O Iesu Keriso Lava le Tali
Po o a lava au fesili po o faafitauli o i ai, e maua lava le tali i le soifuaga ma aoaoga a Iesu Keriso.
O’u uso e ma tuafafine pele, ua fafagaina faaleagaga i tatou i nei aso e lua ua mavae. Ua maoa’e musika a le aufaipese. O i latou o e na saunoa na avea ma meafaigaluega mo le Alii. Ou te tatalo o le a outou saili mo le Agaga Paia e taiala outou i a outou suesuega a o outou mafaufau loloto i upumoni na aoaoina mai i lenei pulelaa. E moni lava na musuia mai le lagi.
E tasi le vaiaso mai le asō o le Aso Sa o le Eseta. O le faamanatuga faalelotu aupito sili lea ona taua mo soo o Iesu Keriso. O le mafuaaga autu tatou te faamanatu ai le Kerisimasi ona o le Eseta. O le lesona o le Sau, Mulimuli Mai ia te A’u i lenei vaiaso o le a uunaia oe e suesue i le ulufale manumalo atu o le Faaola i Ierusalema, Lona faamamaina o le malumalu, Lona puapuagatia i le Faatoaga o Ketesemane, Lona Faasatauroga, Lona Toetu mamalu, ma Lona faaali atu mulimuli ane i Ona soo.1
Tofo i nei fasifuaitau paia ma saili i auala uma tou te mafaia e faafetai ai i lo tatou Tama Faalelagi mo le auina mai o Lona Alo Pele e Toatasi.2 Ona o Iesu Keriso, ua mafai ai ona tatou salamo ma faamagaloina a tatou agasala. Ona o Ia, o le a toetutu ai i tatou taitoatasi.
Ou te valaaulia foi outou e toe suesue i le tala i le faaali atu o le Faaola i sa Nifae i Amerika, e pei ona tusia i le 3 Nifae. E le’i mamao atu lena faaaliga, na faalogoina ai Lona siufofoga i le motu o tagata, e aofia ai upu nei o le aioiga:
“Pe tou te le foi mai nei ea ia te au, ma salamo ia outou agasala, ma liliu, ina ia ou faamaloloina outou?
“… Faauta, ua faaloaloa atu ia te outou lo’u lima alofa mutimutivale, ma o soo se tasi e sau, o ia lea o le a ou taliaina.”3
Uso e ma tuafafine pele, ua faalautele mai e Iesu Keriso lena lava valaaulia e tasi ia te outou i le asō. Ou te aioi atu ia outou o mai ia te Ia ina ia mafai ona Ia faamaloloina outou! O le a Ia faamaloloina oe mai le agasala pe a e salamo. O le a Ia faamaloloina oe mai le faanoanoa ma le fefe. O le a Ia faamaloloina oe mai manu’a o lenei lalolagi.
Po o a lava au fesili po o faafitauli o i ai, e maua lava le tali i le soifuaga ma aoaoga a Iesu Keriso. Aoao atili e uiga i Lana Togiola, Lona alofa, Lona alofa mutimutivale, Lana aoaoga faavae, ma Lana talalelei toefuataiina o le faamalologa ma le alualu i luma. Liliu Atu ia te Ia! Mulimuli ia te Ia!
O Iesu Keriso o le mafuaaga lea tatou te fausia ai malumalu. O ia maota taitasi o Ona maota paia ia. O le osia o feagaiga ma le mauaina o sauniga taua i le malumalu, faapea foi ma le saili e faalatalata atili atu ia te Ia iina, o le a faamanuia ai lou olaga i auala e le mafaia e se isi lava ituaiga o tapuaiga. Mo lenei mafuaaga, o loo matou faia ai mea uma i lo matou malosi e faafaigofie ai ona maua faamanuiaga o le malumalu mo o tatou tagata i le salafa o le lalolagi. O le asō, ou te faafetai ai e faasilasila atu a tatou fuafuaga e fausia se malumalu fou i nofoaga taitasi nei:
-
Retalhuleu, Kuatemala
-
Iquitos, Peru
-
Teresina, Pasila
-
Natal, Pasila
-
Tuguegarao City, Filipaina
-
Iloilo, Filipaina
-
Jakarta, Initonesia
-
Hamburg, Siamani
-
Lethbridge, Alberta, Kanata
-
San Jose, Kalefonia
-
Bakersfield, Kalefonia
-
Springfield, Misuri
-
Charlotte, Karolaina i Matu
-
Winchester, Virginia
-
Harrisburg, Penisilevania
O’u uso e ma tuafafine pele, ou te molimau atu o Iesu Keriso o loo taitaia mataupu o Lana Ekalesia. Ou te molimau atu o le mulimuli ia te Ia ua na o le pau lea o le ala i le fiafia tumau. Ou te iloa o loo alu ifo Lona mana i luga o Ona tagata tausi feagaiga, o e ua “faaauupegaina i le amiotonu ma le mana o le Atua i le mamalu tele.”4 Ou te molimau atu ai, faatasi ma lo’u alofa ma faamanuiaga mo outou taitoatasi, i le suafa paia o Iesu Keriso, amene.