2023
“[Ia] Mau Oe ia te A’u, ma A’u ia te Oe; O Lea, Savali Faatasi ma A’u”
Me 2023
13:26

“[Ia] Mau Oe ia te A’u, ma A’u ia te Oe; O Lea, Savali Faatasi ma A’u”

Saunia e Elder David A. Bednar

O Le Korama a Aposetolo e Toasefululua

O le folafolaga a le Faaola e mau ia i tatou e moni lava ma o loo avanoa mo tagata tausi feagaiga uma o Lana Ekalesia toefuataiina.

O le perofeta anamua o Enoka, o loo faamatalaina i le Feagaiga Tuai, le Mataupu Faavae ma Feagaiga, ma le Penina Tau Tele,1 sa avea ma tufugaaao i le faatuina o le nuu o Siona.

O le tala faatusi paia o le valaauga o Enoka e auauna atu ua ta’u mai ai e faapea “sa faalogoina e ia se leo mai le lagi, ua fetalai mai: Enoka, loʼu atalii e, vavalo atu i lenei nuu, ma fai atu ia te i latou—Ia salamo, … ona ua solo malō o latou loto, ma ua feū o latou taliga e faalogo, ma ua le mafai ona vaai mamao o latou mata.”2

“Ma ina ua faalogo Enoka i nei upu, sa ifo o ia lava i le eleele, … ma tautala atu i luma o le Alii, ua fai atu: Aisea ua amanaia ai aʼu i lau silafaga, ma o aʼu ua nao se tama, ma ua inoino mai tagata uma ia te aʼu; ona e amu laʼu tautala; o lea, aisea ua avea ai aʼu ma au auauna?”3

Faamolemole matau o le taimi lena o le valaauga o Enoka e auauna atu, sa ia iloa lelei ona vaivaiga ma tapulaa faaletagata. E pei ona ou masalomia o i tatou uma e i ai lava se taimi i la tatou auaunaga i le Ekalesia, e matuai lagonaina ai lava le faapei o Enoka. Ae ou te talitonu o le tali atu o le Alii i le fesili faatauanau a Enoka, e aoaoina ai ma e faatatau foi ia i tatou taitoatasi i aso nei.

“Ma sa fetalai mai le Alii ia Enoka: Alu atu ma fai e pei ona Ou poloaiina ai oe, ma e leai se tagata o le a ‘atia oe. Tatala lou gutu, ma o le a faatumuina, ma o le a Ou tuu atu ia te oe upu e tautala atu ai. …

“Faauta ua i ou luga loʼu Agaga, o le mea lea o au upu uma o le a Ou taʼutonuina; ma o le a sosola ese mauga i ou luma, ma o le a liliu vaitafe mai i o latou alātafe; ma o le a mau oe ia te aʼu, ma aʼu ia te oe; o lea, savali faatasi ma aʼu.”4

Na avea mulimuli ane Enoka o se perofeta maoae ma se meafaigaluega i aao o le Atua e faataunuuina ai se galuega tele, ae e le o le ala lena na ia amataina ai lana galuega! Ae, sa faateleina lona gafatia i le mavae ai o se taimi a o ia aoao e mau ma savavali faatasi ma le Alo o le Atua.

Ou te tatalo ma le lotofaamaoni mo le fesoasoani a le Agaga Paia a o tatou mafaufauina faatasi le fautuaga na tuuina atu ia Enoka e le Alii, ma pe o le a sona uiga mo oe ma a’u i le asō.

O Le a Mau Oe ia te A’u

Ua tuuina mai e le Alii o Iesu Keriso ia i tatou taitoatasi le valaaulia e mau ia te Ia.5 Ae faapefea ona tatou aoao moni ma o mai e mau ia te Ia?

O le upu mau o lona uiga o le tumau o le pipii po o le mautu ma onosai e aunoa ma le faamatuu atu. Na faamatala e Elder Jeffrey R. Holland e faapea o le “mau” o se faatinoga o lona uiga “‘[ia] nofo ai--ae [ia] nofo ai e faavavau.’ O le valaau lena o le savali o le talalelei i … tagata uma … i le lalolagi. Ia o mai, ae o mai ma tumau ai. O mai ma le talitonuga ma le mausali. O mai e nofomau, mo lo outou manuia ma le manuia o tupulaga uma o e e tatau ona mulimuli mai ia te outou.”6 O le mea lea, tatou te mau ia Keriso a o tatou mautu ma mausali i lo tatou tuuto i le Togiola ma Ona faamoemoega paia, i taimi lelei ma taimi leaga.7

E amata ona tatou mau i le Alii e ala i le faaaogaina o lo tatou faitalia tatau e tauave i o tatou lava luga o Lana amo8 e ala i feagaiga ma sauniga o Lana talalelei toefuataiina. O le sootaga o a tatou feagaiga ma lo tatou Tama Faalelagi ma Lona Alo toetu ma soifua o le faapogai faalelagi lea o le vaaiga, faamoemoe, malosi, filemu, ma le olioli tumau; o le faamau papa mausali foi9 lea e tatau ona tatou fauina ai o tatou olaga.

Tatou te mau ia te Ia e ala i le faaauau pea ona taumafai e faamalolosia fusi o a tatou feagaiga taitoatasi ma le Tama ma le Alo. Mo se faataitaiga, o le tatalo ma le lotonaunau i le Tama e Faavavau i le suafa o Lona Alo Pele e faalolotoina ai ma faamalosia ai o tatou sootaga o feagaiga ma i La’ua.

Tatou te mau ia te Ia e ala i le taumamafa moni i afioga a Keriso. O aoaoga faavae a le Faaola e tosina atu ai i tatou, o ni fanau o le feagaiga, latalata ia te Ia10 ma o le a ta’u mai ai ia i tatou mea uma e tatau ona tatou faia.11

Tatou te mau ia te ia e ala i le sauniuni ma le lotonaunau e auai i le sauniga o le faamanatuga, e toeiloilo ai ma toemanatunatu ai i folafolaga o a tatou feagaiga ma salamo ai ma le faamaoni. Pe a tatou aai ma feinu i le faamanatuga, tatou te molimau atu ua tatou naunau e tauave i o tatou luga le suafa o Iesu Keriso ma taumafai malosi “e manatua pea o ia”12 pe a mavae se vaitau puupuu e moomia e auai ai i lena sauniga paia.

Tatou te mau foi ia te Ia e ala i le auauna atu i le Atua a o tatou tautuaina Ana fanau ma auauna atu i o tatou uso ma tuafafine.13

Sa fetalai mai le Faaola, “Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.”14

Ua ou faamatalaina faapuupuu le tele o auala e mafai ai ona tatou mau i le Faaola. Ma ou te valaauliaina nei i tatou taitoatasi o Ona soo e ole atu, saili, tu’itu’i atu, ma aoao mo i tatou lava e ala i le mana o le Agaga Paia isi auala ‘anoa e mafai ona tatou avea ai Keriso ma totonugalemu o o tatou olaga i mea uma tatou te fai.

Ma A’u ia te Oe

O le folafolaga a le Faaola i Ona soo e alalua: afai tatou te mau ia te Ia, o le a mau foi o Ia ia i tatou. Ae pe moni ea e mafai e Keriso ona mau ia te oe ma a’u--taitoatasi ma patino? O le tali i lenei fesili o se ioe mautinoa lava!

I le Tusi a Mamona, tatou te aoao ai e uiga i aoaoga a Alema ma molimau atu ai i e matitiva ia na ave o latou mafatiaga ma mea e faamalosia ai i latou ia lotomaualalo. I ana aoaoga, sa ia faatusaina ai le upu i se fatu lea e tatau ona totoina ma faafailele, ma sa ia faamatalaina “o le upu” o le ola, misiona, ma le taulaga togiola a Iesu Keriso.

Fai mai Alema, “Amata ona talitonu i le Alo o le Atua, o le a afio mai o Ia e togiola Ona tagata, ma o le a mafatia ma maliu o Ia e togiola mo a latou agasala; ma o le a toetu mai o Ia mai le oti, lea o le a faataunuu ai le toetutu mai, o le a laulaututu ai tagata uma i Ona luma, e faamasinoina i le aso faamasino mulimuli, e tusa ma a latou galuega.”15

O lea faamatalaga e Alema o “le upu”, faamolemole mafaufau i le sootaga musuia ua ia faailoa mai ai.

“Ma o lenei … ou te manao ia outou toto lenei upu i o outou loto, ma a amata ona malena aʼe ia faapea ona tausia i lo outou faatuatua. Ma faauta, o le a avea ma laau, e puna ae i totonu o outou i le ola tumau-faavavau. Ma ona talosia lea ia tuuina mai e le Atua ia te outou ia māmā a outou avega, e ala i le olioli o lona Alo. Ma o nei mea uma lava e mafai ona outou faia, pe afai tou te loto i ai.”16

O le fatu e tatau ona tatou taumafai malosi e toto i o tatou loto o le upu--o le ola, misiona, ma aoaoga faavae a Iesu Keriso. Ma a o fafagaina le upu e ala i le faatuatua e mafai ona avea ma laau, e puna ae i totonu o i tatou i le ola tumau-faavavau.17

O le a le faatusa o le laau i le faaaliga vaaia a Liae? E mafai ona manatu i le laau o se faatusa o Iesu Keriso.18

O’u uso e ma tuafafine pele, pe o i ai le Upu i totonu o i tatou? Pe o tusia upumoni o le talalelei a le Faaola i “papatusi aano o o tatou loto?19 Pe o tatou o mai ea i ai ma i’u ina avea atili e faapei o Ia? Pe o ola le laau o Keriso i totonu o i tatou? Pe o tatou taumafai malosi ea e avea o ni “[tagata] fou”20 ia te Ia?21

Atonu o lea gafatia ofoofogia na musuia ai Alema e fesili: “Ua fanauina ea outou faaleagaga i la le Atua? Ua outou maua ea ona foliga i o outou mata? Ua oo ea lenei liuga tele i o outou loto?”22

E ao ina tatou manatua pea le faatonuga a le Alii ia Enoka: “O le a mau oe ia te au, ma a’u ia te oe.”23 Ma ou te molimau atu o le folafolaga a le Faaola e mau ia i tatou e moni ma o loo avanoa mo tagata tausi feagaiga uma o Lana Ekalesia toefuataiina.

O Lea Savali Faatasi ma Aʼu

Na apoapoai atu le Aposetolo o Paulo i le au talitonu o e sa taliaina le Alii: “Ia savavali ai outou o ia te ia.”24

O le savavali ai ma faatasi ma le Faaola ua faamamafaina mai ai itu taua se lua o le avea ai ma soo: (1) o le usitai i poloaiga a le Atua, ma le (2) o le manatuaina ma faamamaluina ia feagaiga paia ia e fesootai ai i tatou i le Tama ma le Alo.

Na tautino mai e Ioane:

“O le mea foi lea tatou te iloa ai ua tatou iloa o ia, pe afai tatou te tausi i ana poloaiga.

“O sē faapea ua ou iloa o ia, ae le tausi e ia i ana poloaiga, o le pepelo lava lea, e le o i totonu ia te ia le upumoni.

“A o lē tausi i lana afioga, e moni, ua atoatoa le alofa i le Atua i totonu ia te ia: o le mea lea ua tatou iloa ai o i totonu ia te ia i tatou.

“O lē faapea o loo tumau ia i totonu ia te ia, e tatau ona savali o lena tagata faapei ona savali o ia.”25.”

Ua augani mai Iesu ia i tatou taitoatasi, “Sau, mulimuli mai ia te a’u”26 ma “savavali faatasi ma a’u.”27

Ou te molimau atu a tatou fetuleni atu i luma i le faatuatua ma savavali i le agamalu o le Agaga o le Alii,28 e faamanuiaina i tatou i le malosi, taitaiga, puipuiga, ma le filemu.

Molimau ma le Folafolaga

Ua faamatala mai e Alema se talosaga alofa mai le Alii i tagata soifua uma:

“Faauta, ua ia auina mai se valaaulia i tagata uma, ona ua faaloaloa mai ia te i latou aao o le alofamutimutivale ma ua ia fetalai: Ia salamo, ona ou talia lea o outou.

“… O mai ia ia te au ma o le a outou aai ai i le fua o le laau o le ola; ioe, o le a outou aai ma feinu saoloto i le areto ma vai o le ola.”29

Ou te faamamafa atu le atoaga a’ia’i o le aioiga a le Faaola. Ua naunau o Ia e faamanuia tagata taitoatasi o loo soifua nei, o e na soifua, ma e o le a soifua ai i le fogaeleele, i Lona alofa tunoa ma le alofa mutimutivale.

E talia e nisi tagata o le Ekalesia pe a folafola faafia mai aoaoga faavae moni, mataupu faavae, ma molimau mai lenei pulelaa i le Maota Autu mo Konafesi ma i potopotoga i le lotoifale i le salafa o le lalolagi--ae e ono faigata lava ona talitonu i nei upumoni faavavau ma faatatau patino i o latou olaga ma i o latou tulaga. Latou te talitonu faamaoni ma galulue ma le lotonuu, ae o o latou sootaga i feagaiga ma le Tama ma Lona Alo togiola e le’i avea lava o se mea moni o ola ma suia i o latou olaga.

Ou te folafola atu e ala i le mana o le Agaga Paia, e mafai ai ona e iloa ma lagonaina o upumoni o le talalelei sa ou taumafai e faamatala atu, e mo outou --mo outou taitoatasi ma patino.

Ou te molimau atu ma le olioli o Iesu Keriso o lo tatou Faaola ma le Togiola alofa ma soifua. Afai tatou te mau ia te Ia, o le a mau foi o Ia ia i tatou.30 A tatou savavali foi ia te ia ma faatasi ma Ia, o le a faamanuiaina i tatou e fua mai ni fua e tele. Ou te molimau atu ai i le suafa paia o le Alii o Iesu Keriso, amene.

Faamatalaga

  1. Tagai i le Kenese 5:18–24; Mataupu Faavae ma Feagaiga 107:48–57; Mose 6–7.

  2. Mose 6:27.

  3. Mose 6:31.

  4. Mose 6:32, 34; ua faaopoopo le faamamafa.

  5. Tagai i le Ioane15:4–9.

  6. Jeffrey R. Holland, “Ia Tumau ia te A’u,” Liahona, Me 2004, 32.

  7. Tagai i le Ioane 15:10.

  8. Tagai i le Mataio 11:29–30.

  9. Tagai i le Helamana 5:12.

  10. Tagai i le 3 Nifae 27:14–15.

  11. Tagai i le 2 Nifae 32:3.

  12. Moronae 4:3; 5:2.

  13. Tagai i le Mosaea 2:17.

  14. Ioane 15:10.

  15. Alema 33:22.

  16. Alema 33:23; ua faaopoopo le faamamafa.

  17. Tagai i le Alema 26:13.

  18. Sa ou faamatalaina lenei mataupu faavae i se faigalotu i i le 2017:

    “Sa ‘amata [e Alema] ona talai atu o le afioga a le Atua i le nuu, i le ulu atu i o latou sunako, ma o latou fale; ioe, ma e oo lava i o latou auala sa latou talai atu ai le afioga i o latou magaala’ [Alema 31:1; ua faaopoopo le faamamafa]. Sa ia faatusaina foi le afioga a le Atua i se fatu.

    “‘O lenei, afai e te tuu ane se avanoa, e mafai ona toto ai o se fatu i lou loto, faauta, afai o se fatu moni, po o se fatu lelei, afai e te le tiaia i fafo i lou le talitonu, e te tetee ai le Agaga o le Alii, faauta, o le a amata ona malena ae i totonu o lou fatafata; ma pe a e lagona ia faalogona o le malena ae, o le a amata ona e fai ifo ia te oe lava—Ua tatau ona lelei lenei fatu, pe ua lelei le afioga ona ua amata ona faalauteleina ai loʼu agaga; ioe, ua amata ona faamalamalama ai loʼu malamalamaaga, ioe, ua amata ona suamalie ia te au’ [Alema 32:28; ua faaopoopo le faamamafa].

    “O le mea malie, e avea se fatu lelei o se laau e faapei ona totoina i se loto ma amata ona malena a’e, tatupu, ma ola.

    “Ma faauta, pe a amata ona tupu o le laau, o le a outou faapea ane: Sei o tatou tausia ma le faaeteete tele, ina ia mafai ona mauaa, ina ia mafai ona tupu ae, ma fua mai ni fua mo i tatou. Ma o lenei faauta, afai tou te tausi i ai ma le faaeteete tele o le a mauaa, ma tupu ae, ma fua mai.

    “Ae afai e te tuulafoai i le laau, ma le manatu i ai mo lona tausiga, faauta o le a le mauaa; ma pe a oo mai le vevela o le la ma mu ai, talu ai ona ua leai ni ona aa, o le a mamae, ma o le a e liaina i luga ma lafo i fafo.

    “O lenei, sa lei tupu mai lenei mea ona e faapea sa le lelei le fatu, pe faapea foi ona sa le manaomia ona fua; ae ua tupu mai ona ua naumati lou eleele, ma sa e le fia tausia le laau, o lea ua le mafai ai ona e maua o ona fua.

    “Ma o lea, afai tou te le tausia le afioga, ma tepa taulai i luma ma le mata o le faatuatua i lona fua, e le mafai lava ona outou tauina le fua o le laau o le ola.

    “‘Ae afai tou te tausia le afioga, ioe, tausi le laau ina ua amata ona ola mai, i lo outou faatuatua ma le filiga tele, ma le onosai, ma tepa taulai i luma i lona fua o le a mauaa; ma faauta o le a avea ma laau e puna ae i le ola tumau-faavavau’ [Alema 32:37–41; ua faaopoopo le faamamafa].

    “… O le vaega tutotonu o le miti a Liae o le laau o le ola—o le faatusa lea o le “alofa o le Atua’ [1 Nifae 11:21–22].

    “‘Aua na faapea lava ona alofa mai o le Atua i le lalolagi, na Ia aumai ai Lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau’ [Ioane 3:16].

    “O le soifua mai, soifuaga, ma le taulaga togiola a le Alii o Iesu Keriso, o faaaliga aupito maoae ia o le alofa o le Atua mo Lana fanau. E pei ona molimau mai o Nifae, o lenei alofa ua ‘silisili atu ona manaomia i mea uma’ ma ‘silisili ona olioli i le agaga’ [1 Nifae 11:22–23; tagai foi i le 1 Nifae 8:12, 15]. Mataupu 11 o le 1 Nifae o loo tolaulau mai ai se faamatalaga auiliili o le laau o le ola ua avea o se faatusa mo le ola, galuega, ma le taulaga a le Faaola—o le ‘faamaualalo o le Atua’ [1 Nifae 11:16]. E mafai ona manatu i le laau o se faatusa o Keriso.

    “O se tasi ala e mafaufau ai e uiga i le fua o le laau o se faatusa lea mo faamanuiaga o le Togiola a le Faaola. Ua faamatalaina le fua ‘e manaomia e faafiafia ai le tagata’ [1 Nifae 8:10] ma aumaia ai le olioli tele ma le naunau e faasoa atu lena olioli i isi.

    “O se mea maoae, o le autu faamalumalu o le Tusi a Mamona, o le valaaulia lea o tagata uma e o mai ia Keriso [tagai i le Moronae 10:32], o se faatumutumuga lea i le faaaliga a Liae [tagai i le 1 Nifae 8:19]” (“The Power of His Word Which Is in Us” [saunoaga na tuuina atu i le semina mo taitai misiona fou, 27 Iuni, 2017], 4–5).

  19. Tagai i le 2 Korinito 3:3.

  20. 2 Korinito 5:17.

  21. O le talafaatusa a Alema ua aoao mai ai i tatou e faapea, o le mana’o e talitonu e totoina ai le fatu i o tatou loto, o le faafaileleina o le fatu i lo tatou faatuatua e tatupu a’e ai le laau o le ola, ma o le faafaileleina o le laau e fua mai ai fua o le laau, lea e “suamalie e sili atu i mea suamalie uma” (Alema 32:42) ma e “silisili i meaalofa uma a le Atua” (1 Nifae 15:36).

  22. Alema 5:14.

  23. Mose 6:34; ua faaopoopo le faamamafa.

  24. Kolose 2:6.

  25. 1 Ioane 2:3–6; ua faaopoopo le faamamafa.

  26. Luka 18:22.

  27. Mose 6:34.

  28. Tagai i le Mataupu Faavae ma Feagaiga 19:23.

  29. Alema 5:33–34; ua faaopoopo le faamamafa.

  30. Tagai i le Ioane 15:5.