Ua Aoao Mai i Tatou e le Alii o Iesu Keriso ia Tatou Auauna Atu
Faatasi ai ma le fesoasoani a lo tatou Faaola, e mafai ona tatou alolofa i Ana mamoe faapelepele ma auauna atu ia te i latou e faapei ona Ia finagalo ai.
Na fetalai mai le Alii o Iesu Keriso:
“O a’u le leoleo mamoe lelei: e tuu atu e le leoleo mamoe lelei o lona ola e sui a’i mamoe. …
“E pei ona silafia a’u e le Tama, ma ou iloa le Tama: Ou te tuuina atu foi lo’u ola e sui a’i mamoe.”1
I le lomiga Eleni o lenei mau, o le upu mo le lelei e faauigaina foi o le “matagofie, ofoofogia.” O lea la o le asō, ou te fia tautala atu ai e uiga i le Leoleo Mamoe Lelei, le Leoleo Mamoe Matagofie, le Leoleo Mamoe Ofoofogia, o Iesu Keriso.
I le Feagaiga Fou, o loo faaigoaina ai o Ia o le “leoleo mamoe sili,”2 o le “Leoleo Mamoe silisili,”3 ma “Le na te Leoleoina ma Tausia [o tatou] agaga.4
I le Feagaiga Tuai, na tusia ai e Isaia e faapea “Na Te leoleoina lona lafu e pei o le leoleo mamoe.”5
I le Tusi a Mamona, o loo ta’ua o Ia “o le leoleo mamoe lelei”6 ma “o le leoleo mamoe sili ma le faamaoni.”7
I le Mataupu Faavae ma Feagaiga, ua Ia tautino mai ai, “O lea, ou te ia te outou, o a’u foi le leoleo mamoe lelei.”8
I o tatou taimi, na tautino mai ai e Peresitene Russell M. Nelson: “O le Leoleo Mamoe lelei e tausia ma le alofa mamoe uma i Lana lafu, ma o i tatou o Ana leoleo mamoe moni o galulue i lalo o se isi leoleo mamoe. O so tatou faamanuiaga le tauaveina o Lona alofa ma ia faaopoopo lo tatou lava alofa i uo ma tuaoi—e fafaga, vaavaai, ma faafailele i latou—e pei ona finagalo ai le Faaola.”9
E le’i leva talu ai, sa saunoa ai Peresitene Nelson: “O se faailoga o le Ekalesia moni ma le ola a le Alii o le a avea pea ma se taumafaiga faatulagaina, ma faatonutonuina e auauna atu i fanau taitoatasi a le Atua ma o latou aiga. Ona o Lana Ekalesia lenei, o i tatou o Ana auauna o le a auauna atu i le tasi, e pei lava ona sa Ia faia. O le a tatou auauna atu i Lona suafa, i Lona mana ma le pule, ma i Lona agalelei alofa.”10
Ina ua muimui le au Faresaio ma le au tusiupu e faasaga i le Alii, ma “fai mai, Ua talia e lenei tagata i latou o e agasala, ma ua aai foi o ia faatasi ma i latou,”11 Sa Ia tali atu e ala i le tuuina atu o ni tala matagofie se tolu ia ua tatou iloaina o le faataoto i le mamoe na se, o le faataoto i le tupe na leiloa, ma le faataoto i le atalii faamaumau’oa.
O se mea malie le matauina ina ua folasia mai e Luka, le tusitala o le Evagelia, ia tala nei e tolu, o loo ia faaaogaina le upu faataoto i le numera tasi [segila], ae le o le numera tele [pelulale].12 E foliga mai o loo aoao mai e le Alii se lesona tulaga ese e tasi i tala e tolu—tala o loo aumaia ai numera eseese: 100 mamoe, 10 tupe, ma atalii e to’a 2.
Peitai, o le numera autu i nei tala taitasi e tolu, o le numera tasi. Ma o se lesona e mafai ona tatou maua mai i lena numera o le, atonu o oe o se leoleo mamoe i lalo o se isi leoleo mamoe, mo le 100 toeaina ma ni toeaina faaolioli i lau korama a toeaina po o se faufautua i ni tamaitai talavou e to’a 10 po o se faiaoga i tamaiti Peraimeri e to’a 2, ae o taimi uma, e te auauna atu ai e le aunoa ia i latou, vaavaaia auaua’i i latou ma alofa ia i latou ta’ito’atasi. E te le faapea lava, “Oka se mamoe ina a faavalevalea” po o le, “Ae o le mea moni lava ia, ou te le manaomia lena tupe” po o le, “Oka se faalogogata o lenei atalii.” Afai ua ia te oe ma a’u “le alofa mama o Keriso,”13 tatou te pei o le tagata i le tala o le mamoe na se, “e tuua le iva sefulu ma le iva … ma o e su’e le mamoe ua se, se’ia, [… se’ia … se’ia lava oo ina tatou] mauaina o ia.”14 Pe, faapei o le fafine i le tala o le tupe na leiloa, o le a tatou “tutu se afi, ma tafitafi le fale, ma saili ma le filiga [… filiga] se’ia, [… se’ia … se’ia oo lava ina tatou] mauaina.”15 Afai ua ia i tatou “le alofa mama o Keriso,” o le a tatou mulimuli i le faataitaiga a le tamā o i le tala i le atalii faamaumau’oa, o lē a o “lei taitai oo mai le [atalii], … na iloa atu o ia, ma ua alofa i ai, ua tamo’e, ua faapa’ū i lona ua ma kisi atu ia te ia.”16
Pe o mafai ona tatou lagonaina le naunauta’iga i le loto o le tagata na leiloa na o le tasi lava le mamoe? Po o le naunauta’iga i le loto o le fafine na leiloa na o se tupe lava e tasi? Po o le malosi tele o le alofa ma le agalelei i le loto o le tamā o le atalii faamaumau’oa?
Sa ma galulue ma lo’u toalua o Maria Isabel i Amerika Tutotonu ma sa faamautu i le Aai o Kuatemala. O iina sa ou maua ai le avanoa e feiloai ai ma Julia, o se tagata faamaoni o le Ekalesia. Sa uunaia a’u e fesili ia te ia e uiga i lona aiga. Na maliu lona tina i le kanesa i le 2011. Sa avea lona tamā o se ta’ita’i faamaoni i lana siteki, sa avea o se epikopo ma se fesoasoani i lona peresitene o le siteki mo le tele o tausaga. O ia o se leoleo mamoe moni a le Alii i lalo o se isi leoleo mamoe. Sa ta’u mai e Julia e uiga i ana taumafaiga faifai pea e asiasi, e auauna atu, ma tautua. Sa ia olioli moni i le fafagaina ma le vaavaaia o mamoe faapelepele a le Alii. Sa toe faaipoipo o ia ma toaga i le Ekalesia.
I ni nai tausaga mulimuli ane, sa tatala lana faaipoipoga, ma ua alu nei na o ia i le lotu. Sa ia lagona ua lē mālie, sa lagona foi ua i ai ni tagata sa faitioina o ia ona ua tatala lana faaipoipoga. Sa le toe alu o ia i le lotu ona ua faatumulia lona loto i se agaga lē lelei.
Sa maualuga le talanoa o Julia i le matagofie o lona avea ai o se leoleo mamoe i lalo o se isi leoleo mamoe, o se tagata galue malosi, e alofa ma e agalelei. Ou te manatua lelei le oo mai o se lagona naunauta’i a’o ia faamatala maia o ia. Sa na ona ou mana’o lava e faia se mea mo lena tagata, o se tagata sa faia le tele o mea mo le toatele o tagata i le aluga o na tausaga.
Sa ia [Julia] tuu mai le numera o lana telefoni feavea’i ma amata loa ona ou viliina o ia, ma le faamoemoe ia maua se avanoa e feiloa’i patino ai ia te ia. I le mavae ai o le tele o vaiaso, ma le anoanoa’i o telefoni ae le’i faamanuiaina, i se tasi aso sa i’u ina ia taliina le telefoni.
Sa ou fai atu ia te ia na ma feiloai ma Julia, lona afafine, ma sa ou maofa i le ala sa ia galue ai, auauna atu, ma alofa i mamoe faapelepele a le Alii mo le tele o tausaga. Sa le’i faamoemoeina e ia se faamatalaga faapena. Sa ou ta’u atu ia te ia lo’u manao moni ma te talanoa faafesaga’i ma ia. Sa ia fesili mai ia te a’u pe o le a le faamoemoe o lea ituaiga o fonotaga. Sa ou tali atu, “Ou te matua’i manao moni lava e feiloai i le tamā o sea tamaitai lelei tele.” Ona sāō ai lea o le telefoni mo ni nai sekone—o nai minute ae na foliga mai ia te a’u e pei o se faavavau. Sa na ona ia fai mai lava, “O afea ma i fea?”
O le aso na ma feiloa’i ai ma ia, sa ou valaaulia ai o ia e faasoa mai nisi o ona aafiaga a o asiasi atu, auauna atu, ma tautuaina mamoe faapelepele a le Alii. A o ia toe faamatalaina nisi o tala faamomoiloto, sa ou matauina na suia lona si’uleo, ma sa toe fo’i ane le agaga lava e tasi lea sa ia lagonaina i le anoanoa’i o taimi, o se leoleo mamoe i lalo o se isi leoleo mamoe. O le taimi nei sa faatumulia ona mata i loimata. Sa ou iloa o le taimi sa’o lea mo a’u, ae sa ou lagonaina ou te le’i iloa po o le a se tala e fai atu i ai. Sa ou tatalo i lo’u mafaufau, “Tama, fesoasoani mai ia te a’u.”
Sa faafuase’i, ona ou faalogoina a’u lava o faapea atu, “Uso Florian, i le avea ai o se auauna a le Alii, ou te faamalie atu i lo matou lē i ai iina mo oe. Faamolemole, faamagalo i matou. Toe aumai se isi avanoa ia i matou, e faaali atu ai ia te oe, matou te alolofa ia te oe. Matou te manaomia oe. E taua oe ia i matou.”
O le Aso Sa na sosoo ai, na toe foi mai ai. Sa umi se la talanoaga ma lona epikopo ma ua tumau le toaga. I ni nai masina mulimuli ane, sa maliu ai o ia—ae na ia toe foi mai. Sa toe foi mai o ia. Ou te molimau atu faatasi ai ma le fesoasoani a lo tatou Faaola, e mafai ona tatou alolofa i Ana mamoe faapelepele ma auauna atu ia te i latou e faapei ona Ia finagalo ai. Ma o lea, iina i le Aai o Kuatemala na toe aumai ai e le Alii o Iesu Keriso se mamoe e tasi e sili ona taua i Lana lafu. Sa Ia aoaoina ai a’u i se lesona e uiga i le auauna atu e le mafai ona galo ia te a’u. I le suafa o le Leoleo Mamoe Lelei, le Leoleo Mamoe Matagofie, le Leoleo Mamoe Ofoofogia, o le Alii Iesu Keriso amene.