2023
Pe E Te Silafia le Pogai Ua Ou Talitonu Ai o Se Kerisiano ia Keriso?
Me 2023
10:27

Pe E Te Silafia le Pogai Ua Ou Talitonu Ai o Se Kerisiano ia Keriso?

Saunia e Elder Ahmad S. Corbitt

O Le Fitugafulu

Sa manaomia ona puapuagatia, maliu, ma toetu mai Iesu Keriso e togiola ai tagata uma mai le oti faaletino ma aumaia ai le ola faavavau faatasi ma le Atua.

I se tasi afiafi i le manava ai o galuega, i tausaga ua mavae, sa pu’e ai la’u pasi masani agai i New Jersey mai le Aai o Niu Ioka. Sa iloa mai e le tamaitai sa nofo i o’u autafa le mea sa ou tusia i luga o la’u komepiuta ona fesili mai lea, “E te talitonu ia … Keriso?” Sa ou fai atu, “Ioe, ou te talitonu!” A o ma talanoa, sa ou iloaina ai faatoa siitia mai i le eria mai lona atunuu matagofie o Asia e faigaluega i se vaega e sili ona faatautava i Niu Ioka i tekinolosi o faamatalaga.

Pei ona masani ai, sa ou fesili atu ia te ia, “Pe e te silafia le pogai ua ou talitonu ai o se Kerisiano ia Iesu Keriso?” Sa tali mai foi o ia pei ona masani ai ma valaaulia au e faamatala atu ia te ia. Ae a o amata ona ou tautala atu, sa ou i ai i se tasi o na taimi lea e saputu mai ai le mau mafaufauga i lo’u mafaufau. O le uluai taimi lenei o le a ou faamatalaina ai le “mafuaaga” o le FaaKerisiano i se tasi e matua le masani i ai, ma e maualuga le atamai. Sa le mafai le na ona ou faapea atu, “Ou te mulimuli ia Iesu Keriso ona sa Ia loto e puapuagatia ma maliu mo a’u agasala.” Atonu e ono mafaufau o ia, “Pe na tatau ona maliu Iesu? Pe e le mafai e le Atua ona faamagalo ma faamama i tatou mai a tatou agasala pe a tatou ole atu ia te Ia e fai?”

Mata e faapefea ona e tali atu i ni nai minute? E faapefea ona e faamatala lenei mea i se uo? Tamaiti ma le autalavou: faamolemole e mafai ona tou fesili i tou matua po o se taitai i se taimi mulimuli ane, “Pe aisea na tatau ai ona maliu Iesu?” Ma, uso e ma tuafafine, e i ai se mea e tatau ona ou ta’u atu: e ui i mea uma na ou manatu sa ou iloa e uiga i aoaoga faavae, talafaasolopito, aiaiga faavae, ma isi mea a le Ekalesia, e le’i faigofie ona oo mai le tali i lenei fesili tupito i lo tatou faatuatuaga. I lena aso sa tonu ai ia te a’u e taulai atili atu i mea e sili ona taua i le ola e faavavau.

Ia, sa ou faailoa atu i la’u uo fou1 e i ai so tatou agaga e faaopoopo i se tino ma o le Atua o le Tama o o tatou agaga.2 Sa ou ta’u atu ia te ia sa tatou ola faatasi ma lo tatou Tama Faalelagi ae tatou te lei fananau mai i lenei lalolagi faitino.3 Ona e alofa o Ia ia te ia ma Ana fanau uma, sa Ia faia ai se fuafuaga mo i tatou ia maua se tino i le faatusa o Lona tino faamamaluina,4 avea o se vaega o se aiga,5 ma toe foi atu i Lona afioaga alofa e olioli ai i le ola e faavavau ma o tatou aiga,6 faapei ona Ia faia i Lona aiga.7 Ae, sa ou fai atu, o le a tatou fetaiai ma faalavefau autu se lua i lenei lalolagi pa’ū:8 (1) o le oti faaletino—o le tuueseeseina o o tatou tino mai o tatou agaga. O le mea moni, sa ia iloa o le a tatou oti uma. Ma le lona (2) o le oti faaleagaga—o lo tatou tuueseeseina mai le Atua ona o a tatou agasala, mea sese, ma faaletonu a’o faavāvāmamaoina e le olaga faitino i tatou mai Lona afioaga paia.9 Sa ia iloa foi lenei mea.

Sa ou faailoa atu ia te ia o se aafiaga lea o le tulafono o le faamasinotonu. O lenei tulafono faavavau e moomia ai se faasalaga e faavavau ia totogia mo a tatou agasala uma po o soliga o tulafono po o upumoni a le Atua, pe o le a le mafai lava ona tatou toe foi atu e mau i Lona afioaga paia.10 O le a le amiotonu, ma o le Atua “e le mafai ona teena le faamasinotonu.”11 Sa malamalama o ia i lenei mea ae sa faigofie ona ia pu’e maia e alofa mutimutivale foi le Atua, e alofa, ma e naunau e aumaia lo tatou ola e faavavau.12 Sa ou faailoa atu i la’u uo e faapea o le i ai foi se tatou fili e poto leaga, ma mamana—o le faapogai o mea leaga ma pepelo—e tetee ia i tatou.13 O le mea lea, o le a manaomia ai se tasi e i ai le mana faaleatua e le iu e faatoilalo ai na tetee ma faalavefau ina ia laveaiina ai i tatou.14

Ona ou faasoa atu lea ia te ia o le tala lelei—le tala lelei e olioli tele ai … i tagata uma”15—e faapea “Aua ua alofa mai le Atua i le lalolagi, ua ia auina mai ai Lona Alo pele e toatasi, ina ia le fano se tasi e faatuatua ia te ia, ae ia maua le ola e faavavau.”16 Sa ou molimau atu i la’u uo, ma ou te molimau atu foi ia te outou, o Iesu Keriso o le Faaola lena, sa tatau ona puapuagatia o Ia, maliu, ma toetu mai—Lana Togiola e le i’u —e togiola ai tagata uma mai le oti faaletino17 ma aumaia ai le ola faavavau faatasi ma le Atua ma o tatou aiga18 ia i latou uma o e mulimuli ia te Ia. Ua tautino mai e le Tusi a Mamona, “O lea ua … maua ai e le Atua le manumalo i le oti; ma tuu atu ai le mana i le Alo e faia le puluvaga mo le fanauga a tagata … ; ua faatumuina i le [alofa mutimutivale] ma le agaalofa …; ua motusia e ia fusi o le oti, ma ua ave e ia i ona luga a latou amioletonu ma a latou solitulafono, ina ua ia togiolaina i latou, ma faamalie manaoga o le faamasinotonu.”19

O laasaga na faaali mai e le Atua e tatau ona tatou laasia e mulimuli ai ia Iesu ma maua le ola e faavavau, ua ta’ua o aoaoga faavae a Keriso. E aofia ai le “faatuatua ia Iesu Keriso ma Lana Togiola, salamo, papatisoga [i Le Ekalesia a Iesu Keriso o le Au Paia o Aso e Gata ai], mauaina o le meaalofa o le Agaga Paia, ma tumau e oo i le iuga.”20 Sa ou faasoa atu nei laasaga i la’u uo, ae o ni nai auala nei na aoao mai talu ai nei e perofeta ma aposetolo i le auala e mafai ai e aoaoga faavae a Keriso ona faamanuiaina fanau uma a le Atua.

Na aoao mai Peresitene Russell M. Nelson: “O le mataupu mama a Keriso e mamana tele. E suia ai le olaga o tagata uma o e malamalama i ai ma saili e faatino i lona olaga.”21

Na aoao mai Elder Dieter F. Uchtdorf, “[O le taiala] o le Mo Le Malosi o le Autalavou e toa i le folafolaina atu o le mataupu a Keriso [ma le] valaauliaina o outou le [autalavou] ia faia filifiliga e faavae i le [mataupu].”22

Na aoao mai Elder Dale G. Renlund, “Matou te valaaulia faifeautalai ia faia mea o loo latou talosagaina tagata latou te aoaoina e fai: … faaaoga le aoaoga faavae a Keriso i o latou olaga [ma] la’a i luga ma tutumau ai i le ala o feagaiga.”23

O aoaoga faavae a Keriso e faamamanaina ai i latou o loo tauivi pe o lagonaina e le o ni ō le Ekalesia aua e fesoasoani ia i latou, e pei ona ta’ua e Elder D. Todd Christofferson, “e mautinoa: Na maliu Iesu Keriso mo a’u [ma] e alofa ia te au.”24

Matua, afai o tauivi lou atalii/afafine ma se mataupu faavae o le talalelei po o se aoaoga faaperofeta, faamolemole ia tetee atu i soo se ituaiga o tautala leaga25 pe faatautavā i le Ekalesia po o ona taitai. O nei faiga maualalo, faalelalolagi e le talafeagai ma outou ma e mafai ona afaina ai le faamaoni faaumiumi o lou atalii/afafine.26 E talanoa lelei tele e uiga ia te outou, o le a outou puipuia pe faufautua mo lou atalii/afafine pele pe faaali atu ni faailoga o le tutufaatasi ma ia. Ae ua ma iloa ma lo’u toalua, o Jayne mai aafiaga patino, o le aoaoina o la ma tama pele i le pogai matou te manaomia uma ai ma le naunautai ia Iesu Keriso ma le ala e faaaoga ai Lana aoaoga faavae fiafia, o le mea lea o le a faamalosia ai ma faamaloloina o ia. Se’i o tatou liliu atu i latou ia Iesu, o lo latou faufautua moni i le Tama. Na aoao mai le Aposetolo o Ioane faapea “O i latou … e tumau i le mataupu ia Keriso, … ua ia te i latou le Tama ma le Alo.” Ona Ia lapata’ia lea o i tatou ia faaeteete “ne’i alu atu ia te outou se tasi, ae le avatua lenei lava mataupu.”27

Sa ma asiasi talu ai nei ma Jayne i le vao lea na tuu ai i luga e Mose se gata apamemea i luma o le fanauga femoumoua’i a Isaraelu. Na folafola mai le Alii e faamalolo i latou uma o e utia e gata uogo pe afai e tau lava ina vaavaai atu i ai.28 O le tuuina i luga o le mataupu a Keriso i o tatou luma, o loo faia foi e le perofeta a le Alii lena lava mea e tasi, “ina ia faamalolo ai e ia o nuu uma.”29 Po o a lava ū po o tauiviga tatou te feagai i lenei vao o le olaga nei, ia aua nei faapei i tatou o ē semanu e faamaloloina i aso anamua ma i le taimi nei, ae paga lea, “e lei vaavaai atu … ona sa latou le talitonu e mafai ona faamalolo ai i latou.”30 Ua faamautu mai e le Tusi a Mamona: “Faauta, … o le ala lenei; ma ua leai se isi lava ala po o se isi suafa ua tuuina mai i lalo ifo o le lagi e mafai ona faaolaina ai o le tagata i le malo o le Atua. Ma o lenei, faauta, o le mataupu faavae lenei a Keriso.”31

O lena afiafi i New Jersey, o le faasoaina atu o le pogai tatou te manaomia ai Iesu Keriso ma Lana mataupu na ou maua ai se tuafafine fou ae mo ia o se tuagane fou. Sa ma lagonaina le molimau toafilemu, faamautinoa a le Agaga Paia. O le mea masani, sa ou valaaulia o ia e aumai faamatalaga e faafesootai ai o ia, ma faaauau ai le talanoaga ma o tatou faifeautalai. Sa fiafia o ia e faia lena mea.

“O le mea lea, se taua ina a tele o le faailoa atu o nei mea i e o nonofo i le lalolagi,” ua tautino mai e le Tusi a Mamona—ia alofa, faasoa ma valaaulia32 a o tatou faapotopotoina Isaraelu i o tatou nuu uma ma aiga—“ina ia latou iloa e leai se tagata e mafai ona mau i le afioaga o le Atua, sei vagana ai ua ala i le mana, ma le alofa mutimutivale, ma le alofa tunoa [ma le mataupu] a le Mesia Paia.”33 I le suafa o Iesu Keriso, amene.

Faamatalaga

  1. Ua ou filifili e aua ne’i faalauaiteleina le igoa o la’u uo pe faaaogaina foi se igoa fatu.

  2. Tagai Roma 8:15–17; Eperu 12:9; Mataupu Faavae ma Feagaiga 88:15.

  3. Tagai i le Ieremia 1:4–5; Mataupu Faavae ma Feagaiga 138:55–56; Aperaamo 3:22–23, 26; Taiala i Tusitusiga Paia, “Muai Olaga,” scriptures.ChurchofJesusChrist.org; “Lesona 2: O Le Ata o le Faaolataga,” Tala’i La’u Talalelei: O Se Taiala mo le Galuega Faafaifeautalai (2019), 48.

  4. Tagai i le “Lesona 2: O Le Ata o le Faaolataga,” Tala’i La’u Talalelei, 48.

  5. O le fuafuaga atoatoa a le Tama—ua faaigoaina o le fuafuaga sili o le fiafia, le ata o le faaolataga, ma le ata o le togiola, faatasi ai ma isi ta’uga—ua faatulagaina ina mafai e tagata uma e o mai i le olaga nei ona o mai i se aiga, ma o tagata uma o se itutino o se aiga. O le mea moni, e le o tulaga uma faaleaiga e lelei pe ogatusa ma faanaunauga a lo tatou Tama alofa mo Ana fanau uma, o nisi foi tulaga e matautia. Peitai, a tatou ola i le mataupu a Keriso, e fesoasoani Iesu Keriso ia tatou maua faamanuiaga uma ua i ai i le Tama mo Ana fanau, e ala i Lana fuafuaga o le alofa mutimutivale ma le atoatoa. Tagai foi i le vaefaamatalaga e 6.

  6. O se tasi o folafolaga silisili na faia e le Atua i Ana fanau o le aupito silisili foi o Ana meaalofa uma ia i tatou: faaeaga, po o le ola e faavavau, lea e ola faavavau ai “i le afioaga o le Atua ma faaauau ai pea aiga” (Gospel Topics, “Ola e Faavavau,” topics.ChurchofJesusChrist.org; tagai foi i le Mataupu Faavae ma Feagaiga 14:7). O “Aiga” e aofia ai le tane, ava, ma le fanau, faapea foi tauaiga o soifua ma e ua maliliu ua talia ma ola ai i le mataupu a Keriso. O tagata o aiga ua maliliu o i le lalolagi o agaga, o e na lei mafai ona talia le mataupu a Keriso i lenei olaga, e mafai foi ona latou maua i le lalolagi o agaga a o faatinoina ma le alofa ia sauniga sui e pei o le papatisoa, mauaina o le meaalofa o le Agaga Paia, ma isi ia e fesoasoani ai ia i tatou e tumau e oo i le iuga e tauaiga o loo soifua i malumalu o Le Ekalesia a Iesu Keriso o le Au Paia o Aso e Gata Ai. E le gata i lea, o le folafolaga o le ola faavavau e le mo na o i latou ua faaipoipo i le olaga nei. Na aoao mai e Peresitene M. Russell Ballard, “Ua faamautu mai e tusitusiga paia ma perofeta o aso e gata ai e faapea o tagata uma o e faamaoni i le tausiga o feagaiga o le talalelei o le a maua le avanoa mo le faaeaga” (“Faamoemoe ia Keriso,” Liahona, Me 2021; ua faaopoopo le faamamafa). I le ta’ua ai o Peresitene Russell M. Nelson ma Peresitene Dallin H. Oaks, na faaauau ai le saunoaga a Peresitene Ballard, “O le taimi tonu ma le auala e faaee mai ai faamanuiga o le faaeaga, e le’i faaalia uma mai, ae ui o lea ua mautinoa” (“Faamoemoe ia Keriso,” 55; ua faaopoopo le faamamafa). Na aoao mai Peresitene Nelson: “I le ala ma le taimi a le Alii lava ia, e leai se [faamanuiaga] o le a taofia mai Ana Au Paia faamaoni. O le a faamasino ma tauia e le Alii tagata taitasi e tusa ai ma le naunauga o le loto faapea foi ma galuega” (“Faaipoipoga Faaselesitila,” Liahona, Nov. 2008, 94). Sa faamatala mai e Peresitene Dallin H. Oaks, “O le tele o mea aupito taua ua faatuatuanai i ai i le olaga nei o le a faasa’oina i le Meleniuma, o le taimi lea mo le faataunuuga o mea uma e le i maea o le fuafuaga sili o le fiafia mo fanau uma agavaa a lo tatou Tama” (“O Le Fuafuaga Sili o le Fiafia,” Ensign, Nov. 1993, 75). Tagai foi i le vaefaamatalaga e 5.

  7. Tagai i le Taiala i Tusitusiga Paia, “Fuafuaga o le Togiola,” scriptures.ChurchofJesusChrist.org; tagai foi i Gospel Topics, “Ata o le Faaolataga,” topics.ChurchofJesusChrist.org; “Lesona 2: O Le Ata o le Faaolataga,” Tala’i La’u Talalelei, 48–50, 53.

  8. Tagai i le “Lesona 2: O Le Ata o le Faaolataga,” Tala’i La’u Talalelei, 49.

  9. Tagai i le “Lesona 2: O Le Ata o le Faaolataga,” Tala’i La’u Talalelei, 47–50.

  10. Tagai i le “Lesona 2: O Le Ata o le Faaolataga,” Tala’i La’u Talalelei, 47–50.

  11. Mosaea 15:27. O mau faasino i le faamasinoga tonu e faavavau po o le faamasinotonu a le Atua o loo tumu ai tusitusiga paia, ae tagai faapitoa i le Alema 41:2–8 ma le Alema 42.

  12. Tagai Alema 42: 14–24; Mose 1:39.

  13. Tagai i le “Lesona 2: O Le Ata o le Faaolataga,” Tala’i La’u Talalelei, 47–50.

  14. Tagai Alema 34:9–13; tagai foi Mosaea 13:28, 34–35; 15:1–9; Alema 42:15.

  15. Luka 2:10.

  16. Ioane 3:16.

  17. Tagai Helamana 14:15–17; Mamona 9:12–14.

  18. Tagai i vaefaamatalaga 5 ma le 6.

  19. Mosaea 15:8–9.

  20. “O Le a Lo’u Faamoemoega o se Faifeautalai?,” Tala’i La’u Talalelei, 1; tagai foi i le “Lesona 3: O Le Talalelei a Iesu Keriso,” Tala’i La’u Talalelei, 63.

  21. Russell M. Nelson, “Upumoni Mamā, Mataupu Faavae Mamā, ma Faaaliga Mamā,” Liahona, Nov. 2021, 6; ua faaopoopo le faamamafa.

  22. Dieter F. Uchtdorf, “O Iesu Keriso O Le Malosi o le Autalavou,” Liahona, Nov. 2022, 11; tagai foi Mo Le Malosi o le Autalavou: O Se Taiala i le Faia o Filifiliga (2022), 4.

  23. Dale G. Renlund, “Lifelong Conversion of Missionaries” (saunoaga na tuuina atu i le semina mo taitai misiona fou, 25 Iuni, 2021), 1, Potutusi mo Talafaasolopito o le Ekalesia, Aai o Sate Leki.

  24. D. Todd Christofferson, “O Le Aoaoga Faavae o le Avea ma ni O,” Liahona, Nov. 2022, 56; tagai foi ia D. Todd Christofferson, “O Le Olioli o le Au Paia,” Liahona, Nov. 2019, 15–18.

  25. Tagai Iakopo 4:11; Mataupu Faavae ma Feagaiga 20:54; Taiala i Tusitusiga Paia, “Tautala Leaga,” scriptures.ChurchofJesusChrist.org.

  26. Tagai Ahmad S. Corbitt, “Activism vs. Discipleship: Protecting the Valiant” (address given at the chaplains’ seminar, Oct. 2022), cdn.vox-cdn.com/uploads/chorus_asset/file/24159863/Brother_Corbitt_Chaplain_seminar.pdf; video: media2.ldscdn.org/assets/general-authority-features/2022-chaplain-training-seminar/2022-10-1000-activism-vs-discipleship-1080p-eng.mp4.

  27. 2 Ioane 1:9–10.

  28. Tagai Numera 21:5–9.

  29. 2 Nifae 25:20.

  30. Alema 33:20.

  31. 2 Nifae 31:21.

  32. Tagai “Faasalalauga i le 2021: Mataupu Faavae o le Alofa, Faasoa, ma le Valaaulia,” broadcasts.ChurchofJesusChrist.org; tagai foi ia Gary E. Stevenson, “Alofa, Faasoa, Valaaulia,” Liahona, Me 2022, 84–87.

  33. 2 Nifae 2:8.