ma e Anaana i le Upu

Saunia e le Au Peresitene Aoao o le Aoga Sa

Au Peresitene Aoao o le Aoga Sa

O se tasi o aoaoga taua o le talalelei o le, e le gata ina tatau ona tatou aoaoina le upumoni; e tatau foi ona tatou ola i le upumoni. Ona e taua tele le faaaoga o mea ua tatou aoaoina, sa talosagaina ai e le Liahona le Au Peresitene Aoao o le Aoga Sa e fesoasoani ia i tatou ia malamalama pe mafai faapefea ona avea i tatou ma “e anaana i le upu, ae aua le na ona faalogologo i ai” (Iakopo 1:22).

Aisea e taua tele ai le faaaoga o mea ua tatou aoaoina?

Brother Milton Camargo, Fesoasoani Muamua: Na saunoa mai Elder David A. Bednar o le Korama a Aposetolo e Toasefululua: “O le iloaina e ala i le mana o le Agaga Paia o Iesu o le Keriso e taua ma e tatau ai. Ae o le o mai faamaoni ia te Ia, ma tuuina atu o tatou agaga atoa e fai ma taulaga, e manaomia ai le tele o isi mea nai lo le na o le iloa. O le liua e manaomia ai o tatou loto atoa, o lo tatou malosi atoa, ma o tatou mafaufau ma le malosi atoa.”¹

I se isi faaupuga, e mafai ma e tatau ona tatou suesue i tusitusiga paia, lauga o konafesi aoao, ma anomea a le Ekalesia, ma suesue soo i ai. Ae sei vagana ua tatou faaaogaina mea na aoao mai e le Faaola, o le tau lava o le iloaina o mea na Ia aoao mai o le a le suia ai i tatou.

tamaitai o loo tagofia le faamanatuga

O le a se mea e mafai ona fesoasoani ia i tatou e faatino ai mea ua tatou aoaoina?

Peresitene Mark L. Pace: E uunaia i tatou e le Agaga e faatino, ma o le auala sili e mafai ai ona avea i tatou ma e anaana i le upu o le maua lea o le Agaga e faatasi ma i tatou.² O se tasi lena o mafuaaga tatou te aai ai i le faamanatuga i vaiaso taitasi. Tatou te molimau tatou te loto ina ia ave i o tatou luga le suafa o Iesu Keriso ma manatua pea o Ia ma tausi i Ana poloaiga. O valaau na e faatino. Ma a o tatou faia na mea, o le faamanuiaga tatou te maua o le maua pea o Lona Agaga e faatasi ma i tatou.³

E fesoasoani le faamanatuga ia i tatou e ola ai i le aoaoga faavae a Keriso. E fesoasoani ia i tatou e faateleina lo tatou faatuatua ia te Ia. Na te uunaia i tatou ia salamo, o se valaau lea e faatino. E uunaia ai i tatou e taumafai ia sili atu ona lelei e ala i le manatuaina o Ia i le aluga o le vaiaso. Ma o se tasi o matafaioi a le Agaga Paia o le “faaali atu ia te outou o mea uma e tatau ona outou faia.”⁴

A o tatou auai i tapuaiga ma aoaoga i Aso Sa, e mafai faapefea ona tatou see atu mai le faalogo i le upu faaperofeta i le faia o le mea o loo uunaia i tatou e le Agaga e fai?

Uso Camargo: E taua mo tagata le o mai saunia i le Aso Sa e talanoaina mea na aoao atu e le Agaga Paia ia i latou i le aluga o le vaiaso. O se auala matagofie lena e auai ai i talanoaga i le Aoga Sa, korama a le au perisitua, ma le Aualofa.

Peresitene Pace: O i latou o e aoao atu i le Aso Sa e ono fesili ifo ia i latou lava, “O le a se mea e mafai ona ou faia i la’u aoaoga lea e faaauai ai le tagata faalogologo e le gata o se tagata aoao ae faapea foi o se e anaana i le upu? E faapefea ona ou valaaulia tagata o lau vasega po o le korama ia filiga atili i lo latou aoaoina e faatotonugalemu-i-le-aiga, ina ia mafai ona latou auai ma le mataalia atili i le vaega e lagolagoina e le Ekalesia o le suesueina o le talalelei?” O se vaega lena o le faia—mo tagata taitoatasi ia a latou lava liliuga ma galueaiina lo latou lava faaolataga.

talavou i se vasega a le Ekalesia

Uso Jan E. Newman, Fesoasoani Lua: Ma atonu e lelei le faia e faiaoga o talanoaga i le faapea atu, “Ou te fia faalogo i se faamatalaga e 10-sekone o mea ua e aoaoina po o mea e finagalo le Alii e te faia i mea sa tatou talanoaina i lenei vaiaso.” O lena mea o le a faamalosia ai le valaaulia e faatino: “O le a le mea o loo valaaulia oe e le Alii e fai i lenei vaiaso, e faavae i le aafiaga na tatou maua faatasi i le suesueina o tusitusiga paia?”

Peresitene Pace: O se tasi o mafuaaga tatou te tapuai faatasi ai i Aso Sa ina ia mafai ai ona tatou fefaamalosi i le tasi ma le isi. E le o au o se tagata pese maoae. Pe a ou pese i le aufaipese, ou te nofo i autafa o se tasi e iloa le ala e pese ai, ma e fesoasoani lena ia te au e pese lelei atili ai. E tutusa lava ma le ola ai i le talalelei. O le faatasi ai ma tagata o e ola lelei i le talalelei e fesoasoani ai i isi tagata uma ia sili atu foi lo tatou ola i le talalelei.

I le aluga o le vaiaso, e mafai faapefea ona tatou faaaogaina mea ua tatou aoaoina mai la tatou suesuega o le Sau, Mulimuli Mai ia te A’u?

Uso Camargo: E masani lava pe a uma ona tatou faitau pe faalogo, tatou te tautino atu e faia se mea. Ae i se aso pe lua mulimuli ane, e galo ia i tatou. O le mafuaaga lena e taua ai le tusi i lalo o uunaiga tatou te lagonaina ma tautinoga tatou te faia, ina ia mafai ona tatou manatuaina i le aluga o le vaiaso. O loo i ai se mana maoae i upu, “Ia manatua, ia manatua.”⁵

Uso Newman: E pei o le Faaola, e mafai ona tatou faia mea lelei. A o e mulimuli i Lana faataitaiga o le auauna atu, o le a avea ma se vaega o lou tagata. Sa ou maua se faataitaiga atoatoa o lena mea i le lotu i se tasi Aso Sa. Sa ou i ai na o a’u iina ona sa ma’i lo’u toalua. A o ou nofo i lalo, sa fai mai le tagata sa i ou tua, “O fea lau avā?” Sa ou fai atu, “E le o malosi lelei.” Sa ia fai mai, “E mafai ona matou aumaia ia te oe se meaai o le afiafi i le po nei?” Sa ou fai atu, “Aua le popole. O loo lelei mea uma.” Sa ia fai mai, “O le a matou aumaia la se meaai taeao.” Ma sa latou aumai ia i matou se taumafataga o le afiafi.

E aunoa ma se uunaiga, sa faia e nei tuaoi se mea lelei, aua o i latou lava na. Pe a avea i tatou ma soo o Keriso ma tatou vaai i se tasi o manaomia le fesoasoani, tatou te le faapea atu, “Ia, atonu o loo lelei mea uma.” Tatou te faia mea tatou te mafaia e fesoasoani ai.

Peresitene Pace: Po o fea lava o tatou i ai—mo se faataitaiga, o le tietie atu i le galuega po o le aoga—e mafai ona tatou mafaufau e uiga i le Faaola. Ae o le avea ma se e anaana i le upu o lona uiga e tatau ona tatou faia ni mea e sili atu nai lo na o le mafaufau e uiga ia te Ia. O nisi nei o mea patino e mafai ona e faia e faaaoga ai mea e te aoaoina i suesuega faaletagata lava ia, aiga, ma le Aso Sa:

1. Tuu atu i folafolaga i tatalo o le faamanatuga e uunaia oe e faatino.

2. E ala i le tatalo, suesue, ma le usiusitai, valaaulia le Agaga e taiala oe.

3. Faatatauina o tusitusiga paia ia te oe lava.⁶ I au suesuega faaletagata lava ia po o suesuega faaleaiga, fesili ifo ia te oe lava, “O i ai se mea i lenei mau e mafai ona fesoasoani ia te au e iloa ai le mea e fai?”

4. A o e faalogologo i perofeta ma aposetolo, fesili ifo, “O le a se mea e tatau ona ou faia i mea ua ou aoaoina?” Ia gauai faapitoa atu i soo se valaauga e faatino e te lagona pe faalogo i ai.

5. Tusi ni faamatalaga e uiga i ou lagona ma uunaiga ina ia mafai ona e tulitataoina.

6. Faatino mea na aoaoina ai oe. Tatalo mo le taitaiga. Ona, pei ona fai mai Nifae, “alu ma fai”.⁷

7. Alofa i lou tuaoi. O lou tuaoi o soo se tasi e siomia oe o loo manaomia le fesoasoani.

Uso Camargo: E tele atu isi mea i le mau o loo uunaia ai i tatou ia avea ma e anaana ae le o e faalogo. O loo faaauau pea:

“Aua ai se tasi e faalogologo i le upu, a e le anaana i ai, e tusa ia ma le tagata ua vaavaai i le faaata i ona lava mata na fanau ma ia:

“Aua e vaavaai o ia ia te ia, ona alu ese lea, ua galo loa le uiga o ona mata.

”A o le e matua matamata i le tulafono o le saolotoga ua aotoatoa ona lelei, ma ua tumau i ai o ia, e le se faalogologo ma le faagalogalo lena tagata, a o le anaana i le galuega, e manuia o ia i lona lava anaana.”⁸

Peresitene Pace: Oka se faamanatu maoae afai e avea i tatou ma e anaana, o le a faamanuiaina i tatou e ala i le ola ai i le talalelei!

Auala e Avea ai ma lē Anaana

• Fesili ifo ia te oe lava, “O le a se mea e finagalo le Faaola ou te faia?”

• Tatalo mo le taitaiga ma musumusuga ia iloa ai pe faapefea ona faaaoga aoaoga o le talalelei.

• A oo mai mafaufauga ma lagona, tausi se talafaamaumau o na mea. O lenei mea e faaalia ai lou faatauaina o musumusuga e tuuina mai e le Alii ia te oe ma fesoasoani ia te oe e manatua ai.

• Ia faatino i luga o uunaiga e te maua.

• Ia faia pea mea lelei, i lea taimi ma lea taimi. O lenei mea e fausia ai uiga faaKeriso i totonu ia te oe.

Faamatalaga

1. David A. Bednar, “Faaliliuina i le Alii,,” Liahona, Nov. 2012, 107. Tagai foi Mataupu Faavae ma Feagaiga 4:2.

2. Tagai i le Mataupu Faavae ma Feagaiga 20:77.

3. Tagai Mataupu Faavae ma Feagaiga 20:77, 79; Moronae 4:3; 5:2.

4. 2 Nifae 32:5.

5. Helamana 5:12.

6. Mo nisi fautuaga e uiga i le ala e mafai ai e le suesueina o tusitusiga paia ona taitai atu i le faatinoga, tagai i le Sau Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022, x-xiv.

7. 1 Nifae 3:7.

8. Iakopo 1:23–25.