Lipoti 2022: Tausiga o i Latou e lē Tagolima

O le lipoti faaletausaga a le Ekalesia i le 2022 i le tausiga o i latou e le tagolima ua faaalia ai o lenei galuega na aofia ai le silia ma le $1 piliona i tupe faaalu, 6.3 miliona itula na ofofua atu, ma le 3,692 galuega fesoasoani alofa i atunuu ma teritori e 190.

Sa agai atu le tupe i le fesoasoani o le taulaga anapogi, fesoasoaniga alofa, oloa na tufatufaina mai faleteuoloa a epikopo ma faleoloa o Alamanuia a le Tesareta, ma faagaoioiga e pei o faatoaga, fale e gaosi ai meaai, fautuaga a le Tautua mo Aiga, ma nofoaga autu mo galuega.

O foai tautupe sili ona tele na tuuina atu e le Ekalesia i le 2022 e aofia ai le $32 miliona i le Polokalama o Meaai a le Lalolagi (WFP) ma le $5 miliona i le polokalama o meaai paleni i le lalolagi atoa a le UNICEF, lea e fesoasoani i tamaiti e fiaaai.

“E i ai se loto momoi o Iesu mo tamaiti,” na saunoa ai le Peresitene Aoao o le Aualofa o Camille N. Johnson ina ua fofogaina mai le foai i le WFP. “E tutulu o Ia pe a silasila mai ia i latou o matelaina. Ma e olioli o Ia e oo lava i taumafaiga aupito itiiti e fesoasoani ai ia i latou.”

O isi foai taua na aofia ai le $5.1 miliona i le Koluse Mumu a Amerika (e faaopoopo atu i le silia ma le 1 miliona iunite o toto na foai mai le Au Paia o Aso e Gata Ai) ma le isi $5 miliona i le Rotary International mo tui puipui o le faama’i pipili ma tina ma pepe faatoa fananau mai.

Sa faia foi e le Ekalesia ni saofaga iloga tautupe e fesoasoani ai i le faatupulaia o le aofai o tagata na aafia i faalavelave faalenatura ma taua. O lenei mea na aofia ai le fesoasoani i tagata sulufai i Iukureini; o e na faasaoina mai le galulolo i Toga; o tagata na afaina i matagi malolosi i Kentucky, Florida, ma Aferika i Saute; ma tagata na aafia i feteenaiga faalemalo i le Ripapelika Temokarasi o Congo.

“O le alofa ma le naunau e fesoasoani e lofituina i le vaai,” o le tala lea a Julia, o se tagata o le Ekalesia i Auseteria, o lē sa fesoasoani i tagata sulufai i ni isi o atunuu o Europa i Sasae. “Ua tosina atu loto o tagata i le tasi ma le isi.”

Sa fesoasoani foi le Ekalesia e aumai le eletise i se nuu o le au Navajo i Iuta, ma sa galulue tagata o le Ekalesia ma le au Sikhs i se galuega fesoasoani i le United Arab Emirates. Sa faipaaga le Au Paia o Aso e Gata Ai ma le NAACP i galuega fesoasoani a le alalafaga mo tina i Memphis i Tennessee, ISA, ma i latou o e manaomia ni meaai maloloina i San Francisco, Kalefonia. Ma sa aoina e Masini Foai Atu a le Faamalamalama le Lalolagi ia tupe e faatau ai meaai ma isi aitema mo i latou e manaomia le fesoasoani i atunuu e 28 i le salafa o le lalolagi.

O itula ofofua atu e 6.3 miliona na ofoina atu i le 2022 na aofia ai auaunaga i faatoaga, togalaau suamalie, galuega tuuapa, ma faleoloa o Alamanuia o le Tesareta; misiona e tausia ai i latou e manaomia; ma galuega faamama i le mavae ai o mala faalenatura.

E le gata i le 3,692 o galuega faatino o fesoasoaniga alofa, e 16,285 galuega faatino fou na faatautaia e le JustServe.org, o le faitotoa a le Ekalesia mo volenitia e le totogia i luga o upega tafa’ilagi i atunuu e 14. O lea meafaigaluega e fesootai ai tagata i avanoa e auauna atu ai e fetaui ma mea latou te fiafia i ai ma nofoaga.

Ua ta’ua e le Epikopo Pulefaamalumalu o Gérald Caussé le JustServe “o se gaoioiga ma se auala e mafai ai ona tatou ola i a tatou feagaiga” ma “faamanuia ma faamalolosia ai [lo tatou] nuu” (i le “The Blessings Will Follow: Benefits of Implementing JustServe” [vitio], ChurchofJesusChrist.org).

Sa faaauau foi ona faia e le Ekalesia ana faama’ite faatausimea mo le siosiomaga. Talu mai le 2018, ua faaitiitia e le laumua o le Ekalesia le faaaogaina o le vai faaletausaga i le 38 miliona kalone. Ua i ai nei i le silia ma le 500 falelotu i le lalolagi atoa ni faavaa mo le malosiaga faaeletise e maua i le la. Sa faagaoioia e Alamanuia a le Tesareta le 73 miliona oloa toe faaaogaina. Ma sa toe faaaogaina e le Falelomi Tusi ma le Faletusi a le Ekalesia le toeitiiti 4,000 tone o pepa, u’amea, pepa malo, ma palasitika.