Aua Lava Ne’i Lafoaia se Avanoa e Molimau atu ai e Uiga ia Keriso
O loo taoto le olioli moni i lo tatou naunautai ia latalata atili ia Keriso ma molimau ai mo i tatou lava.
Lima tausaga talu ai i le asō, na sii ai o tatou lima e lagolago lo tatou perofeta pele, o Peresitene Russell M. Nelson, o le Peresitene o Le Ekalesia a Iesu Keriso o le Au Paia o Aso e Gata Ai―o le fofogatulei o le Alii mo lenei vaitau ofoofogia o le faatupula’ia ma faaaliga. E ala mai ia te ia, ua tatou maua ai valaaulia e le mafaitaulia ma ua folafola mai ai faamanuiaga mamalu pe afai tatou te faatotonugalemuina o tatou olaga i lo tatou Faaola, o Iesu Keriso.
I le 2011, a o ma galulue ma lo’u toalua o ni taitai misiona i Critiba, Pasila matagofie, sa tatagi la’u telefoni i le taimi o se fonotaga. I le faanatinati ai e faaleo lemu, sa ou vaaia o le valaau sa mai lo’u tamā. Sa vave ona ou tuua le fonotaga e tali: “Malo, Tama!”
Sa le’i faamoemoeina, ae sa tumu lona leo i le ootia: “Malo Bonnie. E i ai se mea ou te fia ta’u atu ia te oe. Ua maua a’u i le ALS.” [faama’i o neura e afaina ai le fai’ai ma le maea alio].
Sa feosofai solo lo’u mafaufau i le le mautonu, “Faatali! O le a le ALS?”
Ua uma ona faamatala mai e Tama, “O le a ala pea lo’u mafaufau a o faasolosolo malie ona mate lo’u tino.”
Sa ou lagonaina le suia atoa o lo’u lalolagi ao ou taumafai e tauivi ma taunuuga o lenei tala faavauvau. Ae i lena aso e le mafaagaloina, o lana fuaiupu mulimuli na maua sona nofoaga tumau i totonu o lo’u loto. Na fai mai ma le faanatinati si o’u tamā pele, “Bonnie, aua lava ne’i lafoaia se avanoa e molimau atu ai e uiga ia Keriso.
Sa ou manatunatu loloto ma tatalo e uiga i le fautuaga a Tama. E masani ona ou fesili ifo ia te au lava pe ua ou iloa lelei le uiga o le ia ’aua lava ne’i lafoaia se avanoa e molimau atu ai e uiga ia Iesu Keriso.
E pei o oe, e i ai taimi ou te tu ai i luga i Aso Sa muamua o le masina ma tuu atu se molimau ia Keriso. E tele taimi ou te molimau atu ai i upumoni o le talalelei e avea o se vaega o se lesona. Na ou aoaoina atu o se faifeautalai upumoni ma folafola atu le paia o Keriso.
Ae o lenei augani sa [ou] lagonaina le patino tele! Na peiseai sa foliga mai na ia fai mai, “Bonnie, aua ne’i pulea oe e le lalolagi! Ia e tumau faamaoni i au feagaiga ma le Faaola. Saili ia e maua Ana faamanuiaga i aso uma, ma ia mafai ona e molimau atu e ala i le Agaga Paia e uiga i Lona mana ma [Lona] i ai i lou olaga!”
Ua tatou ola i se lalolagi pa‘ū, faatasi ai ma mea faasoesa ua faatosina ai o tatou mata ma loto agai i lalo i nai lo luga i le lagi. E faapei lava foi o sa Nifae i le 3 Nifae 11, tatou te manaomia Iesu Keriso. E mafai ona e vaai faalemafaufau ia te oe iina, faatasi ma tagata sa oo i le tele o gaogaosa ma le faatafunaga? Mata e faape’i le faalogo atu i le valaaulia patino a le Alii:
“Tutulaia ma o mai ia te au, ina ia outou tuu mai o outou lima i lo’u itu, ma ina ia outou tagotago foi i tulaga o fao o i o’u lima ma o’u vae, ina ia outou iloa ai o A’u … le Atua o le lalolagi uma, ma sa fasiotia mo agasala a le lalolagi.
“Ma sa oo ina o atu le motu o tagata i luma … taitoatasi … ma vaai i o latou mata ma tago atu i ai o latou lima, ma latou iloa … ma molimau ai mo i latou lava.”1
O nei tagata sa Nifae sa o atu ma le naunautai e tuu atu o latou lima i Lona itu ma tagotago i tulaga fao i Ona lima ma vae ina ia mafai ai ona latou molimau mo i latou lava o le Keriso lava lea. E faapena foi, e toatele tagata faatuatua ua tatou aoaoina i le Feagaiga Fou i lenei tausaga na faatalitali ma le naunautai i le afio mai o Keriso. Ona latou la’a mai lea mai o latou laufanua, fata faigaluega, ma laulau o taumafataga ae mulimuli atu ia te Ia, fetuleni atu ia te Ia, vagaia o Ia, ma saofafa’i faatasi ma Ia. Pe o tatou popolevale ea e molimau mo i tatou lava e faapei o le motu o tagata i tusitusiga paia? Pe itiiti ea le moomia o faamanuiaga o tatou sailia nai lo i latou?
Ina ua asiasi tino atu Keriso ia sa Nifae i lo latou malumalu, o Lana valaaulia sa le ia tutu mamao atu ma vaai atu ia te Ia, ae ia pa’i atu ia te Ia, ia lagona e i latou lava le moni a’ia’i o le Faaola o tagata. E mafai faapefea ona tatou faalatalata tele atu ina ia maua ai se molimau patino ia Iesu Keriso? Atonu o se vaega lea o le mea sa taumafai lo’u tamā e aoao mai ia te a’u. E ui atonu tatou te le iloa le manaia o lea lava latalata faaletino e pei o i latou sa savavali faatasi ma Keriso i le taimi o Lana auaunaga i le lalolagi, ae e ala i le Agaga Paia e mafai ai ona tatou maua Lona mana i aso uma! I le tele tatou te manaomia ai!
Ua anoanoai mea ua aoaoina ai a’u e tamaitai talavou i le lalolagi atoa e uiga i le sailia o Keriso ma le maua o se molimau patino, i aso taitasi ia te Ia. Se’i ou faasoa atu le atamamai o se toalua o i latou:
Na matamata Livvy i konafesi aoao i lona olaga atoa. O le mea moni, ua avea o se aga masani i le latou fale le matamata o sauniga uma e lima o se aiga. I taimi ua tuanai, ia Livvy o konafesi o lona uiga o ‘osi’osiga po o le te’i lava ua moe i nisi taimi ae le’i mafaufauina. Ae i le konafesi aoao ia Oketopa na te’a nei, sa ese. Na oo ina patino.
O le taimi lea, sa tonu ia Livvy e avea o se tagata faalogo mataalia. Sa ia faaleo itiiti faailo o lana telefoni ae fai tusigamanatu o uunaiga mai le Agaga. Sa ofo o ia ina ua ia lagonaina ni mea fitoitonu sa finagalo le Atua ia faalogo i ai ma fai. O lea faaiuga na toetoe o le taimi lava lea na faia ai se eseesega i lona olaga.
Na o nai aso mulimuli ane sa valaaulia ai o ia e ana uo i se tifaga e le talafeagai. Sa ia tomanatu, “Sa ou lagonaina upu ma le agaga o le konafesi ua toe foi mai i lo’u loto, ma sa ou faalogoina a’u lava o teenaina la latou valaaulia.” Sa ia maua foi le lototele e faasoaina atu ai lana molimau i le Faaola i lana uarota.
Ina ua mavae nei mea sa ia ta’ua, “O le mea ofoofogia o le, ina ua ou faalogo ia te au lava o molimau atu o Iesu o le Keriso sa ou lagonaina le Agaga Paia o toefaamautu mai foi mo a’u.”
E le’i faata’eta’e aluga e Livvy ana taumafaiga i le konafesi i le faaiuga o le vaiaso; sa ia matua tofu lava i ai, i le mafaufau ma le agaga, ma sa maua ai le Faaola iina.
Ona i ai lea o Maddy. Ina ua le toe o lona aiga i le lotu, sa le mautonu Maddy ma ua le iloa pe o le a le mea e fai. Sa ia iloa e i ai se mea taua o loo misi. O lea, i le 13 o tausaga o Maddy, sa amata ona alu na o ia i le lotu. E ui o le alu toatasi o nisi taimi e faigata ai ma e lē taugamalie, ae sa ia iloa e mafai ona ia maua le Faaola i le lotu ma sa ia fia i ai i le mea sa i ai o Ia. Fai mai a ia, “I le lotu sa lagona e lo’u agaga le pei sa i ai i le aiga.”
Sa taofimau Maddy i le mea moni e faapea, ua uma ona faamauina faatasi lona aiga mo le faavavau. Sa amata ona ia aumaia ona tuagane laiti i le lotu ma latou suesue faatasi i tusitusiga paia i le fale. Na i’u ina auai atu faatasi lona tina ma i latou. Sa ta’u atu e Maddy i lona tina lona manao e fai se misiona ma sa fesili pe mafai ona saunia lona tina la te o faatasi i le malumalu.
O le taimi nei ua i ai Maddy i le MTC. Ua auauna atu o ia. Ua molimau atu o ia ia Keriso. Na fesoasoani lana faataitaiga e toe ta’ita’i atu ai ona matua e toalua i le malumalu ma Keriso.
E faapei o Livvy ma Maddy, a tatou filifili e saili Keriso, o le a molimau mai le Agaga ia te Ia i le tele o tulaga eseese. O nei molimau a le Agaga e tutupu pe a tatou anapopogi, tatalo, faatalitali, ma agai pea i luma. O lo tatou latalata ia Keriso e faatupula’ia e ala i le tapua’i soo i le malumalu, salamo i aso taitasi, suesue i tusitusiga paia, auai i le lotu ma le seminare, manatunatu loloto i o tatou faamanuiaga faapeteriaka, mauaina ma le agavaa o sauniga ma le faamamaluina o feagaiga paia. O nei mea uma e valaaulia ai le Agaga e faamalamalama o tatou mafaufau, ma e aumaia ai le filemu ma le puipuiga faaopoopo. Ae, pe o tatou faamamaluina na mea o ni avanoa paia e molimau atu ai ia Keriso?
E tele taimi ua ou alu ai i le malumalu, ae a ou tapuai i le maota o le Alii, e suia ai a’u. O nisi taimi a’o ou anapogi, ou te lagonaina lo’u fiaai, a o isi taimi, ou te ma’ona i le Agaga ma se faamoemoega. O nisi taimi e memumemu ai a’u tatalo faisoo e lē suia, ae ua ou naunau foi e maua fautuaga mai le Alii e ala i le tatalo.
E i ai le mana i le faia o nei mausa paia, e lē o se lisi o mea e fai, ae o se molimau. O le faasologa o le a faifai lemu, ae o le a tuputupu ae i le auai atoatoa ma aafiaga ‘anoa i aso taitasi faatasi ma Keriso. A o tatou faatinoina e le aunoa Ana aoaoga, tatou te maua se molimau ia te Ia; tatou te fausia se sootaga ma Ia ma lo tatou Tama Faalelagi. E amata ona tatou avea e faapei o i La’ua.
E faia e le fili le tapisa tele ina ia mafai ai ona faigata ona lagonaina le siufofoga o le Alii. O le a lē tuuitiitia lava le tapisa o lo tatou lalolagi, o o tatou luitau, o o tatou tulaga, ae e mafai ma e tatau lava ona tatou fia’aai ma fia feinu i mea a Keriso ia “faalogo ia te Ia” ma le manino.2 Tatou te mananao e fatuina ni manatuaga malolosi o le avea ma soo ma ni molimau lea o le a taulai atu ai lo tatou faalagolago i lo tatou Faaola i aso taitasi.
Ua silia ma le 11 tausaga talu ona maliu lo’u tamā, ae o loo ola pea ana upu ia te au. “Bonnie, aua lava ne’i lafoaia se avanoa e molimau atu ai e uiga ia Keriso.” Ou te valaaulia outou ia tatou auai faatasi i le taliaina o lana valaaulia. Vaavaai mo Keriso i soo se mea―ou te folafola atu o loo i ai o Ia iina!3 O loo taoto le olioli moni i lo tatou naunautai ia latalata atili ia Keriso ma molimau ai mo i tatou lava.
Ua tatou iloa i aso e gata ai, “o le a tootutuli ai tulivae uma ma ta’uta’u atu e laulaufaiva uma” o Iesu o le Keriso.4 Ou te tatalo ia avea lenei molimau o se aafiaga masani ma faalenatura mo i tatou i le taimi nei—ia tatou faaaoga avanoa uma e molimau atu ai ma le fiafia: o loo soifua Iesu Keriso!
Oka, so’u alofa ia te Ia. E maeu lo tatou lotofaafetai mo Lana Togiola e le iu, lea ua “mafai ai ona maua le ola e faavavau ma avea ai le tino ola pea o se mea moni mo [i tatou] uma.”5 Ou te molimau atu i le agalelei o le Faaola ma le mamalu tele i Lona suafa paia, o Iesu Keriso, amene.