Ua Auai Faatasi Tagata Pepese Faavaomalo ma le Aufaipese a le Tapeneko mo le Konafesi

Mo le taimi muamua, o tagata na auai e nonofo i fafo atu o le Iunaite Setete na aufaatasi i le Aufaipese a le Tapeneko i le Lotoa o le Malumalu i le taimi o le konafesi aoao.

Sa faalauteleina talu ai nei e le aufaipese lana misiona ina ia taunuu atu i se aofia i le lalolagi atoa, na saunoa ai le peresitene o le aufaipese o Michael O. Leavitt, o le na faamatalaina le polokalama faataitai o se alualu i luma masani i le tuputupu ae o le aufaipese. “O loo tatou i ai i le ala e tasi tatou te iloa ai, o le laa e tasi i le taimi—aoaoina, faaleleia, ma le ole atu i le Alii mo nisi taitaiga,” na ia saunoa ai. “Faatasi ai ma laasaga taitasi, ua manino atili ai nei e mafai ona tupu lenei mea.”

Ona o le faasologa o faataitaiga faigata a le aufaipese, ua manaomia ai tagata o le aufaipese e nonofo i totonu o le 100 maila (160 km) o le Tapeneko faasolopito i le Aai o Sate Leki. Peitai, na saunoa Uso Leavitt e tatala e le polokalama faataitai le faitotoa mo isi e i ai tomai faamusika tulaga ese e auai ai foi i se tulaga lē tumau.

Faatasi ai ma lo latou tomai faaleo, sa manaomia ai tagata auai faavaomalo e faataitai le tomai i le mataupu faavae tau musika ma le Igilisi i le taimi o le faagasologa o le filifiliga.

O i latou na filifilia e pepese faatasi ma le aufaipese na o mai mai atunuu e ono:

• Alvaro Jorge Martins o Natal, Pasila, malu

• Rodrigo Domaredzky of Curitiba, Pasila, malu

• Thalita De Carvalho o Sao Paulo, Pasila, usu lona lua

• Tubo-Oreriba Joseph Elisha of Accra, Kana, tena

• Jonathan How of Kuala Lumpa, Meleisia, tena lona lua

• Denisse Elorza Avalos o Tijuana, Mekisiko, usu lona lua

• Georgina Montemayor Wong o Monterrey, Mekisiko, usu lona lua

• Ronald Baa o Cagayan de Oro, Filipaina, tena

• Sundae Mae Indino o Cagayan de Oro, Filipaina, usu muamua

• Pei-Shan Chung (Kylie Zuani) o Taipei, Taiuani, oloto muamua

Sa auai tagata auai faavaomalo i faataitaiga a le aufaipese, auai i le a’oga a le aufaipese, asiasi i le tele o nofoaga o talafaasolopito o le Ekalesia, ma maimoaina le Lotoa o le Uelefea a le Ekalesia, Lotoa o le Malumalu, ma le Faleteuoloa Tutotonu a Epikopo.

I le faaiuga o le konafesi aoao, sa lagiina ai e tagata o le aufaipese a Iuta le “God Be with You Till We Meet Again” i tagata auai asiasi mai o se faamavaega faaiu.

Sa faailoa mai e le Epikopo Pulefaamalumalu o Gérald Caussé lona alofa ma le lotofaafetai mo tagata auai i le lalolagi atoa. “Ou te faamoemoe a outou toe foi atu i o outou atunuu, o le a outou molimau atu i lenei aafiaga ma o le a outou faatuina se tupulaga fou o tagata pese i soo se mea—i le lalolagi atoa,” na ia saunoa ai.

O le aafiaga e lua vaiaso na fesoasoani i tagata auai e lagona ai se lagona sili atu o le fesootaiga ma le lotogatasi ma le nuu o le Ekalesia. “Sa matou faaaluina le tele o taimi faatasi ma le matagaluega o musika a le Ekalesia. A o matou feiloai ai ma i latou, sa ou lagonaina moni lava le faamoemoe o taitai o le Ekalesia ia mafai e Au Paia o Aso e Gata Ai i le lalolagi atoa ona maua se aafiaga faaleagaga loloto atu e ala i musika,” o le tala lea a Pei-Shan Chung.