“O Le Mesia Folafolaina,” Liahona, Tes. 2022.
O le Mesia Folafolaina
Mai le taimi o Atamu, ua valaauina e le Atua Ana auauna e molimau atu i le afio mai o se Mesia o le o le a ofoina mai le alofa, faamoemoe, ma le olioli.
Faauta i le Tamai Mamoe a le Atua, saunia e Walter Rane
E le o se mea e ofo ai i le soifua mai o Iesu i Peteleema, sa faaali mai agelu ma alalaga, “O le viiga i le Atua i mea aupitoaluga” (Luka 2:14). Sa latou fiafia i le iloaina o lenei tama meamea o le a tatalaina le faitotoa i le tino ola pea ma le ola e faavavau. Ma sa matua talafeagai lelei le i ai o se fetu e faamalamalamaina le lagi e viia ai le ulufale mai i le olaga faitino o le Alo e Toatasi o le Atua Silisiliese.
Sa molimau mai perofeta mo le afe tausaga o le soifua mai o se Mesia folafolaina, o se tasi o le a “togiolaina i latou uma o e e talitonu i lona suafa” (Helamana 14:2).
Na vavalo Isaia, “O le mea lea e tuuina mai ai e le Alii lava le faailoga ia te outou; Faauta, e to le taupou, ma fanau mai se tama tane, na te faaigoa foi ia te ia o Emanuelu” (Isaia 7:14).
Sa folafola mai e Mika, “Ae o oe, Peteleema Efarata, e ui ina itiiti oe i le afe ma afe o Iuta, ae e tupu mai ia te oe mo au o le na te fai ma faipule ia Isaraelu; o lona tupu mai talu mai anamua lea, talu mai ona po o le vavau lava” (Mika 5:2).
Na vaai Nifae i se taupou “ua sapasapaia e ia se tamameamea i ona lima” ma sa ta’u atu e se agelu o “le Tamai Mamoe a le Atua, ioe, o le Alo lava lea o le Tama Faavavau!” (1 Nifae 11:20, 21).
Pe a ou faitau i folafolaga faaperofeta o Lona soifua mai—aemaise lava i le vaitau o le Kerisimasi—ou te lagonaina le toe molimau mai o le Agaga Paia o Iesu Keriso o le Mesia. A o ou suesue i afioga a le Faaola ma Lona soifuaga, ou te iloa o Ia ma alofa ia te Ia mo mea ua Ia faia mo i tatou taitoatasi. O le agaga o le alofa o le agaga o le Kerisimasi.
“Aua ua faapea lava ona alofa mai o le Atua i le lalolagi, ua Ia au mai ai lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16).
O le meaalofa o le Alo o le Atua o se meaalofa e le mafaatauina. O Ia o le meaalofa e faamalamalamaina lo tatou ala ma siitia i tatou. O Ia o le meaalofa e lagolagoina i tatou i aso faigata o la tatou malaga i le olaga nei. O Ia o le meaalofa e ofoina mai le alofa paia, faamoemoe tumau, ma le olioli moni.
Alofa Paia
Pe a tatou mafaufau i le telē o le foafoaga na faia e Ieova i lalo o le taitaiga a Lona Tama Faalelagi, e masani ona tatou taumanatunatu i Lona mana ma lagona le fia tapuai ia te Ia. Ua ia faamalumalu i luga a’e o i tatou. Ae, o mea na tutupu o loo siomia ai Lona soifua mai faatauvaa i le olaga nei ua tupuga mai ai se lagona o le alofa lofituina.
Semanu e mafai ona soifua mai Iesu i soo se tulaga na filifilia e le Tama. I le faataunuuina o le valoaga a Mika (tagai Mika 5:2), na soifua mai ai Iesu i se nuu laitiiti i le itu maugā o Iutaia. Sa faafeiloaia o Ia e leoleo mamoe lotomaualalalo. Sa mulimuli le au makoi i se fetu e tapuai ia te Ia. Sa fefefe taitai faaupufai ia te Ia. Sa tatau ona sosola ona matua i se atunuu ese e laveai ai o Ia.
Ina ua saogalemu le toe foi mai, sa faasino atu Maria ma Iosefa i se nuu faatauvaa i atumauga o Kalilaia. Na toeitiiti atoa le 30 tausaga o i ai Iesu iina a o lei amataina Lana auaunaga lautele o le alofa.
Sa filifili Iesu Keriso e afio mai i lalo mai Lona nofoalii i le lima taumatau o le Tamā e ave i Ona luga le olaga faaletino. Sa Ia faia ona o le alofa mo atalii ma afafine agaga uma a Lona Tama o e o le a fananau mai i le lalolagi, e aofia ai oe ma au.
I le taimi o Lana galuega, e lei faaesea e Iesu le mauoa ma le mativa, tane ma le fafine, talavou ma matutua, soifua maloloina ma vaivai. Na te le’i faaleamanaiaina i latou e ese o latou faatuatuaga po o i latou e ese o latou talaaga faaleaganuu. Sa alofa o Ia i tagata uma. E alofa o Ia i tagata uma.
“Ua tatou alolofa ia te ia, aua na ia muai alofa mai ia te i tatou” (1 Ioane 4:19). Ma sa Ia poloai mai, “Ia outou fealofani; faapei ona ou alofa atu ia te outou” (Ioane 15:12).
Faamoemoe o le Lalolagi
Ua augani mai se pese lauiloa o le Kerisimasi , “E, afio mai, Emanuelu e, ma laveai Isaraelu faatagataotaua.”1
Atonu tatou te le faatagataotauaina i Aikupito po o Papelonia, e pei o Isaraelu anamua, ae peitai o loo tatou faatagataotauaina lava—ua faatagataotauaina i le agasala ma le oti. Ma e pei foi o Isaraelu anamua, tatou te faamoemoe mo le laveaiina. O le soifua mai o se “Faaola, o le Alii ia o Keriso” (Luka 2:11) na folasia mai ai le faataunuuga o lena faamoemoe. O le mafuaaga lena tatou te pepese ai ia Peteleema, “O tausaga o faamoemoe taulau ia te oe.”2
O le soifua mai, soifuaga, Faasatauroga, ma le Toetu o Iesu Keriso o loo i ai le “tala lelei” (Luka 2:10) o le faamalologa, saolotoga, ma le laveaiina.
I le talanoa ai faamesia, na faapea mai ai Isaia, “Ua i ou luga le Agaga o le Alii o Ieova; aua ua faauuina au e Ieova e talai le tala lelei i e ua tigaina, ua ia auina mai au e fufusi i e loto momomo, e talai le saolotoga i le tafeaga, ma le matua tatalaina o e ua fusifusia,” (Isaia 61:1; faaopoopo le faamamafa).
Tou te manatua a o Ia amataina Lana galuega i le lalolagi, sa faitau e Iesu Keriso na upu i se sunako i Nasareta. Ona Ia fetalai atu lea, “O le aso nei ua taunuu ai lenei tusi o outou o faalogologo ai” (Luka 4:21).
Ona o le tamaitiiti o Keriso na avea ma Mesia o le na faalauteleina Lana galuega ma le misiona e ala i le faia o le finagalo o le Tama, ua Ia laveaiina ai i tatou mai le oti faaleagaga ma le faaletino.
“O Ia o le Tupu silisili o Emanuelu, o loo afio i le taimi nei i le itu taumatau o Lona Tama. O Ia o le malamalama, o le ola, ma le faamoemoe o le lalolagi. O Lona ala o le auala e taitai atu i le fiafia i lenei olaga ma le ola e faavavau i le olaga a sau.”3
Keriso i Ketesemane, saunia e Harry Anderson
Olioli i le Alii
O le pepe sa i le fale povi o le Alo o le Atua, na auina mai o se meaalofa e le Tama e avea ma o tatou Faaola. E ala i le olioli tatou te lagonaina ona o Lona afio mai, e mafai ai ona faamamaina a tatou avega (tagai Alema 33:23). Ona o le pepe o Peteleema o le e laveaiina i tatou mai le agasala ma le oti e mafai foi ona laveaiina i tatou mai le faanoanoa, masalosalo, fefe, ma le tiga.
Tou te manatua upu na aoao mai e Iakopo e uiga i le afio mai o le Paia e Toatasi o Isaraelu:
“E, le silisiliese naʼuā o le paia o lo tatou Atua! Ona ua silafia e ia mea uma, ma ua leai se mea ua lē silafia e ia.
“Ma e afio mai o ia i le lalolagi ina ia mafai ona faaolaina e ia tagata uma, pe afai latou te faalogologo i lona siufofoga; aua faauta, e mafatia o ia i tiga o tagata uma, ioe, o tiga o tagata ola uma, o tane, o fafine, ma tamaiti, o e ua i ai i le aiga o Atamu.
“Ma e mafatia o ia i lenei mea ina ia mafai ona oo mai le toetu i tagata uma, ina ia mafai e tagata uma ona tutu i ona luma i lena aso tele o le faamasinoga tele.”(2 Nifae 9:20–22).
Ina ia maua le agaga o le Kerisimasi, e le gata ina tatou faitau i Ana afioga ma suesue i Lona soifuaga ae ia faatino foi mea ua tatou aoaoina. E aofia ai le fafagaina o mamoe a le Faaola e ala i le faapotopotoina o i latou i Lana lafu. Tatou te faapotopoto a o tatou faasoa atu le olioli tatou te lagonaina ona o Lona soifua mai ma ona o le Toefuataiga o Lana talalelei. Afai tatou te i ai i luga o le ala ua mamanuina e le Alii mo i tatou, o le a tatou maua Lona malamalama e faaali atu ai i isi le ala ia te Ia.
E mafai ona faigata le olaga, ma e mafai e taimi faigata ona faamatauina lo tatou faatuatua. Pe a tatou fetaiai ma tofotofoga ma faalavelave, atonu tatou te mafaufau pe o lo tatou faatuatua i le Alo o le Atua o se faamoemoe le aoga. Ae o tofotofoga ua mamanuina e faalatalata atu ai i tatou i le Faaola ina ia mafai ai e Ia ona faia i tatou ia sili atu ona mafai ona siitia isi ia te Ia. A o tatou faasoa atu le “lototetele” (3 Nifae 1:13) o Lona afio mai, tatou te sii ae ulu ma faamaluluina loto. Ou te folafola atu o le a oo mai le aso, pe afai e lei oo mai, pe a faamautuina lou faatuatua i Lona afio mai. O le a avea lena ma se aso fiafia.
O le Kerisimasi o se taimi o le alofa, faamoemoe, ma le olioli. O se taimi foi o le lotofaafetai ma manatunatuga. I le taimi o le Kerisimasi tatou te faia ai ni manatuaga fou ma toe faaolaola ai mea tuai. Ua tatou misia aiga ma uo o e ua mavae atu. Tatou te taumanatunatu po o fea ua mavae atu ai tausaga ma mea o le a aumaia e le tausaga fou. Ma i le lotolotoi o o tatou mafaufauga, tatou te avatu ai le lotofaafetai i le Atua mo le meaalofa mamalu “e igoa foi o ia o le Silisili ese, o le Faipule, o le Atua malosi, O le Tama o le faavavau, O le Alii o le Filemu” (Isaia 9:6).
Tau ina ia faatumulia lou loto i le agaga o lena meaalofa o le Kerisimasi i lenei vaitau ma i le tausaga a sau.