ITUKUTUKU NI VEILIUTAKI NI IWASEWASE

VBV E Rawa ni kena ibalebale na iVolatara Bula ni Valetabu

Mai vei Elder Allistair Bruce Odgers

iWasewase 70

Na vakanamata vei Karisito ka yaco me vakataki Koya e bibi ki na noda tubu vakayalo. Na vakayagataka na sakaramede kei na sokalou e valetabu sai koya e rua na sala meda vakanamata kina ki vei Koya. Na veiyalayalati eda cakava ni da vakayagataka na sakaramede kei na veiyalayalati eda cakava ena valetabu, erua na sala bibi meda vakaraitaka kina na noda lomana kei na noda vakanamata vua na iVakabula.

Ni kua au gadreva meu wasea na kena tabu kei na kena kaukauwa na valetabu e noda bula. DND e kena ibalebale na Digitaka na Dodonu, kei na VBV na iVolatara Bula ni Valetabu. Na veisureti vei keda kece mai na yabaki 11, sai koya me tiko edua noda ivolatara bula ni valetabu.

Na cava e bibi kina vei keda kece me tiko edua noda ivolatara bula ni valetabu? Eda vakaraitaka tiko vua na Turaga ni da sa lakova tiko ka na tikoga ena salatu ni veiyalayalati.

O Peresitedi Russell M. Nelson a kaya vakaoqo ena Koniferedi Raraba ni 2022 me baleta na veiyalayalati:

“Na kaukauwa vakalomalagi e isau ni maroroi veiyalayalati vata kei na Kalou—na kaukauwa me vaqaqacotaki keda meda tusaqata vakavinaka cake na veivakatovolei, veitemaki, kei na rarawa ni lomada. Na kaukauwa oqo e vakarawarawataka noda sala. O ira era bulataka na lawa cecere i Karisito era rawa ni rawata na Nona kaukauwa e cecere cake. O koya gona, edua na mataqali vakacegu vakasakiti e dau nodra na maroroi veiyalayalati, ka soli vei ira ena vuku ni nodra veiwekani ena veiyalayalati kei na Kalou.”¹

O na taroga beka se cava o ira na veiyalayalati oya? Ena iVoladusidusi Raraba e ruku ni ulutaga, Na Edaumeni, e tukuni kina vakaoqo:

“Ena edaumeni, era sa sureti kina na lewenilotu me ra vakayacora na veiyalayalati tabu me ra:

“Bulataka na lawa ni talairawarawa ka saga vakaidina me ra muria na ivakaro ni Tamada Vakalomalagi.
“Talairawarawa ki na lawa ni solibula, sa kena ibalebale na solibula me tokona na cakacaka ni Turaga ka veivutuni ena yalo raramusumusu kei na yalo bibivoro.
“Talairawarawa ki na lawa ni kosipeli i Jisu Karisito, ka sa lawa cecere cake ni a vakatavulica o Koya ni se tiko vuravura.
“Maroroya na lawa ni tiko savasava, ka kena ibalebale me veiyacovi ga edua na lewenilotu kei koya na tamata sa vakatarai ka vakadonui vakalawa vua me vakamautaka me vaka na lawa ni Kalou.
“Maroroya na lawa ni solibula, ka kena ibalebale me ra solia na lewenilotu na nodra gauna, taledi, kei na veika kece e sa vakalougatataki ira kina na Turaga me ra tara cake kina na Lotu i Jisu Karisito e vuravura.”²

E tiko na veivakalougatataki cecere ka talei ka waraki ira tu era curu ki na vale ni Turaga savasava.

O Elder Dale G. Renlund mai na Kuoramu ni Apositolo Le Tinikarua e wasea eso na veivakalougatataki talei ka rawa ni noda ni da vakaogai keda ena cakacaka ni veivakabulai me baleti ira noda qase e liu:

Vakalevutaki ni veivuke me vakavinakataka na loma e veilecayaki, kavoro se nuiqawaqawa;
Vagalalataki mai na bula galili;
E vakalevutaki cake na nodra lomani na tani, ka vakauasivi vei ira na lewe ni matavuvale era bula tiko kei ira sa mate;
Na kaukauwa meda kila;
Na veivakayarayarataki ni Yalo Tabu e levu cake me vakilai na veidusimaki ena noda bula;
E vakalevutaki cake na kaukauwa me veivutuni kei na tataqomaki mai na veitemaki;
Na vakavinakataki kei na vakasavasavataki, ni dui yaloda;
E vakalevutaka na veivakalougatataki ni vuvale, se cava ga nai tuvaki eda sotava tiko oqo, ena gauna sa oti, se na veigauna se bera mai se na kena sega ni se taucoko sara na noda vunikau ni vuvale;
Na saumaki titobu ka dei vua na iVakabula ena kena vakalevutaki na vakabauti Koya kei na kilai vakavinaka ni Nona Veisorovaki;
E vakalevutaki cake na reki ena torocake ni kena rawa ni vakilai ni loloma ni Turaga;³

Na itinitini ni vosa nei Peresitedi Nelson ena Koniferedi Raraba ni 2022; ka kena ulutaga na “Vakanamata ki na Valetabu”.⁴

Ena i Vakatakila 7 tikina e 13–17 e kaya:

“Sa qai vosa edua na qase ka tarogi au, O cei beka ko ira oqo sa vakaisulu ena isulu vulavula? Ka ra lako beka maivei?

“Au sa qai kaya vua, O iko, saka, ko sa kila. A sa kaya vei au ko koya, O ira oqo era sa lako mai na veivakararawataki levu, ia era sa sava nodra isulu, ka vakavulavulataka ena dra ni Lami.

“O koya era sa tiko kina ena mata ni itikotiko ni Kalou, a ra sa qaravi koya ena siga kei na bogi e nona vale-ni-lotu; ia ena tiko vata kei ira ko koya sa tiko ena itikotiko-vakaturaga.

“Era na sega tale ni viakana, se via gunu tale; ena sega ni kati ira na siga, se duatani na katakata.

“Ni na vakani ira na Lami sa tiko ena loma ni tikotiko-vakaturaga, ka na tuberi ira ki nai vurevure ni wai bula: ia ena tavoya kecega na Kalou na wai ni mata mai na matadra.”

Mai na vosa nei Peresitedi Nelson, me da qai “Kunea na vakacegu mai na raravisa, veilecayaki, kei na rarawa ni vuravura oqo ena kena vakamalumalumutaki na vuravura oqo ena nomuni veiyalayalati vata kei na Kalou.”⁵