Tala Fou o le Ekalesia

O Se Vaaiga i le Lima-Tausaga o le Auaunaga a Peresitene Russell M. Nelson, o le Peresitene o le Ekalesia.

I lana uluai saunoaga faalauaitele i le avea ai ma Peresitene lona 17 o Le Ekalesia a Iesu Keriso o le Au Paia o Aso e Gata Ai, na fofogaina i le lima tausaga talu ai, sa tata’iese ai e Peresitene Russell M. Nelson se vaaiga mai ia te ia lava, agai ia Iesu Keriso ona tulimatai atu ai lea i luma.

“E i ai pea le Alii i taimi uma ma o le a aoao ma uunaia i taimi uma Ana perofeta,” na ia ta’utino mai ai. “O loo tu le Alii i le foe. O i tatou o e ua faauuina ina ia molimau atu e uiga i Lona suafa paia i le lalolagi atoa o le a faaauau pea ona saili ia iloa Lona finagalo ma mulimuli i ai” (“As We Go Forward Together,” Liahona, Apr. 2018, 6).

Mauaina o Faaaliga e Taiala ai le Ekalesia

Sa galue Peresitene Nelson i le taitaiga a le Alii a o femalagaa’i o ia i malo e 35, fetuunai le faatulagaga o le Ekalesia, faaaoga tekinolosi e faasoa atu ai le talalelei, taitaia le Ekalesia i le taimi o le faama’i oti, tuuina atu ni valaaulia lauiloa, ma fausia ni sootaga o le malamalama.

I le taimi o lana nofoaiga o se Peresitene o le Ekalesia, sa saunoa ai Peresitene Nelson i le faitau selau afe o le Au Paia o Aso e Gata Ai ma valaau atu i tupu, peresitene, ma palemia. Ua ia faamafanafanaina tagata na aafia i solitulafono ma isi o e faanoanoa ma faalolotoina sootaga ma taitai autu o le Faalapotopotoga a le Atunuu mo le Siita’iga o Tagata Lanu (NAACP), mauaina o se valaaulia e saunoa ai i le fonotaga a le NAACP 2019 i Detroit, Michigan, ISA.

E ala i faaaliga ma faatasi ai ma le lagolago atoa a le Au Peresitene Sili ma le Korama a Aposetolo e Toasefululua, ua ia faia ai foi ni suiga se tele o aiaiga faavae i totonu o le Ekalesia.

I lalo o lana taitaiga musuia, na suia ai e taitai o le Au Paia o Aso e Gata Ai faiaoga o aiga ma faiaoga asiasi i auaunaga; fetuunai le faasologa o sauniga o le Aso Sa e taulima ai suesuega o le talalelei e faatotonugalemu-i-le-aiga, ma lagolagoina-e-le-Ekalesia; ma talosagaina tagata o le ekalesia e faaaoga le igoa atoa ma le sa’o o le Ekalesia. Ua faatulaga e le Ekalesia se aiaiga faavae e faatagaina mo ulugalii ua faaipoipoina faalemalo ina ia faamauina i le malumalu i le taimi lava latou te saunia ai; toe faaigoaina o le faatalanoaga faaiu o le sefuluai o se tautinoga o le sefuluai; ma faatuina se aiaiga faavae e mafai ai e tamaitai ona auauna atu o ni molimau o faamauga i le malumalu ma tamaitai, autalavou, ma tamaiti o e o ni tagata agavaa o le Ekalesia e avea ma molimau mo papatisoga.

“O se tasi o mea ua faagaeetia pea lava pea e le Agaga i lo’u mafaufau talu mai lo’u valaauga fou o se Peresitene o le Ekalesia o le naunau o le Alii e faaali mai Lona mafaufau ma Lona finagalo,” na saunoa ai Peresitene Nelson i le taimi o le konafesi aoao ia Aperila 2018 (“Faaaliga mo le Ekalesia, Faaaliga mo o Tatou Olaga,” Liahona, Me 2018, 94).

I le 2020 sa faamanatuina ai e le Ekalesia le luaselau tausaga o le Uluai Faaaliga a Iosefa Samita, e le o se faafiafiaga maoae ae faatasi ai ma taitai o le Ekalesia o loo valaauliaina le Au Paia o Aso e Gata Ai i le salafa o le lalolagi e aoao e faalogo atili ma le lelei ma fai so’o, i le siufofoga o le Alii. I se lauga o le konafesi aoao ia Aperila 2020, sa tuuina mai ai e Peresitene Nelson se folafolaga faasolopito, “O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi” (tagai “Faalogo ia te Ia,” Liahona, Me 2020, 91–92).

Taitaiina o le Ekalesia i le taimi o le KOVITI-19

Faatasi ai ma le poto masani o se fomai tipitipi paionia o le fatu aemaise lava i le avea ai ma perofeta ma taitai o se tapuaiga i le lalolagi atoa, sa taitaia ai e Peresitene Nelson le Ekalesia i le taimi o le faama’i oti o le KOVITI-19 lea na amata i le 2020.

O le tali atu o Auaunaga Limafoai a le Au Paia o Aso e Gata Ai i le faama’i oti na avea ma tali aupito sili ona tele i le talafaasolopito o le Ekalesia e oo mai i le taimi nei, faatasi ai ma le fesoasoani na tuuina atu i le silia ma le 150 atunuu.

I se faatalanoaga o Me 2020 ma le Church News, na saunoa ai Peresitene Nelson, “E oo lava i ao o le faanoanoa, e mafai ona maua ni faailoga o le faamoemoe” (i le Sarah Jane Weaver, “Video: President Nelson Talks about the ‘Painful’ Decision to Close Temples amid COVID-19,” Church News, July 27, 2020, thechurchnews.com). O le faailoga o le faamoemoe o le faama’i oti, sa ia fai mai ai, o le maua lea o auala e feutaga’i ai ma Au Paia o Aso e Gata Ai e aunoa ma le alu i luga o se vaalele. E ala i tekinolosi, sa saunoa atu ai Peresitene Nelson i Au Paia o Aso e Gata Ai i Venesuela ma Europa faapea foi i Kalefonia, Kanata, ma Okalahoma. Sa ia saunoa atu foi i talavou matutua i le lalolagi atoa.

Ia Aokuso 2022, sa malaga ai Peresitene Nelson i fafo atu o Iuta mo le taimi muamua talu ona faateteleina le faama’i oti ia Mati 2020 mo le toe faapaiaina o le Malumalu o Uosigitone D.C. ua toefaafouina.

Mauaina o le Taui o le Filemu a le Tupu o Gandhi-King-Mandela

O le Kolisi o Morehouse, o se kolisi faasolopito a Tagata Uli i Georgia, ISA, na faasilasila mai e faapea o le a tuuina atu lana uluai faailoga taualoa o le Gandhi-King-Mandela Peace ia Peresitene Nelson. Sa faaee atu e le aoga lenei faamamaluga fou i le perofeta e 98-tausaga-le-matua i le aso 13 Aperila, 2023, i le Worldhouse Interfaith and Interdenominational Assembly i le Martin Luther King Jr. Falesa Faavaomalo i Atlanta.

O lenei taui ua faaigoaina ia Mahatma Gandhi, Matin Luther King Jr., ma Nelson Mandela. Ua faamoemoeina, na fai mai ai le aoga, mo se tasi o loo faalauiloaina le filemu ma le suiga lelei faaagafesootai e ala i auala e le faamalosia ma faaaoga ai la latou taitaiga i le lalolagi atoa e faamautu ai le filemu, faamasinotonu, eseesega, ma le galulue faatasi.

Sa taliaina e Peresitene Nelson le faailoga e ala i le vitio, ma sa auai foi le Aufaipese a le Tapeneko i le Lotoa o le Malumalu, i le faatinoga i ala faatekinolosi.

O le misiona a le perofeta mo le lima tausaga ua faatumulia i uunaiga ina ia alofa ma faaaloalo i tagata uma. I se mea na tupu i le faamanatuina o le 40 tausaga o le faaaliga i le 1978 e uiga i faamanuiaga o le perisitua na tuuina atu i tagata agavaa o ituaiga uma, sa ia aoao atu ai Au Paia o Aso e Gata Ai ia “fausia sootaga o le galulue faatasi nai lo puipui o le faailogalanu” (“Building Bridges,” New Era, Aug. 2018, 6).