Taulai atu ia Iesu Keriso

Saunia e Brother Milton Camargo

Fesoasoani Muamua i le Au Peresitene Aoao o le Aoga Sa

O Iesu Keriso o le vaifofo i o tatou faafitauli, ae e tatau ona tatou vaavaai a’e o tatou mata ma si’itia la tatou vaai ia iloa atu o Ia.

E masani ona fai mai lo’u tama ia te a’u, “Aua le soona taulai atu i ou faafitauli e le mafai ai ona e iloa le vaifofo.”

Ou te molimau atu o le Alii o Iesu Keriso o le vaifofo lea e oo lava i o tatou faafitauli aupito faigata. Ae patino lava, na Ia faatoilaloina faafitauli e fa e feagai ma tagata uma ma e leai lava se tasi o i tatou e mafai ona foiaina na’o i tatou lava.

O le faafitauli muamua o le oti faaletino. E mafai ona tatou faatuatuai pe lē amana’iaina, ae e le mafai ona tatou faatoilaloina na o i tatou. Peitai, o Iesu Keriso na faatoilaloina le oti mo i tatou, ma o le taunuuga, o le a tatou toetutu uma i se aso.¹
O le faafitauli lona lua e aofia ai mea faafatiatama’i, aafiaga faigata, faanoanoaga, tiga, ma mea faapito’au o lenei olaga. Na faatoilalo e Iesu Keriso nei mea uma. Mo i latou e taumafai malosi e mulimuli ia te Ia, o le a i ai se aso o le a Ia “soloiesea … loimata uma” ma toe faasa’o mea.² I le taimi nei, e mafai ona Ia faamalolosia i tatou e ui atu i o tatou tofotofoga ma le mautinoa, loto fiafia, ma le filemu.³
O le faafitauli lona tolu o le oti faaleagaga e afua mai i le agasala. Na faatoilalo e Iesu Keriso lenei faafitauli i Lona tauaveina i Ona lava luga “le a’oa’iga e filemu ai i tatou.”⁴ Ona o Lana taulaga togiola, ua mafai ai ona faasaolotoina i tatou mai taunuuga o a tatou agasala pe afai tatou te faatuatua i le Faaola, salamo faamaoni, talia le feagaiga ua ofoina mai e le Tama ia i tatou e ala i sauniga e tatau ai e pei o le papatisoga, ma tumau e oo i le iuga.⁵
O le faafitauli lona fa o o tatou natura tapulaa, lē atoatoa. Ua i ai foi ia Iesu Keriso le vaifofo i lenei faafitauli. Na Te lē na ona tapeeseina o o tatou sese ma toe faaloto mamāina i tatou. E mafai ona Ia faia “se liuga tele i totonu … o o matou loto, ua le toe i ai so matou manao e fai mea leaga, ae ia faia mea lelei e le aunoa.”⁶ E mafai ona faaatoatoaina i tatou e ala i le alofa tunoa o Keriso ma avea ai e faapei o Ia i se aso.⁷

Ae paga lea, ua tele na’ua taimi tatou te soona nopia’i ai i a tatou lava faafitauli e afua ai ona se’e ese la tatou taula’i i vaifofo, o lo tatou Faaola, o Iesu Keriso. E faapefea ona tatou aloese mai lena mea sese? Ou te talitonu o loo ta’oto le tali i feagaiga ua valaaulia i tatou e osia ma Ia ma lo tatou Tama o i le Lagi.

O Le Taulai atu ia Iesu Keriso e ala i Feagaiga

E fesoasoani a tatou feagaiga ia i tatou e taulai ai la tatou gaua’i, o tatou mafaufauga, ma a tatou faatinoga ia Keriso. A tatou “pipii atu i feagaiga ua [tatou] faia,” o le a atili faigofie ai ona tatou faailoa “mea o lenei lalolagi” ia e tatau ona tatou “tuu ese” ma “mea o se [lalolagi] sili atu ona lelei” e tatau ona tatou sailia ma le maelega.⁸

O le mea lena na fai e le nuu o Amona i le Tusi a Mamona. Ina ua latou aoao e uiga ia Iesu Keriso ma amata ona taulai atu o latou olaga ia te Ia, sa latou iloaina ua tatau ona latou tanumia a latou auupega o taua ma avea ma e faamaoni atoatoa ma “sa ilogaese i latou i lo latou finafinau i le Atua.”⁹

O le tausia o feagaiga e ta’ita’i atu ai i tatou e saili i soo se mea e valaaulia ai le faatosinaga a le Agaga ma teena ai soo se mea e tataiese atu ai lena faatosinaga—“aua ua tatou iloa afai e mafai ona tatou agavaa mo le mafuta mai o le Agaga Paia, e mafai foi ona tatou agavaa e nonofo i le afio‘aga o le Tama Faalelagi ma Lona Alo o Iesu Keriso.”¹⁰ O le uiga o lea mea e tatau ona tatou suia la tatou vaogagana, e faaaoga ai upu agalelei sili atu. E mafai foi ona faauigaina o le suia o mausa faaleagaga e lē maloloina i ni mausa fou e faamalolosia ai la tatou sootaga ma le Alii, e pei o tatalo i aso taitasi ma le suesue i tusitusiga paia, e le tagata lava ia ma faatasi ai ma o tatou aiga.

Na saunoa mai Peresitene Russell M. Nelson e faapea, “o tagata taitoatasi e osia feagaiga i vai papatiso ma i totonu o malumalu—ma tausi i ai—ua ia faateleina le avanoa e maua ai le mana o Iesu Keriso. …

“O le taui mo le tausiga o feagaiga ma le Atua, o le mana faalelagi—mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga.”¹¹

O le faafouina o a tatou feagaiga i le taimi o le faamanatuga i Aso Sa taitasi o se avanoa sili lea e suesueina ai i tatou lava¹² ma toetaula’i atu o tatou olaga ia Iesu Keriso. E ala i le taumamafa i le faamanatuga, tatou te tautino atu ai faapea tatou “te manatua pea o ia.”¹³ O le upu o le pea e taua tele. E faasafua mai ai le tosinaga a le Faaola i vaega uma o o tatou olaga. Tatou te le manatua o Ia i le na o le lotu pe na o le taimi o a tatou tatalo i le taeao pe na o taimi tatou te pagatia ai ma tatou manaomia se mea.

Ioe, o nisi taimi e faalavefauina ai i tatou. E galo ia i tatou. E sapa ese la tatou taulai. Ae o le toefaafouina o a tatou feagaiga o lona uiga ua tatou mananao ia manatua pea le Faaola, o le a tatou taumafai e faia lena mea i le vaiaso atoa, ma o le a tatou toetuuto atu ma toe taulai atu foi ia te Ia i le la’o’ai o le faamanatuga i le vaiaso a sau.

O Le Taulai atu ia Iesu Keriso i o Tatou Aiga

E manino lava, o le taulai atu ia Iesu Keriso e tatau ona sili atu i le na o se Aso Sa, i gaoioiga i le lotu. Ina ua folasia mai e Peresitene Nelson le Sau, Mulimuli Mai ia te A’u i le 2018, na ia saunoa, “ua oo i se taimi mo se Ekalesia e faatotonugalemu-i le-aiga.”¹⁴ Na saunoa o ia e tatau ona “suia [o tatou] fale i se fale o le faatuatua” ma “se nofoaga autu o le aoaoina o le talalelei.” Ma sa ia faia ni folafolaga matagofie se fa mo i tatou pe a tatou faia.¹⁵

O le folafolaga muamua: “O le a avea moni lavaou aso Sapati ma aso fiafia.” O le a avea o se aso tatou te faalatalata atili ai i lo tatou Faaola. Pei ona fai mai se tamaitai talavou mai Peru, “O le aso o le Alii o le aso lea ou te maua ai le tele o a’u tali mai le Alii.”

O le folafolaga lona lua: “O le a fiafialau fanau e aoao ma ola i aoaoga a le Faaola.” O le mafuaaga lea, “tatou te tautalatala ai ia Keriso, [ma] tatou olioli ia Keriso, [ma] tatou tala’i atu Keriso, … ina ia mafai ona iloa e a tatou fanau po o le a le puna e mafai ona latou tepa taulai i ai mo se faamagaloga o a latou agasala.”¹⁶

Tatou te faia lenei mea ina ia i ai se aso, pe a alu atu lo tatou atalii e galue pe sopo i atumauga pe tuli manu i le vao, e pei ona sa faia ai e Enosa, e mafai ona ia manatua mea sa tatou aoao atu ia te ia e uiga ia Keriso ma e uiga i le olioli o le ola ai i le talalelei. Ma o iloa e ai? Atonu o le aso lea o le a i’u ai ina ia lagonaina le fia’ai faaleagaga lea e liliu atu ai o ia ia Iesu Keriso ina ia mafai ai ona ia lagonaina le leo o le Alii o faapea atu ia te ia, “Ua faamagaloina au agasala, ma o le a faamanuiaina oe.”¹⁷

O le folafolaga lona tolu: “O le tosinaga a le fili i lou olaga ma i lou aiga o le faaitiitia.” Aisea? Ona o le tele o lo tatou taulai atu ia Iesu Keriso, o le tele foi lea ina galoma atu o le faatosina a le agasala.¹⁸ Pe a faatumuina o tatou aiga i le malamalama o le Faaola, e faaitiitia ma saga faaitiitia avanoa mo le pogisa o le fili.

O le folafolaga lona fa: “O suiga i lou aiga o le a iloga ma tumau.” Aisea? Ona o le suiga e aumaia e Iesu Keriso, “o se suiga tele.”¹⁹ Na te suia o tatou lava natura; e avea i tatou ma “tagata fou.”²⁰ E faifaimalie ona avea atili i tatou e faapei o le Faaola, e faatumulia i Lona alofa mama mo fanau uma a le Atua.

O ai se o le a le manao i nei folafolaga o faatumulia ai o latou olaga ma o latou aiga? O le a le mea e manaomia ona tatou faia ia maua ai na folafolaga? O le tali o le “suia o o tatou fale i se fale o le faatuatua” ma se nofoaga autu o le aoaoina o le talalelei. Ma e faapefea ona tatou faia o lea? E ala i le taulai atu i le Tama Faalelagi ma Iesu Keriso, ma avea i La’ua ma totonugalemu o lo tatou olaga faaleaiga, o le tosinaga aupito taua i o tatou aiga.

Pe mafai ona ou fautuaina atu ia e amata e ala i le avea o afioga a Keriso, o loo maua i tusitusiga paia, o se vaega o lou olaga i aso taitasi? E le o i ai se fuafaatatau faatonuina mo le suesueina atoatoa o tusitusiga paia. E mafai ona 5 pe 10 minute i aso taitasi--pe sili atu foi pe a e mafaia. E mafai ona faia se mataupu po o ni nai fuaiupu i le aso. O nisi aiga e mananao e suesue i le taeao a o lei tuua mo aoga po o galuega. O isi e mananao e faitau i le po a o lei momoe. Na fai mai ia te a’u nisi ulugalii talavou e faapea, o latou e suesue le tagata lava ia a o agai atu i le galuega ona fefaasoaa’i lea o malamalamaaga ma le isi e ala i fe’au tusitusia, ina ia faamaumauina o latou manatu ma talanoaga.

O leSau, Mulimuli Mai ia te A’u o loo maua ai le tele o fautuaga o gaoioiga ma punaoa e mafai ona fesoasoani i tagata taitoatasi ma aiga e aoaoina mataupu faavae o le talalelei mai tusitusiga paia. E mafai foi ona avea vitio faaTusi Paia ma vitio o le Tusi a Mamona ma meafaigaluega taua e atili faigofie ai ona maua tusitusiga paia i lou aiga. E tele ina musuia talavou ma tamaiti i tala ofoofogia i tusitusiga paia. O nei tala ma mataupu faavae o loo aoao mai ai, o le a manatua e lau fanau, e pei o ni uo faatuatuaina, pe a latou manaomia ni faataitaiga lelei o le auauna atu, amio mama, usiusitai, onosai, faapalepale, faaaliga patino, alofa mama, lotomaualalo, ma le faatuatua ia Iesu Keriso. E mavae atu aso, o le faifai pea o lou taumafa i afioga a le Atua o le a fesoasoani i lau fanau e ola latalata atili ai i le Faaola. O le a oo ina latou iloa o Ia e le pei o le taimi muamua.

O loo soifua le Alii o Iesu Keriso i le asō. E mafai ona i ai moni o Ia i o tatou olaga i aso taitasi. O Ia o le vaifofo i o tatou faafitauli, ae e tatau ona tatou vaavaai a’e o tatou mata ma si’itia la tatou vaai ia iloa atu o Ia. Sa Ia fetalai, “Vaai mai ia te a’u i mafaufauga uma; aua le masalosalo, aua le fefe.”²¹ A tatou taulai atu ia te Ia ma lo tatou Tama i le Lagi, ia osia ma tausia feagaiga ma i La’ua, ma ia avea i La’ua o se tosinaga aupito taua i o tatou fale ma aiga, o le a avea atili i tatou ma ituaiga o tagata na momoo i ai Peresitene Nelson: “O se nuu e mafaia, ua saunia, ma agavaa e talia le Alii pe a toe afio mai o Ia, se nuu ua uma lava ona latou filifilia Iesu Keriso i lo lenei lalolagi pa’ū, se nuu o ē olioli i lo latou faitalia e ola ai i tulafono maualuluga atu ma paia atu a Iesu Keriso.”²² I le suafa o Iesu Keriso, amene.