“E Mafai Ona Tatou Maua Auala i Aso Uma e Alolofa Ai, Faasoa Atu, ma Valaaulia,” Liahona, Tes. 2022.
Mataupu Faavae o le Auaunaga
E Mafai Ona Tatou Maua Auala i Aso Uma e Alolofa Ai, Faasoa Atu, ma Valaaulia
O le auaunaga e mafai ona avea ma se vaega o le tagata ua avea ai i tatou, ae le na o le toe tasi le mea e fai.
O Carl (ua suia igoa) na tofia talu ai nei e auauna atu ia Gus. I le taumafai ai e sue ni mea masani, sa iloa ai e Carl sa tutusa mea la te fiafia i ai ma Gus i le tusitusi. O lea na valaaulia ai o ia e Carl e alu i le fonotaga a se vaega a tusitala i le lotoifale. I le faaiuga, e leai se tasi o i laua na i ai se taimi mo le vaega, ae o le valaaulia na taitai atu ai i se talanoaga maoae, lea na taitai atu ai i le o faatasi i le taumafataga o le aoauli i nai vaiaso taitasi—lea na fesoasoani e fausia se faigauo e mafai ona faalagolago i ai Gus i se taimi mulimuli ane sa ia manaomia ai se fesoasoani.
Ina ua faia le auaunaga, na vaavaai ai Carl ma lona faletua, o Julie, mo se paleni i le va o auaunaga aloaia ma le le amanaia. E i ai taimi o le a la fuafuaina ai ma le agaga tatalo se mea ua faamoemoe e lagolago ai le alualu i luma o isi i luga o le ala o feagaiga. Ae sa la taumafai foi e avea le auaunaga o se vaega masani ma faalenatura o o latou olaga i aso uma.
Ina ua talia e Julie se tofiga e faaalu se taeao e auauna atu ai i se fale e faagaoioia ai meaai a le Ekalesia, sa tonu ia te ia e valaaulia Shawna la te o. Sa na o ni nai taimi na sau ai Shawna i le lotu i le tele o tausaga talu ona siitia atu o ia i le pitonuu. Sa maua e Julie ma Shawna se taimi maoae e auauna faatasi ai i le fale gaosi meaai. E lei leva, ae fuafua e Julie ma Carl se po taalo mo le afiafi faaleaiga. Sa tonu ia i laua e valaaulia le aiga o Shawna e faatasi ma i latou. Talu ai sa mafaufau Julie e faaaofia ia Shawna i nei gaoioiga ua uma ona ia fuafuaina, o lea na atiae ai e le toalua lea se sootaga e loloto atu. Mulimuli ane, ina ua feagai Shawna ma ni luitau, sa ia aapa atu i le toalua o Julie, o Carl, mo se faamanuiaga faaleperisitua.
O auaunaga anoa e mafai ona tupu pe a tatou maua ni auala faigofie e faaali atu ai lo tatou alofa, faasoa atu lo tatou faatuatua ia Iesu Keriso, ma valaaulia isi e o mai ia te Ia ma auai faatasi ma i tatou—e oo lava i mea o le a tatou faia pea.
Ata na pueina e Monica Georgina Alvarado Zarate
O Se Vaega o lo Tatou Ola Ai i Aso Uma
Sa fesoasoani le perofeta o Sakaria i lona nuu e saili auala i aso uma e faaaoga ai mafaufauga e uiga i le Alii i o latou olaga. I lalo o lana taitaiga, sa tusia ai e tagata ia upu “E Paia i le Alii” i mea o le a latou vaaia i le gasologa masani o o latou aso, e pei o pesini ma logo o solofanua, e faamanatu ai ia i latou e mafaufau ia te Ia (tagai Sakaria 14:20–21).
Ua fautuaina foi i tatou e perofeta i aso nei ia saili ni auala masani e faatumauina ai le Atua i o tatou olaga ma ia alolofa, faasoa atu, ma valaaulia i le mamanu masani lava e tasi. O le tele o le toafimalie ma faalenatura e mafai ona oo i ai a tatou valaaulia alofa, o le faateleina foi lena o lo tatou toafimalie i le tuuina atu o lo tatou alofa ma valaaulia, ma o le tele foi lena o le toafimalie o isi e taliaina.
Mataupu Faavae e Mafaufau i Ai
O le auauna atu o se mea e mafai ona manuia mai le fuafuaina ma le agaga tatalo. A oo ina avea ma se vaega o tagata ua avea ai i tatou, o le auaunaga e mafai foi ona faigofie e pei o le mafaufau e faaaofia ai isi i mea atonu ua uma ona tatou faia. Mo se faataitaiga:
-
Ua uma ona saunia lau telefoni e auina atu savali i se uo. Faaalu le 10 sekone e siaki ai se tasi e te auauna atu i ai.
-
Na iu ina e kukaina nisi meaai nai lo le mea na e fuafuaina. Tuuina atu nisi i se tasi atonu e manaomiaina.
-
Sa e fiafia i se mea i lau suesuega o tusitusiga paia i lenei taeao. Faasoa atu i se uo.
-
O le a o lou aiga i se paka mo le po faaleaiga. Valaaulia ou tuaoi tou te o faatasi.
-
Sa valaaulia oe e lauga i le sauniga faamanatuga. Valaaulia se tagata faigaluega e sau e faalogo ia te oe.
O Le a Se Mea e Mafai ona Tatou Faia?
E mafai faapefea ona e faaaogaina se mea o loo e faia i lenei vaiaso e aapa atu ai ma faaaofia ai isi?