O Se Perofeta Soifua mo Aso e Gata Ai

Saunia e Elder Allen D. Haynie

O Le Fitugafulu

Ua filifilia e le Tama oi le Lagi le mamanu o le faaalia mai o upumoni i Ana fanau e ala mai i se perofeta.

A o ou laitiiti, sa ou fiafia tele i Aso Toonai aua o mea uma sa ou faia i lena aso sa foliga o se sailiga fiafia. Ae na tusa lava po o a au mea na fai, sa taimua lava i taimi uma i le mea aupito taua o mea uma—o le matamataina o ata komi i le televise. I le taeao o se tasi o Aso Toonai faapena, ao ou tū i talaane o le televise ma kīkī solo ia alaata, na ou iloaina ai o le ata komi sa ou faamoemoe ia maua sa suitulaga i se faasalalauga o le konafesi aoao a Le Ekalesia a Iesu Keriso o le Au Paia o Aso e Gata Ai. Ao ou tilotilo atu i le televise ma ’auē i le leai o se ata komi, sa ou vaaia se tamaloa lauulu sinasina e fai lona suti ma le fusiua, o saofai i se nofoa manaia.

Sa i ai se mea sa ese e uiga ia te ia, o lea na ou fesili ai i lo’u uso matua, “O ai le la?”

Sa fai mai o ia, “O Peresitene David O. McKay; o ia o se perofeta.”

Ou te manatua [lo’u] lagonaina o se mea ma i se isi itu na ou iloaina o ia o se perofeta. Ona, talu ai sa o a’u o se tama laitiiti ma’ivalea tele i ata komi, sa ou suia ai le alaata. Ae sa le’i galo lava ia te a’u le lagona na ou lagonaina i lena taimi puupuu, o faaaliga sa le’i mafaufauina. O ni isi taimi, o se perofeta, e laitiiti lava se taimi ae iloa [o ia].¹

O le iloa e ala i faaaliga o loo i ai se perofeta soifua i le lalolagi ua suia ai mea uma.² E mafua ai ona lē fia faalogo se tagata i se faafinauga e uiga i le po o le a le taimi e saunoa ai se perofeta o se perofeta po o le, pe mata e tauamiotonuina se tagata i le filifilia o fautuaga faaperofeta e talia pe teena.³ O se malamalama faaalia mai faapena, e valaaulia ai se tagata e faatuatua i le fautuaga a se perofeta soifua, e tusa lava pe tatou te le malamalama atoatoa i ai.⁴ E ui i lea, ua filifilia e se Tama oi le Lagi atoatoa ma agaalofa le mamanu o le faaali mai o upumoni i Ana fanau e ala i se perofeta, o se tasi na te le’i sailia lava se tofiga paia faapea ma o sē na te le manaomia la tatou fesoasoani e tau faailoa atu ia te ia ona lava lē atoatoa.⁵ O se perofeta o se tasi ua sauniaina, valaauina, faasa’oina, musuiaina, aoaiina, faapaiaina, ma lagolagoina e le Atua lava ia.⁶ O le mafuaaga lena e le mafai ai lava ona tatou lamatia faaleagaga pe a mulimuli i le fautuaga faaperofeta.

Pe tatou te fiafia i ai pe leai, o i tatou uma sa filifilia i se auala i le muai olaga ina ia fananau mai i nei aso e gata ai. E lua mea moni e fesootai ma aso e gata ai. O le mea moni muamua, o le Ekalesia a Keriso o le a toefaatuina i luga o le fogaeleele. O le mea moni lona lua e faapea, o mea o le a matuai faigata lava. Ua faaalia mai i tusitusiga paia, o aso e gata ai o le a i ai “se timu uato’a tele e auina mai e faaumatia ai laau totō o le lalolagi,”⁷ mala,⁸ “tala o taua, ma o le a vāvāō le lalolagi atoa, … ma o le a faateteleina le amioletonu.”⁹

A o ou laitiiti, o na valoaga e uiga i aso e gata ai sa ou fefe ai ma na mafua ai ona ou tatalo ina ia le oo mai le Afio Mai Faalua i o’u aso—atonu ua faamanuiaina i le le’i oo mai lava. Peitai o lenei ua ou tatalo mo le faafeagai, e ui lava o luitau valoiaina e mautinoa lava o le a tutupu,¹⁰ aua a toe foi mai Keriso e nofotupu, o Ana foafoaga uma o le a “taooto ai … ma le filemu.”¹¹

O tulaga ua i ai nei i le lalolagi ua mafua ai ona popolevale nisi. I le avea ai ma fanau o le feagaiga a le Atua, e le manaomia ona tatou taufetuli solo iinei po o iina ia iloa ai le ala e tami solo ai i nei taimi faigata. E le tatau ona tatou matatau.¹² O aoaoga faavae ma mataupu faavae e ao ona tatou mulimuli ai ina ia sao ai faaleagaga ma tumau ai faaletino o loo maua i upu a se perofeta soifua.¹³ O le pogai lena na folafola mai ai e Peresitene M. Russell Ballard “e le o se mea faatauvaa … le i ai o se perofeta a le Atua i lo tatou lotolotoi.”¹⁴

Ua tautino mai Peresitene Russell M. Nelson, “O le mamanu ua leva ona faatulagaina a le Atua o le aoaoina o Lana fanau e ala mai i perofeta ua faamautinoa mai ai ia i tatou o le a Ia faamanuiaina perofeta taitasi ma o le a Ia faamanuiaina i latou o e faalogo ma gauai atu i fautuaga faaperofeta.”¹⁵ O lea la, o le autu [ki] lava o le mulimuli i le perofeta soifua.¹⁶ Uso e ma tuafafine, e le pei o tusi komi ua leva ma taavale tuai tulaga ese, o aoaoga faaperofeta e le faapea a leva ona sili atu lea o lona taua. O le pogai lena e le tatau ai ona tatou saili e faaaoga upu a perofeta ua mavae ia faataatiaese ai aoaoga a perofeta soifua.¹⁷

Ou te fiafia i faataoto na faaaoga e Iesu Keriso e aoao mai ai mataupu faavae o le talalelei. Ou te fia faasoa atu se faataoto moni o se ituaiga faapena ma outou i lenei taeao.

I se tasi o aso sa ou savali atu ai i totonu o le faleaiga i le laumua o le Ekalesia mo se meaai o le aoauli. Ina ua uma ona aumai la’u laulau o meaai, sa ou ulu atu i le eria e aai ai ma ou matauina ai se laulau sa alala ai le toatolu o sui o le Au Peresitene Sili, sa i ai ma se nofoa avanoa e tasi. O lo’u le mautonu na mafua ai ona ou vave pi’o ese mai lena laulau, ona ou faalogo atu lea i le siufofoga o le tatou perofeta, o Peresitene Russell M. Nelson, na fai mai, “Allen, lea e i ai le nofoa avanoa ii. Sau tatou nonofo.” O lea sa ou faia ai.

Ina ua lata ina uma le malologa, sa faateia a’u i le faalogoina o se pa’o leotele, ma ina ua ou ea a’e, sa ou vaaia ai na faatu e Peresitene Nelson lana faguvai palasitika ona faamaomi lea ma toe tapuni.

Ona fesili atu lea o Peresitene Dallin H. Oaks le fesili na ou fia fesili ai foi, “Peresitene Nelson, aisea na e faamaomia ai lau faguvai palasitika?”

Sa tali o ia, “E faafaigofie ai mo i latou o e taulimaina mea e toe faaaoga ona e le telē se avanoa e alu ai i totonu o le koneteina o mea e toe faaaoga.”

A o [ou] mafaufau loloto i lena tali, sa ou toe faalogoina foi lena pa’o o le faamaomi. Sa ou autilo i lo’u itu taumatau, na faamaomi e Peresitene Oaks lana faguvai palasitika pei lava o Peresitene Nelson. Ona ou faalogoina lea o ni pa’o i lou itu agavale, ma sa faamaomi e Peresitene Eyring lana faguvai palasitika, e ui sa ia faia se faiga ese e ala i le faamaomi a o taatia faalava le fagu, lea na tele atu se taumafaiga na alu ai nai lo le faatu sao o le fagu. O le matauina o lenei mea, sa faaali atu ai ma le agalelei e Peresitene Nelson ia te ia le faiga faatu sa’o e faigofie atu ona faamaomi ai le fagu.

O le taimi lea, na ou punou atu ai ia Peresitene Oaks ma fesili filemu atu, “Pe o le faamaomiina o lau faguvai palasitika o se tulaga manaomia fou lea a le faleaiga mo le toe faaaogaina?”

Sa tali mai Peresitene Oaks ma se ataata i ona foliga, “Ia, Allen, e tatau ona e mulimuli i le perofeta.”

Ou te mautinoa sa le’i folafolaina mai e Peresitene Nelson se aoaoga faavae fou mo mea e toe faaaoga i le faleaiga i lena aso. Ae e mafai ona tatou aoao mai le tali vave atu¹⁸ a Peresitene Oaks ma Peresitene Eyring i le faataitaiga ma le mataala a Peresitene Nelson e fesoasoani ia i latou na aafia ai i se auala lelei atu.¹⁹

O ni tausaga ua mavae atu, sa faasoa mai ai e Elder Neal A. Maxwell ni isi o maitauga ma fautuaga e fetaui tonu lava le faaperofeta e faatatau i o tatou aso:

“I masina ma tausaga o lumanai, o mea o le a tutupu atonu o le a manaomia ai tagata taitasi o le ekalesia e filifili pe o le a mulimuli o ia pe leai i le Au Peresitene Sili. O le a iloa e tagata o le ekalesia o le a faateteleina le faigata o le tutū umi i le va o ni manatu se lua. …

“… Se’i o tatou tuua se faamaumauga ina ia mafai ona manino ia filifiliga, e tuu ai isi ia fai e pei ona latou loto i ai i le feagai ai ma fautuaga faaperofeta. …

“Na fetalai Iesu a matala mai lau o le mati, ‘ua latalata le tausaga vevela.’ … O le lapataia ai ua latalata mai le tausaga vevela, ia aua la nei o tatou faitio ai i le vevela!”²⁰

Ua tutupu a’e le tupulaga faiae i se vaitaimi ua le toe i ai ni lau o le mati ae ua faateteleina le vevela. O lena mea moni ua tuu mai ai se tiutetauave mamafa atu i le tupulaga ua matutua atu, ae maise lava pe a faatatau i le mulimuli i fautuaga faaperofeta. A leano matua i le fautuaga a le perofeta soifua, e le gata ina latou lē maua faamanuiaga folafolaina mo i latou lava, ae e sili atu ona leaga o le aoao o a latou fanau e faapea, o saunoaga a se perofeta e faaletaua po o le faapea, o fautuaga faaperofeta e mafai ona filifili mai i se faaaliga o mea eseese e aunoa ma le popole mo le taunuuga o le tinovale faaleagaga.

Sa ta’ua e Elder Richard L. Evans i se tasi o taimi: “Ua manatu sese nisi o matua e faapea e mafai ona latou evaeva teisi e tusa ai ma amioga ma le usitaia … e faapea e mafai ona latou faamatagataga teisi i mea faavae e aunoa ma le aafia ai o lo latou aiga po o le lumanai o lo latou aiga. Peitai, afai e sipa teisi ‘ese se matua, o le a ono sili atu le sipa a tamaiti i lo le faataitaiga a matua.”²¹

I le avea ai o se tupulaga ua i ai le tiute paia e saunia le tupulaga faia’e mo lona matafaioi valoiaina i aso e gata ai,²² o lea matafaioi e ao ona faataunuuina i se taimi ua matuai sili ona malosi ai faatosinaga a le fili,²³ e le mafai ona avea i tatou o se punavai o le fenumiai e uiga i le taua o le mulimuli i fautuaga faaperofeta. O le fautuaga tonu lena o le a mafai ai e le tupulaga faia’e ona iloa atu “le fili a o mamao atu o ia; ma semanu [e] mafai ai ona [latou] sauni” e tetee atu i osofaiga a le fili.²⁴ O a tatou faasipa laiti, faaleano filemu, po o faitioga taumusumusu i le tali atu i fautuaga faaperofeta e ono iu ai ina tatou savavali ma le tulaga lamatia i le pito o le ala o feagaiga; ae pe a faatelē e le fili i olaga o le tupulaga faia’e, o amioga faapena e mafai ona faatosina ai i latou e tuua atoa lena ala. O se taunuuga faapena o se tau taugata tele faaleaugatupulaga lena.²⁵

Atonu e lagona e ni isi o outou e faapea ua le taulau a outou taumafaiga e mulimuli i le fautuaga a Peresitene Russell M. Nelson. Afai o le tulaga lena, salamo, toe amata ona mulimuli i le fautuaga a le perofeta filifilia a le Atua. Ia faataatiaese le faalavefau o ata komi faatamaitiiti ae ia faalagolago i le [auauna] filifilia a le Alii. Ia olioli aua ua toe “i ai se perofeta i Isaraelu.”²⁶

E tusa pe e te le o mautinoa, ou te molimau atu e mafai ona tatou tatalia le vevela o aso e gata ai ae e faapea foi ona tatou lauolaola ai. O i tatou o le Au Paia o aso e gata ai, ma o aso maoae nei. Sa lemataofiofia lo tatou fia o mai i le lalolagi i lenei taimi, ma i ai le mautinoa o le a le tuua i tatou e tautevateva pe a faafetauia e puao ua faateteleina le pogisa ma le fenumiai a le fili²⁷ nai lo o lena, ia talia fautuaga ma le taitaiga mai i le toatasi ua faatagaina e saunoa mai ia i tatou ma le lalolagi atoa, “O loo faapea ona fetalai mai le Alii o Ieova.”²⁸ I le suafa paia o le perofeta o lē na faatuina a’e e le Atua, o Le Paia e Toatasi o Isaraelu,²⁹ o Iesu Keriso, amene.