O Lou Faamanuiaga Faapeteriaka—Taitaiga Musuia mai le Tama Faalelagi
Sa fesoasoani lo’u faamanuiaga faapeteriaka ou te malamalama ai i lo’u faasinomaga moni e faavavau—po o ai moni lava a’u ma po o ai o le a avea ai a’u.
Na tausia a’u e ni matua lelei tele o e sa alolofa ma aoao faamaoni ia i matou, o la’ua fanau, le talalelei. O le mea e faanoanoa ai, sa tauivi o’u matua pele i le la faaipoipoga mo le tele o tausaga. Sa o a’u o se tamaitiiti Peraimeri ina ua ta’u mai ia te a’u e foliga mai o le a i ai se aso e tetea ai i la’ua ma o le a manaomia ona filifili o’u tei ma a’u po o le fea o matua e nofo ai. O se taunuuga, mo le tele o tausaga sa ou oo ai i le atuatuvale tele; ae peitai, o se meaalofa mai lo’u Tama Faalelagi na iu ina fesoasoani e suia ai mea uma mo a’u—o lo’u faamanuiaga faapeteriaka.
I le 11 o [o’u] tausaga, sa faatetelina lo’u popole e uiga i le mafutaga a o’u matua, sa ou matuai manao lava i lo’u faamanuaga faapeteriaka. Sa ou iloa sa silafia lelei e le Tama Faalelagi a’u ma silafia o’u tulaga patino. Ma sa ou iloa foi o le a ou maua se taitaiga mai ia te Ia. O le taimi lava na uma ai lou aso fanau lona 12, sa ou mauaina lo’u faamanuiaga faapeteriaka. O lena mea ua silia ma le afa seneturi talu ona tuanai, ae o loo ou manatuaina lelei lava ia faamatalaga auiliili o lena aafiaga paia.
O le mea e faafetai ai, ua tatou maua ni faatonuga musuia e uiga i faamanuiaga faapeteriaka i le Tusitaulima Aoao a le Ekalesia:
“O tagata agavaa uma o le Ekalesia ua papatisoina ua i ai le aia tatau e mauaina se faamanuiaga faapeteriaka, lea e tuuina mai ai le taitaiga musuia mai le Tama Faalelagi.”
E tatau ona “lava le matua [o se tagata o le ekalesia] … e malamalama ai i le taua ma le natura paia o le faamanuiaga” ma “malamalama i aoaoga faavae autu o le talalelei.”
“O le mea sili, ia lava le talavou o le tagata aua o le tele o faaiuga taua i le olaga o loo i luma atu. … E le tatau i taitai perisitua ona faatulaga se tausaga laitiiti faatapulaa mo se tagata ina ia maua ai se faamanuiaga faapeteriaka. …
“O faamanuiaga faapeteriaka taitasi e paia, e le faalauaiteleina, ma e patino mo le tagata lava ia. …
“O se tagata e mauaina se faamanuiaga faapeteriaka e tatau ona faatauaina ona upu, mafaufau loloto i ai, ma ola ia agavaa e maua ia faamanuiaga folafolaina i le olaga nei ma i le faavavau.”1
Ua aoao mai pea lava pea lo tatou Peresitene pele o Russell M. Nelson e uiga i le taua o se faamanuiaga faapeteriaka,2 e tuuina atu ai i tagata taitoatasi ia mauaina “se folafolaga o lona tupuaga e tau atu i tua ia Aperaamo, Isaako, ma Iakopo”3 ma o faamanuiaga taitasi o “se mau e patino ia te oe.”4
Sa matuai taua lava lo’u faamanuiaga faapeteriaka ia te a’u a’o ou laitiiti mo le tele o mafuaaga. Muamua, e ala atu i le mana o le Agaga Paia, sa fesoasoani lo’u faamanuiaga faapeteriaka ou te malamalama ai i lo’u faasinomaga moni e faavavau—po o ai moni lava a’u ma po o ai o le a avea ai a’u. Sa fesoasoani ou te iloa ai, e pei ona sa aoao mai Peresitene Nelson, o a’u “o se atalii o le Atua,” “o se [tama] o le feagaiga,” ma “o se soo o Iesu Keriso.”5 Sa ou iloa sa iloa ma alofaina a’u e lo’u Tama Faalelagi ma lo’u Faaola, ma sa La’ua aafia patino i lo’u olaga. Na fesoasoani lea mea ou te manao ai ia faalatalata atili atu ia i La’ua ma faateleina lo’u faatuatua ma le talitonuina o i La’ua.
Sa faasoa mai e se uo pele o lē sa auai i le Ekalesia o se talavou matua: “Ina ua tuu e le peteriaka ona lima i luga o lo’u ulu ma ta’u lo’u igoa, sa suia mea uma … e le na o le taimi lena ae mo aso uma o totoe o lo’u ola. Sa ou lagonaina i le taimi lava lea—e ala i le mana lea sa ia saunoa ai—sa patino ma loloto le iloaina o a’u. O upu sa ia tautala ai na tuia ai lo’u tagata atoa. Sa ou iloa sa silafia e le Tama Faalelagi a’u, i totonu ma fafo.”
O le iloa o ai moni lava a’u sa fesoasoani ou te malamalama ai ma manao e fai le mea sa faamoemoe mai ai le Atua ia te a’u.6
O lenei mea na taitaiina ai a’u e suesue i feagaiga na ou osia ma faamanuiaga folafolaina i le feagaiga a le Atua ma Aperaamo.7 Na tuuina mai ai ia te a’u se vaaiga e faavavau lea na musuia ai a’u ia tausia ma le atoatoa faateleina a’u feagaiga.
Sa ou suesueina e le aunoa lo’u faamanuiaga faapeteriaka ma, i le avea ai ma se talavou, e masani lava o aso uma, o lea na fesoasoani ou te lagona ai le faamafanafanaga, tosinaga taiala a le Agaga Paia, o lē sa fesoasoani e tuuitiitia lo’u atuatuvale a o o’u mulimuli i Ana uunaiga. O lenei mea na faateleina ai lo’u manao ia malosi e valaaulia le malamalama, upumoni, ma le Agaga Paia i le suesue i a’u tusitusiga paia ma tatalo i aso uma ma taumafai e suesue ma le maelega atili ma mulimuli i aoaoga a perofeta ma aposetolo a le Atua. Sa fesoasoani foi lo’u faamanuiaga faapeteriaka ou te manao ai e usiusitai atili i le finagalo o lo’u Tama Faalelagi, ma o lena taulaiga na fesoasoani ou te maua ai le olioli maoae e ui lava i o’u tulaga patino.8
Sa ou maua le malosi faaleagaga i taimi taitasi na ou suesueina ai lo’u faamanuiaga faapeteriaka. Ina ua iu ina tete’a o’u matua, na avea lo’u faamanuiaga faapeteriaka e pei ona aoao mai Peresitene Thomas S. Monson, “o se oa faapelepele ma taugata a le tagata lava ia,” ma “o se Tapasa patino.”9
Ae faamolemole aua ne’i outou malamalama sese. Ou te le’i atoatoa. Sa ou faia ituaiga measese uma. E faamautinoa atu e la’u soa e faavavau o loo ou faia pea. Ae sa fesoasoani lo’u faamanuiaga faapeteriaka ma o loo faaauau pea ona fesoasoani ia te a’u ou te manao ai ia faia mea lelei sili atu ma ia lelei sili atu.10 O le suesue so’o i lo’u faamanuiaga faapeteriaka na faateleina ai lo’u manao ia tetee atu i faaosoosoga. Na fesoasoani ou te maua ai le manao ma le lototele e salamo, ma o le salamo sa avea atili o se faagasologa fiafia.
Sa taua ia te a’u le maua o lo’u faamanuiaga faapeteriaka a o o’u laitiiti ma a o tuputupu a’e pea la’u molimau. Ma ou te faafetai e faavavau ona sa malamalama o’u matua ma lo’u epikopo o lo’u manao sa faaalia ai ua ou saunia.
Ina ua 12 ou tausaga, sa matuai itiiti lava le le mautonu ma le faasoesa o le lalolagi sa i ai nai lo le lalolagi i aso nei. Na faamatalaina e Peresitene nei aso “o se taimi aupito sili ona faigata i le talafaasolopito o le lalolagi,” o se lalolagi ua “ua lofia i le agasala” ma “faaloloto.”11 O le mea e laki ai ua sili atu le faatagata matutua o o tatou talavou i aso nei nai lo a’u a’o o’u 12, ma ua i ai foi ni a latou faaiuga taua tele e fai a o latou talavou! E manaomia foi ona latou iloa po o ai moni i latou ma e alofa le Atua ia i latou ma silafia lelei i latou!
E le o tagata uma o le a mananao i o latou faamanuiaga faapeteriaka i le matua na ou manao ai. Ae ou te tatalo o tagata o le ekalesia o e le’i maua o latou faamanuiaga faapeteriaka o le a saili ma le agaga tatalo ia iloa le taimi latou te saunia ai. Ou te folafola atu afai e te saunia faaleagaga, o le a paia lou aafiaga ia te oe, e pei foi o lo’u [aafiaga]. Ou te tatalo foi o i latou o e ua uma ona maua o latou faamanuiaga faapeteriaka o le a [latou] suesue i ai ma teufatuina. O le teufatuina o lo’u faamanuiaga faapeteriaka a o ou laitiiti ua faamanuiaina ai a’u i le lototele pe a ou lotovaivai, mafanafana pe a ou fefe, filemu pe a ou lagona le popolevale, faamoemoe pe a ou lagonaina le leai o se faamoemoe, ma le olioli pe a ua sili ona ou manaomia ai. O lo’u faamanuiaga faapeteriaka sa fesoasoani e faateleina lo’u faatuatua ma faalagolago i lo’u Tama Faalelagi ma lo’u Faaola. Ua faateleina ai foi lo’u alofa mo i Lau’a—ma o loo faia pea.12
Ou te molimau atu o faamanuiaga faapeteriaka e tuuina maia taitaiga musuia mai le Tama Faalelagi. Ou te tuu atu la’u molimau i le soifua moni o lo tatou Tama oi le Lagi ma Lona Alo—lo tatou Faaola, o Iesu Keriso—o e o loo silafia i tatou, alolofa ia i tatou, ma mananao e faamanuia ia i tatou. Ua ou iloa foi ma le mautinoa o Peresitene Russell M. Nelson o le perofeta a le Atua i le lalolagi i aso nei. I le suafa o Iesu Keriso, amene.