“Uso Bradley R. Wilcox,” Liahona, Me 2023.
Uso Bradley R. Wilcox
Fesoasoani Muamua i le Au Peresitene Aoao o Alii Talavou
I le tele o tausaga a o lei auauna atu o se fesoasoani i le Au Peresitene Aoao o Alii Talavou, sa auina atu ai e Uso Bradley R. Wilcox ma lona faletua, o Debi, lo la atalii e 14 tausaga le matua i le Faapitoa mo le Autalavou (EFY) i le Iunivesite o Brigham Young.
Sa la popole ona sa “leai sona ivi faaleagaga i lona tino.” Sa foi mai le talavou i le fale ua ese—sa sili atu ona taulai ma nofouta i mea faaleagaga. I le taimi nei, i ni tausaga mulimuli ane, o loo auauna atu o ia i se au epikopo ma fautuaina le autalavou i lana lava uarota.
O le mea lena na matauina soo e Uso Wilcox i le taumafanafana talu ai a o auai talavou o le Au Paia o Aso e Gata Ai i le salafa o le kelope i konafesi o le Mo Le Malosi o le Autalavou (MMA). O le tele o taimi, o i latou “o e sa le mautinoa sa latou mananao e o mai” na toe foi i le fale i se tulaga ese ma sili atu.
O Uso Wilcox—o le sa auauna atu o se Fesoasoani Lua i le Au Peresitene Aoao o Alii Talavou talu mai le 2020 ma sa lagolagoina o se Fesoasoani Muamua i le konafesi aoao ia Aperila 2023—na saunoa mai o se taimi fiafia lenei e auauna atu ai i le autalavou o le Au Paia o Aso e Gata Ai. O Au Peresitene Aoao o Alii Talavou ma Tamaitai Talavou o loo galulue faatasi e le aunoa, ma “o konafesi, taiala, ma mekasini a le MMA o loo aapa atu i le tele o talavou nai lo se isi lava taimi.”
Sa soifua mai Bradley Ray Wilcox, ua 63, i Provo, Iuta, ISA, i le aso 25 Tesema, 1959 ia Ray T. Wilcox ma Val C. Wilcox. Sa soifua ae o ia i Provo ae sa faaaluina ni nai tausaga a o laitiiti i Itiopia.
Ina ua maea lana misiona talai i le Misiona a Chile Viña del Mar, sa faaipoipo Uso Wilcox ia Deborah Gunnell i le Malumalu o Provo Iuta i le aso 7 Oketopa, 1982. O i laua o ni matua o se fanau e toafa ma o loo nonofo i Midway, Iuta, ISA.
Na maua e Uso Wilcox lona faailoga o le tagata malaga ma le matuaofaiva mai le Iunivesite o Polika Iaga (BYU) ma lona faailoga o le tofamanino i aoaoga mai le Iunivesite o Wyoming. O ia o se polofesa i le Matagaluega o Tusitusiga Paia Anamua i le BYU. Talu mai le 1985, ua ia tuuto atu le tele o ana taumafanafana i le polokalama o le EFY a le BYU.
Sa auauna atu Uso Wilcox o se epikopo ma i se au peresitene o le siteki, o se peresitene o le Misiona a Chile Santiago i Sasae, ma i le fono faatonu aoao o le Aoga Sa.