Faaauau Pea le Auaunaga a Aposetolo i le Lalolagi Atoa

Sa asiasi atu Elder David A. Bednar i Suitiselani, Auseteria, Alepania, ma Hanikeri ia Oketopa 2022. I Suitiselani, sa ia asiasi atu ai i sui maualuluga o le U.N ma sui o faalapotopotoga i le lalolagi atoa lea e galulue faatasi ma le Ekalesia i galuega faatino o fesoasoaniga alofa. I isi atunuu sa ia feiloai ai ma tagata o le ekalesia, o le toatele o i latou sa avea ma paionia i le faatuatua i na atunuu.

“O loo matou feofeoai faatasi ma le Au Paia o e o loo faatuina le faavae o le Ekalesia lea o le a tumau mo augatupulaga,” na ia saunoa ai.

Mai le Nofoaga Autu mo Tagata Asiasi i le Malumalu o São Paulo i le aso 10 Novema, 2022, sa auai ai Elder Ronald A. Rasband i se faasalalauga tuusao i le Facebook, ma faasoa atu ai lana molimau i le Faaola o Iesu Keriso.

“Ia manatua pea o Iesu Keriso o le Tupu o tupu. O Ia o le Alii o alii ma le Aloalii o le Filemu,” na molimau mai ai Elder Rasband.

Ia Novema foi, sa saunoa atu ai Elder Gary E. Stevenson i le G20 Religion Forum i Bali, Initonesia. Fai mai a ia, o le faatuatua e mafai ona sili atu ona fesoasoani e foia ai faafitauli o le lalolagi pe a “latou taofimau i a latou mataupu faavae autu a o taialaina foi i latou e le malamalama ma le poto faaopoopo faalelagi.”

Na saunoa atu Peresitene M. Russell Ballard, o le Sui Peresitene o le Korama a Aposetolo e Toasefululua, i faifeautalai i le Nofoaga Autu mo le Aoaoina o Faifeautalai i le Aai o Mekisiko ia Tesema 2022 ma molimau atu i le “avanoa e folafola atu ai i le lalolagi o Iesu Keriso o le Faaola ma le Togiola o tagata uma.”

Sa asiasi atu Elder Jeffrey R. Holland i se vasega seminare i Kalefonia, ISA, ma lauga atu i tagata e tautatala faaSipaniolo i siteki e valu i Ventura, Kalefonia, ia Tesema 2022. Sa ia saunoa i le gagana Peretania ma le Sipaniolo. Sa ia uunaia tagata o le ekalesia ina ia taulai atu i le autalavou ma talosagaina le autalavou ma taitai i le aofia ina ia avea ma faifeautalai i le taimi nei ona “o loo soifua le Atua, uso e ma tuafafine, o loo soifua le Atua. E moni le Ekalesia.”

Na saunoa atu Peresitene Dallin H. Oaks, Fesoasoani Muamua i le Au Peresitene Sili, i tagata o le ekalesia ma uo a le Ekalesia i Ilinoi, Initiana, ma Wisconsin, ISA, i le aso 11 Fepuari, 2023. Sa saunoa mai o ia mai le nofoaga autu o le siteki i Wilmette, Ilinoi, ma sa faasalalauina le sauniga i siteki e 14. O le afiafi na sosoo ai, sa ia talanoa atu ai i le pe tusa ma le 900 talavou ma talavou matutua na faapotopoto i le Nofoaga Autu o le Siteki o Rockford Ilinoi. Sa faasalalauina atu le fonotaga i nofoaga faaopoopo i Ilinoi, Initiana, ma Wisconsin.

Sa faafeiloaia e tagata o le ekalesia ma volenitia o auaunaga a le Ekalesia i Initia ia Elder Dieter F. Uchtdorf a o ia asiasi atu i New Delhi, Hyderabad, ma Bengaluru mai le aso 6 o Fepuari e oo i le 17. “Matou te alolofa i a Initia ma tagata,” na alaga atu ai Elder Uchtdorf. “Sa matua ootia ma faagaeetia i matou.”

Sa aoao atu e Elder Quentin L. Cook le Au Paia i Madagascar, Zambia, ma Mozambique i le taimi o se asiasiga ia Fepuari. E silia ma le 500 tagata e le auai i le Ekalesia sa auai i se konafesi tuufaatasi a le siteki i Maputo, Mozambique, e faalogologo ai i le Aposetolo o saunoa. “Ona o le toatele naua o e sa le o ni tagata o lo tatou faatuatuaga i le sauniga o le Aso Sa, sa matou fetuunaia a matou savali ina ia aofia ai mataupu faavae faaleaoaoga faavae ma tuua ai se vaaiga lautele o le talalelei, faailoa atu le taua o perofeta, ma fausia le faatuatua ia Iesu Keriso ma Lana Togiola,” na saunoa ai Elder Cook.

Ia Fepuari, sa asiasi atu ai Elder D. Todd Christofferson i tagata o le ekalesia i Ghana, Nigeria, Ivory Coast, ma Liberia i le taimi o se asiasiga e 12 aso i le Eria o Aferika i Sisifo. O le malaga na aofia ai se fonotaga ma le peresitene o Kana. Sa latou talanoaina la latou taulaiga fefaasoaai i aoaoga ma iloiloina polokalama o le BYU–Pathway Worldwide ma le Gathering Place.

Sa asiasi atu Elder Dale G. Renlund i Honetura, Belize, Panama, Nicaragua, ma Kuatemala ia Fepuari. Sa malaga faatasi Elder Renlund ma lona faletua, o Ruth. I le taimi o lana asiasiga, sa alu ai o ia i se falemai i Nicaragua, ma sa fesoasoani Sister Renlund i se foai a le Ekalesia o pusa mo le tumama ma lavalava mo tagata fāi atu i Honduras.

Ia Mati, sa asiasi atu ai Elder Neil L. Andersen i Pasila, lea sa ia feiloai ai ma taitai iloga faalemalo, asiasi atu i le Malumalu o Brasília Pasila e le o toe mamao ona faapaiaina lea, ma aoao atu ma molimau atu i tagata o le ekalesia, faifeautalai, ma taitai i le atunuu atoa. I le taimi o le malaga maimoa, sa la feiloai ai ma Sister Kathy Andersen ma le Sa’o Tamaitai o Pasila.

I le taimi o se asiasiga ia Mati i Mekisiko, sa feiloai ai Elder Gerrit W. Gong ma Adán Augusto López, o le faifeau i totonu o Mekisiko. O López o le taitai sili ona maualuga lona lua i le malo o Mekisiko. I se fonotaga i le laumua o le Matagaluega o Totonu, sa saunoa ai Elder Gong e uiga i taumafaiga ua faia e le Ekalesia e fausia ai aiga i Mekisiko. “O le faia o lena mea, ua matou saofaga atu ai i le faamalolosia o tagata,” na ia saunoa ai.

Sa fautuaina e Elder Ulisses Soares le Au Paia o Aso e Gata Ai i le Eria o le Pasefika ina ia taulai atu pea ia Iesu Keriso. “Pe a tatou taulai atu o tatou olaga i le Faaola o Iesu Keriso ma taumafai e ola i Lana talalelei toefuataiina, e mafai ona tatou maua i taimi uma le filemu, malologa, ma le olioli i la tatou malaga,” na ia saunoa ai ia Mati i le taimi o se asiasiga i Niu Sila, Toga, ma Fiti.