“Peresitene Emily Belle Freeman,” Liahona, Me 2023.
Peresitene Emily Belle Freeman
Peresitene Aoao o Tamaitai Talavou
E toatele tagata atonu ua masani ia Emily Belle Freeman o se failauga, tusitala, podcaster, ma se faiaoga. Ae mo i latou e le silafiaina o ia—ma e oo lava ia i latou ua iloa—ua faamoemoe Peresitene Freeman o le mea muamua latou te iloa e uiga ia te ia o le, e i ai sona talitonuga loloto ma tumau ia Iesu Keriso.
“E ala mai i aafiaga patino ma Ia ua ou iloa ai le Tama Faalelagi ma ua oo ai ina ou maua faaaliga,” o le saunoaga lea a Peresitene Freeman. “O le vaega taua lena i lo’u olaga—lena mafutaga i le olaga atoa ma Ia.”
A o ia amataina lana galuega o se tusitala ma se podcaster, sa ia fesili ifo ia te ia lava po o le a le mea sa ia manao e taulai i ai. O le tali o le molimau ia Iesu Keriso ma Lana Togiola.
Sa soifua mai o ia i le aso 31 o Tesema, 1969, i Boston, Massachusetts, ISA, a o auai lona tamā, o McKinley McVichie Oswald, i le Iunivesite o Harvard. Fai mai Peresitene Freeman, o lona tina, o Leslie James Oswald, o se tasi o laina o tamaitai “e aumalosi tele ma e tele naua foi le alofa.”
O Peresitene Freeman, le ulumatua o le fanau e toaono, na soifua a’e i Sandy, Iuta. Na suia lona olaga i lona tausaga sinia i le aoga maualuga ina ua valaauina ona matua e taitai le Misiona a Kalefonia Ventura. Sa auai o ia ma ona tei i misiona uma, sone, ma konafesi faalesiteki faatasi ma o latou matua. Ina ua mae’a le aoga maualuga, sa ia tuua Kalefonia e suesue i le Iunivesite o Polika Iaga i Sate Leki.
Ina ua toe foi atu Gregory Garth Freeman, o le sa auauna atu i le Misiona a Kalefonia Ventura, i Bountiful, Iuta, sa talosagaina o ia e ona taitai misiona e alu e faalogologo i le la tama teine i se tasi o ana lauga i Iuta. E lei leva ae amata ona tafafao faamasani Emily ma Gregory ma faaipoipo ai ia Tesema 1989 i le Malumalu o Los Angeles Kalefonia. E toalima le la fanau.
Ua tusia e Peresitene Freeman le silia ma le taseni o tusi ma sa lauga i konafesi eseese, mafutaga faaleaoaoga, ma faatasiga. Sa faiaoga o ia mo le tele o tausaga i Aoga a le Ekalesia ma sa auauna atu o se faiaoga o Aoaoga Faavae o le Talalelei ma se peresitene o Tamaitai Talavou ma le Aualofa a se uarota.