Ua Asiasi Atu Peresitene Johnson ma Peresitene Cordon i Aferika

Sa o atu Peresitene Aoao o faalapotopotoga a le Aualofa ma Tamaitai Talavou i Aferika i sasa’e ma tutotonu ia Mati e feiloai ma taitai o Au Paia o Aso e Gata Ai ma le malo ma asia nofoaga o fesoasoaniga alofa. Na amataina e le Peresitene Aoao o le Aualofa o Camille N. Johnson ma le Peresitene Aoao o Tamaitai Talavou Bonnie H. Cordon la la’ua malaga taamilo i le iva aso i Nairobi, Kenya.

Sa malaga atu Peresitene Cordon i Kenya, Uganda, le Ripapelika Temokarasi o Congo, ma le Ripapelika o Congo. “Na matou talanoa i taitai o malo sa i ai se manao e fesoasoani i aiga, ma ua matua faagaeetia lava i matou i taitai o e mananao e mulimuli ia Iesu Keriso,” na saunoa ai Peresitene Cordon. “I le avea ai ma ni taitai e faavae i le faatuatua, tatou te faasoa atu se sini masani e fesoasoani e fausia ni aiga, o lea sa ofoofogia ai.”

Sa malaga atu Peresitene Johnson i matusasa’e o Uganda faatasi ma le UNICEF (lea na uluai ta’ua o le Tupe mo Tamaiti mo Faalavelave Faafuase’i Faavaomalo a Malo Aufaatasi, lea ua ta’ua nei o le Tupe mo Tamaiti a Malo Aufaatasi) ma feiloai ai ma Au Paia o Aso e Gata Ai i Lubumbashi, le Ripapelika Temokarasi o Congo. “O se taumafaiga lenei e faia i talaatu o o tatou tagata e taulima ai manaoga—o manaoga mo fedoasoaniga alofa—o fanau a le lalolagi, ma sa matou mauaina i latou. Sa matagofie,” o le saunoaga lea a Peresitene Johnson e uiga i le malaga ma le UNICEF. “Sa o se faamafanafana loto ma le loto mafatia i le taimi lava e tasi, ae sa ou tuua iina ma le lagonaina o le faamoemoe.”