Manatua Mea e Aupito Sili ona Taua
O le mea e sili ona taua o a tatou sootaga ma le Tama Faalelagi ma Lona Alo Pele, o tatou aiga, ma o tatou tuaoi, ma le faatagaina o le Agaga e taiala i tatou.
A o tatou manatua i le faaiuga o lenei vaiaso le ulufale manumalo atu o le Faaola i Ierusalema i se taimi a o lei mamao Lana taulaga togiola, ou te toe ta’ua Ana fetalaiga o le faamoemoe ma le faamafanafanaga: “O au nei o le toetu ma le ola: o lē faatuatua mai ia te au, e ui lava ina oti, a e ola lava ia.”1
Ou te alofa ia te Ia. Ou te talitonu ia te Ia. Ou te molimau atu o Ia o le Toetu ma le Ola.
O lenei molimau ua faamafanafanaina ma faamalosia ai au i le aluga o le fa ma le afa tausaga ua mavae talu ona maliu lo’u toalua o Barbara. Ou te misia lava o ia.
E masani, ona ou tomanatu i la maua faaipoipoga e faavavau ma o ma olaga faatasi.
Sa ou faasoaina atu muamua le ala na ou feiloai muamua ai ia Barbara ma le ala na aoaoina ai a’u i lena aafiaga e faaaoga le tomai o le “tulitatao” lea sa ou aoaoina i la’u misiona. Sa tatau ona ou vave tulitataoina o ia ina ua mavae le ma feiloaiga muamua ona sa lalelei, lauiloa, ma sa matuai pisi lava lana kalena agafesootai. Sa vave ona ou gaualofa ona sa tausaafia ma faauogofie o ia. Sa ou faamemelo i lona agalelei. Sa ou lagonaina o ia ma a’u e tatau ona faatasi. Sa foliga mai e faigofie i lo’u mafaufau.
Sa ma tafafao faamasani ma Barbara, ma amata ai ona totogo a’e le ma mafutaga, peitai na te le’i mautinoa pe o le faaipoipo ia te a’u sa o se mea sa’o lea mo ia.
Sa le lava lo’u iloa; sa manaomia ona iloa e Barbara mo ia lava. Sa ou iloa afai ma te faaaluina le taimi e anapopogi ma tatalo faatasi ai e uiga i le mataupu, e mafai ona maua e Barbara se faamaoniga mai le lagi.
Sa ma faaaluina se faaiuga o se vaiaso e le o ai e eva ina ia mafai ona ma anapopogi ma tatalo le tagata lava ia ina ia iloa mo i ma’ua lava. O le mea na ou laki ai, sa ia maua le faamaoniga e tasi lea sa ou mauaina. O isi mea uma, pei ona latou fai mai ai, ua [tou] silafia uma.
Ina ua maliu Barbara, sa tuu e le ma fanau i luga o lona maafaamanatu ni nai lesona na manao Barbara ia o latou manatuaina. O se tasi o na lesona o le “o le mea e aupito sili ona taua o le mea lea e aupito umi lona aoga.”
O le asō o le a ou faasoa atu ai mai lo’u loto ni nai lagona ma manatu i mea e aupito sili ona taua.
Muamua, o se sootaga ma lo tatou Tama Faalelagi ma Lona Alo, o le Alii o Iesu Keriso, e aupito sili ona taua. O lenei sootaga e aupito sili ona taua i le taimi nei ma i le faavavau.
Lona lua, o sootaga faaleaiga o nisi na o mea e aupito sili ona taua.
I la’u auaunaga atoa, ua ou asia ai le tele o tagata taitoatasi ma aiga na aafia i faalavelave faanatura faataumaoi. E toatele na siitia ese, fiaaai, ma fefefe. Sa latou manaomia le fesoasoani faafomai, taumafa, ma malutaga.
Sa latou manaomia foi o latou aiga.
Sa ou iloa o nisi atonu sa le’i i ai le faamanuiaga o se aiga vavalalata, o lea sa ou faaaofiaina ai aiga lautele, uo, e oo lava i aiga o le uarota o ni “aiga.” O nei sootaga e taua mo le soifua maloloina faalelagona ma faaletino.
O nei sootaga e mafai foi ona ofo mai ai le alofa, olioli, fiafia, ma se lagona o le avea ma ni ō.
O le atinaeina o nei sootaga taua, o se filifiliga lea. O se filifiliga ia avea ma se vaega o se aiga e manaomia ai le tuuto, alofa, onosai, fesoota’i, ma le faamagalo atu.2 Atonu e i ai taimi tatou te le malilie ai i se isi tagata, ae e mafai ona tatou faia e aunoa ma le le malilie i ai. I aumoega ma faaipoipoga, tatou te le gaualofa pe gaumata’u e faapei o tatou o ni mea faitino e faaminoi solo i luga o se laupapa o le mu. Tatou te filifili e alofa ma lagolago le tasi ma le isi. Tatou te faia lea lava mea e tasi i isi sootaga faaleaiga faapea ma uo o e ua pei o ni aiga ia i tatou.
Ua ta’u mai i le folafolaga i le aiga: “o le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia ai aiga e faavavau.”3
O le isi mea e aupito sili ona taua o le mulimuli lea i uunaiga a le Agaga i a tatou sootaga aupito sili ona taua ma i a tatou taumafaiga ia alofa i o tatou tuaoi e pei o i tatou lava, e aofia ai a tatou auaunaga patino ma faalauaitele. Sa ou aoaoina lenei lesona i le popofou o lo’u olaga a o tautua ai o se epikopo.
I se tasi o afiafi po malulu ma le toulu o le kiona, sa ou tuua ai lo’u ofisa o le epikopo ae ou maua se uunaiga malosi e asiasi atu i se tina matua o le uarota ua oti lana tane. Sa ou tepa ifo i la’u uati—ua ta le 10:00 i le po. Sa ou faapea ifo ua leva tele le afiafi mo le faia o se asiasiga faapea. Ma le isi, sa toulu le kiona. Sa tonu ia te au, o le mea muamua lava i le taeao o le asiasi lea i lenei tuafafine pele nai lo le faalavelave ia te ia i le leva o le afiafi. Sa ou alu i le fale ma ou moe, peitai sa ou feliuliuai solo i le po atoa ona sa uunaia a’u e le Agaga.
I le taeao po o le aso na sosoo ai, sa ou alu atu sa’o loa i le fale o le tina ua maliu lana tane. Sa tali mai e lona alo teine le faitotoa ma fai mai ma loimata, “Oi, Epikopo, faafetai lava ua e sau. Na maliu tina i le lua itula ua te’a”—sa ou matuā mafatia lava. O le a le galo ia te a’u lagona o lo’u loto. Sa ou tagi. O ai ea na sili atu le tatau ona i ai lona epikopo e uu lona lima, faamafanafana o ia, ma atonu tuu atu ia te ia se faamanuiaga mulimuli, nai lo o lenei tina pele ua maliu lana tane? Sa ou misia lena avanoa ona sa ou tuleia ese lenei uunaiga malosi mai le Agaga.4
Uso e ma tuafafine, alii talavou ma tamaitai talavou, ma tamaiti Peraimeri, ou te molimau atu o le mulimuli i uunaiga a le Agaga o se tasi o mea e aupito sili ona taua i a tatou sootaga uma.
O le mea mulimuli, i le faaiuga o lenei vaiaso o le Aso Sa o le Laupama, ou te molimau atu o le liliu atu i le Alii, molimau atu e uiga ia te Ia, ma le auauna atu ia te Ia o isi foi mea na e aupito sili ona taua.
O le faatuatua ia Iesu Keriso o le faavae lea o a tatou molimau. O se molimau o se mau po o se faamautinoaga o upumoni faavavau e tuuina i luga o loto ma agaga o tagata taitoatasi e ala mai i le Agaga Paia. O se molimau ia Iesu Keriso, e fanau mai ma faamalosia e le Agaga, e suia ai olaga—e suia ai le ala tatou te mafaufau ai ma le ala tatou te ola ai. O se molimau e liliu atu ai i tatou agai i le Tama Faalelagi ma Lona Alo paia.
Na aoao mai Alema:
“Faauta, ou te molimau atu ia te outou, ua ou iloa o mea ua ou tautala atu ai, ua moni. Ma o le a so outou manatu e faapefea ona ou iloa lo latou moni?
“Faauta, ou te fai atu ia te outou sa faailoa mai i latou ia te au e ala i le Agaga Paia o le Atua. Faauta, sa ou anapogi ma tatalo i aso e tele ina ia mafai ona ou iloa nei mea mo au lava ia. O lenei foi, ua ou iloa mo a’u lava ua moni, aua ua faaalitinoa ia te a’u e le Alii le Atua i lona Agaga Paia.”5
O le i ai na o se molimau ua le lava lea. A o tuputupu ae lo tatou liua ia Iesu Keriso, e masani ona tatou mananao e molimau atu e uiga ia te Ia—Lona lelei, alofa, ma le agalelei.
O le mea masani i a tatou sauniga molimau i Aso Sa anapogi, e tele ina tatou faalogo ai i fuaitau, “Ou te faafetai” ma le “Ou te alofa” nai lo le faalogoina o fuaitau “Ou te iloa” ma le “Ou te talitonu.”
Ou te valaaulia outou ia tuu atu e le aunoa a outou molimau e uiga ia Iesu Keriso. Ia molimau atu e uiga i mea ua e iloa ma talitonu [i ai] ma mea e te lagona, ae le na o mea e te faafetai ai. Molimau atu e uiga i ou lava aafiaga o le iloa ma le alofa i le Faaola, i le ola ai i Ana aoaoga, ma i Lona mana togiola ma gafatia i lou olaga. A o e tuuina atu lau molimau i mea ua e iloa, talitonu, ma lagona, o le a faamautu mai e le Agaga Paia le moni ia i latou o e faalogologo ma le toto’a i lau molimau. O le a latou faia o lea ona ua latou matauina lou avea o se soo filemu o Iesu Keriso. O le a latou vaaia le uiga o le avea ma Ona soo. O le a latou lagona foi se mea atonu latou te le’i lagonaina muamua. O se molimau mamā e sau mai se loto ua suia ma e mafai ona momoliina e le mana o le Agaga Paia i totonu o loto o i latou o e ua naunau e taliaina.
O i latou o e lagona se mea o se taunuuga o lau molimau e mafai ona ole atu i le Alii i le tatalo e faamautu le moni o lau molimau. Ona mafai lea ona latou iloa mo i latou lava.
Uso e ma tuafafine, ou te tautino ma molimau atu ia te outou ua ou iloa o Iesu o le Faaola ma o le Togiola o le lalolagi. O loo soifua o Ia. O Ia o le Alo toetu o le Atua, ma o Lana Ekalesia lenei, o loo taitaiina e Ana perofeta ma aposetolo. Ou te tatalo ina ia i ai se aso pe a ou ui atu i le isi lalolagi, ia ou faia ma le mumu susulu o la’u molimau.
I la’u auaunaga, ua ou aoaoina ai o mea e aupito sili ona taua o a tatou sootaga ma le Tama Faalelagi ma Lona Alofa Pele, o o tatou aiga, ma o tatou tuaoi, ma le faatagaina o le Agaga o le Alii e taiala i tatou i na sootaga ina ia mafai ona tatou molimau atu e uiga i mea e aupito sili ona taua ma umi ona aogā. I le suafa o Iesu Keriso, amene.