Alan T. Phillips

Fitugafulu o le Pulega Aoao

Mai lava i lona laitiiti, sa lagona e Elder Alan T. Phillips e moni le Ekalesia, ae sa faamoemoe o ia mo se molimau patino e uiga i le Faaola a o lei malaga atu i le galuega faafaifeautalai.

“Sa ou anapogi, tatalo, alu i le togavao,” o lana tala lea. “Sa ou saili mo le tali telē.”

Ona oo lea i le tasi le vaiaso a o toesea lona aiga i se tofiga, sa ia auai na o ia i le sauniga faamanatuga.

“Ou te le’i alu e saili. Sa na ona ou i ai iina—sauniuni mo le faamanatuga ma pepese faatasi ma le potopotoga,” o lana tala lea. “Mo le taimi muamua, o upu ma le manatu o ’ona lima ua tuia ma ua lavatoto e totogi le aitalafu’¹ mo a’u sa na ona oso mai i fafo ma ulufale mai i lo’u loto. Sa ou lagonaina le moni o Ia e faatatau ia te au, ua le na o se manatu faavae, ua le na o se mea e le tinoa. O ia, i lena lava taimi, o lo’u Faaola.”

Sa tatalo mulimuli ane Elder Phillips, faafetai i le Tama Faalelagi ma ta’u atu ia te Ia o le a faamaoni o ia i lona olaga atoa i lenei malamalama fou na tuuina atu e le Atua ia te ia.

O le taimi lena na faamautu atu ai ia te ia le moni o le Faaola. Sa ia fai mai o isi mea uma i lana molimau e fausia mai lena “faavae mautinoa” (Helamana 5:12).

Na soifua mai Alan Thomas Phillips i Kent, Egelani, ia Iuni 1970 ma sa soifua ae i Buckinghamshire, Egelani. Sa faaipoipo o ia ia Lindsey Iorg ia Iulai 2005 i le Malumalu o Mesa Arisona. E toafa le la fanau ma o ni tagata o le Siteki ua leva a le Ekalesia o Hyde Park i Lonetona.

Sa maua e Elder Phillips se faailoga o le tagata malaga ma se faailoga o le matuaofaiva mai le Aoga a Lonetona o Le Tamaoaiga ma le Saienisi Faaupufai. Sa galue o ia mo faalapotopotoga eseese i pisinisi, mea tautupe, ma aoga, e aofia ai le fa tausaga ua tuanai o se faatonusili faaakatemia o le Iunivesite o Brigham Young o Lonetona.

Sa auauna atu Elder Phillips i se misiona talai i le Misiona a Egelani Manaseta. Sa ia auauna atu foi o se fesoasoani i le Au Peresitene o le Eria i Europa Matu, Fitugafulu Eria, peresitene o le siteki, fesoasoani i le au peresitene o le siteki, fautua maualuga, ma se fesoasoani i se au epikopo.