O Afea e Tatau Ona Maua Ai Lou Faamanuiaga Faapeteriaka

Saunia e Elder Kazuhiko Yamashita

O Le Fitugafulu

A e mauaina lou faamanuiaga, o le a e iloa ai ma lagonaina le alolofa o le Tama Faalelagi ma Iesu Keriso ia te oe ma lo La’ua taulai atu ia te oe lava ia.

O ananafi sa talanoa ai la’u uo pele o Elder Randall K. Bennett e uiga i faamanuiaga faapeteriaka. O se savali maoae ma sa musuia ai i tatou uma. O’u uso e ma tuafafine pele, pe mafai lava ona ou talanoa atu foi e uiga i faamanuiaga faapeteriaka? Peteriaka, a o faateleina talosaga mo faamanuiaga faapeteriaka, ou te tatalo o le a faamanuia outou e le Alii a o faaauau pea ona faalauteleina o outou valaauga.

A ou alu i konafesi faalesiteki, ou te talatalanoa lava e le aunoa i le peteriaka o le siteki ma lona faletua. O peteriaka e agamalu, usiusitai, ma o ni taitai maoae ua valaauina e le Atua. Latou te faamatala mai ia te au le tele o aafiaga matagofie faaleagaga. Ou te fesili i ai i le matua o le tagata aupito itiiti ma aupito matua ua latou tuuina atu i ai se faamanuiaga. O le taimi nei, o le tagata aupito laitiiti e 11 a o le aupito matua e 93.

Sa ou mauaina lo’u faamanuiaga faapeteriaka a o avea ma tagata fou o le Ekalesia, i le 19 o o’u tausaga, lua tausaga talu ona ou papatiso. Sa matua’i toeaina lava lo’u peteriaka. Sa auai o ia i le Ekalesia i le 1916 ma o ia o se paionia o le Ekalesia i Iapani. Sa o se faamamaluga tele ia te au le mauaina o lo’u faamanuiaga faapeteriaka mai lena soo ofoofogia o le Alii. Sa fai si fagata o lana faaIapani ou te malamalama ai, ae sa mamana lava.

Ua ta’u mai e peteriaka sa ou feiloai i ai e faapea, e toatele tagata e maua o latou faamanuiaga faapeteriaka ae toeitiiti o e faamisiona. O’u atalii talavou, tamaitai talavou, matua, ma epikopo pele, o faamanuiaga faapeteriaka ua le mo na o le tapenapena ai e auauna atu i se misiona. E mafai e tagata agavaa ua papatisoina ona maua o latou faamanuiaga faapeteriaka pe a ua tonu le taimi mo i latou.¹

Tagata matutua e, o le ekalesia, o nisi o outou atonu e le’i mauaina lava o tou faamanuiaga faapeteriaka. Manatua, e leai se tausaga faatapulaa o le matua.

O lo’u tina faaletulafono sa o se tagata toaga tele o le Ekalesia, sa avea ma faiaoga o le Aualofa seia oo ina maliu i le 91 o ona tausaga. Sa ou faanoanoa ina ua ou iloa e lei maua sona faamanuiaga faapeteriaka. Sa feagai o ia ma le tele o faigata i lona soifuaga, ma ona e le’i i ai se tasi e umia le perisitua i lona aiga, sa ia le maua ai ni faamanuiaga se tele faaleperisitua. Semanu e maua e ia le faamafanafanaga e se faamanuiaga faapeteriaka i taimi sa ia matua manaomiaina ai.

Le au matutua, afai e te leʻi mauaina se faamanuiaga faapeteriaka, faamolemole aua e te popole! E eseese faasologa faaleagaga o taimi o tagata uma. Afai ua 35 pe 85 ou tausaga ma ua i ai sou mana’o, talanoa i lou epikopo e uiga i le mauaina o lou faamanuiaga.

Tagata fou o le Ekalesia, pe ua outou faalogo i faamanuiaga faapeteriaka? Ou te le’i iloaina e uiga i le avanoa e maua ai se faamanuiaga ina ua ou auai i le Ekalesia, ae na ta’u mai e lo’u epikopo pele ia te au e uiga i faamanuiaga faapeteriaka ma fautuaina a’u e sauniuni mo le mauaina o lo’u faamanuiaga pe a uma ona ou papatiso. O’u uso fou e o le ekalesia, e mafai foi ona maua sou faamanuiaga faapeteriaka. O le a fesoasoani le Alii ia te oe e sauniuni ai mo lenei avanoa paia.

Se’i o tatou mafaufau i faamoemoega e lua o se faamanuiaga faapeteriaka:

O se faamanuiaga faapeteriaka o loo i ai se fautuaga patino mai le Alii ia te oe.²
O se faamanuiaga faapeteriaka e tautino mai ai lou tupuaga i le aiga o Isaraelu.

O lou faamanuiaga faapeteriaka o se savali mai lou Tama Faalelagi ma e ono aofia mai ai folafolaga ma se fautuaga musuia e taiala ai oe i lou olaga atoa. O le a le faatulagaina mai e se faamanuiaga faapeteriaka lou olaga pe tali uma ai au fesili. Afai e le ta’ua mai ai se mea taua e tupu i lou olaga, aua ne’i avea lena mea e te faapea ai o le a e le maua lena avanoa. E faapena foi, e leai se faamaoniga faapea o le a taunuu mea uma o lou faamanuiaga i lenei olaga. O se faamanuiaga faapeteriaka e faavavau, ma afai e te ola agavaa, o folafolaga e le faataunuuina i lenei olaga o le a e maua i le isi olaga.³

A e mauaina se tautinoga o lou tupuaga, o le a e iloa ai o oe lava o se tasi o le aiga o Isaraelu ma o le fanau a Aperaamo.⁴ Ina ia malamalama i le taua o lenei mea, ia taulai i folafolaga na faia e le Alii i le aiga o Isaraelu e ala atu ia Aperaamo.

O na folafolaga e aofia ai:

“O le a toatele Lana fanau (tagai i le Kenese 17:5–6; Aperaamo 2:9; 3:14).
“O Lana fanau, po o suli, o le a maua le talalelei ma tauavea le perisitua (tagai i le Aperaamo 2:9).
“E ala atu i auaunaga a lana fanau, ‘o le a manuia ai aiga uma o le lalolagi, i faamanuiaga lava o le Talalelei, o faamanuiaga ia o le olataga, o le ola faavavau lava’ (Aperaamo 2:11).”⁵

I le avea ai ma tagata o le Ekalesia, o i tatou o fanau o le feagaiga.⁶ Tatou te maua faamanuiaga o le feagaiga faaAperaamo pe a tatou usiusitai i tulafono ma sauniga o le talalelei.

O le a fesoasoani tapenaga mo lou faamanuiaga faapeteriaka ia te oe e faateleina ai lou faatuatua i le Tama Faalelagi ma Iesu Keriso. Ma a e mauaina lou faamanuiaga faapeteriaka ma faitau ma manatunatu loloto i ai, e mafai ona e taulai soo atu ia i La’ua.

Na faamatala mai e Peresitene Thomas S. Monson, “O le Alii lava lea e tasi na saunia se Liahona mo Liae ua saunia mo oe ma au i aso nei se meaalofa e tulagaese ma taua e tuuina mai ai le taitaiga i o tatou olaga, e faailoga ai tulaga lamatia i lo tatou saogalemu, ma faatulaga le ala, e oo lava i le ala saogalemu—e le mo se nuu folafolaina, ae i lo tatou aiga faalelagi.”⁷

A’u epikopo pele, matua, peresitene o korama a toeaina ma Aualofa, taitai misiona o uarota, uso ma tuafafine o auaunaga, faamolemole ia uunaia na alii talavou ma tamaitai talavou, le au matutua o le ekalesia, ma tagata fou o ē le’i mauaina lava o latou faamanuiaga faapeteriaka e saili le taitaiga a le Alii ma fesoasoani i le tapenaina o i latou lava ia ia faia.

Ou te faitauina soo ma le agaga tatalo lo’u faamanuiaga faapeteriaka; e aumaia ai lava ia te au e lē aunoa se faamalosiauga. Ua ou iloa le mea ua faamoemoeina mai e le Alii ia te au, ma ua fesoasoani ia te au e salamo ma lotomaualalo. Pe a ou faitauina ma mafaufau loloto i ai, ou te naunau e ola agavaa mo le mauaina o ona faamanuiaga folafolaina.

E pei lava o tusitusiga paia tatou te faitauina faatele e i ai foi faauigaga fou mo i tatou mulimuli ane, o le a i ai foi i o tatou faamanuiaga faapeteriaka se faauigaga ese mo i tatou i taimi eseese. Ua i ai foi se uiga ese o lo’u faamanuiaga i le taimi nei nai lo le mea sa i ai ina ua 30 o’u tausaga ma ina ua ou 50. E le faapea ua suia upu, ae tatou te vaai atu i ai i se ala e ese.

Na tautino mai e Peresitene Dallin H. Oaks e faapea o se faamanuiaga faapeteriaka “ua tuuina mai i lalo o le musumusuga a le Agaga Paia ma e tatau ona faitauina ma faaliliuina i lalo o le uunaiga a lena lava Agaga e tasi. O le uiga ma le taua o se faamanuiaga faapeteriaka o le a aoao mai i lea fuaiupu ma lea fuaiupu i le aluga o taimi e le mana o lena lava Agaga e tasi na musuiaina.”⁸

Uso e ma tuafafine, ou te molimau atu o loo soifua le Tama Faalelagi ma Lona Alo Pele, o le Alii o Iesu Keriso. E alolofa i La’ua ia i tatou. O faamanuiaga faapeteriaka o meaalofa paia mai ia i La’ua. A e mauaina lou faamanuiaga, o le a e iloa ai ma lagonaina lo La’ua alolofa ia te oe ma lo La’ua taulai atu ia te oe lava ia.

O le Tusi a Mamona o se tasi molimau ia Iesu Keriso. Ma ou te faafetai i le ta’ita’ia ai e se perofeta soifua, o Peresitene Russell M. Nelson.

Ou te matuai faafetai lava mo lo tatou Faaola, o Iesu Keriso. O lenei Aso Sa o le Eseta o le a taula’i atu ia te Ia ma Lona Toetu ma tapuai atu ai ia te Ia ma avatu le faafetai mo Lana togiola. Ou te iloa na matua’i loloto Lona puapuagatia ona e matua’i loloto foi Lona alofa ia i tatou. Ou te iloa sa toetu mai o Ia ona o Lona alofa mo i tatou. E moni o Ia. Ou te molimau atu ai i le suafa o Iesu Keriso, amene.