Brother Michael T. Nelson

Fesoasoani Lua i le Au Peresitene Aoao o Alii Talavou

Mo Brother Michael T. Nelson, o lona taimi o se peresitene o le misiona na faamautu mai ai e faapea, o le aoao atu o mataupu faavae sa’o i le tupulaga faiae ona faatuatuaina lea o i latou e maua ai taunuuga sili ona lelei—mo le galuega faafaifeautalai ma i olaga o faifeautalai taitoatasi.

“O mea uma lava e mo le faatuatuaina. Sa matou aoao e faatuatuaina i latou,” na ia saunoa ai e uiga i le galulue faatasi ma faifeautalai faamisiona i le Misiona a Kalefonia San Bernardino, lea sa auauna atu ai le au Nelson o ni taitai misiona mai le 1998 i le 2001.

Fai mai Brother Nelson o le aoaoina—ma le tuuina atu i tagata talavou o le avanoa e taitai ai—ua tumau pea o se vaega taua o lana auaunaga i le Ekalesia ma o le a faaauau pea ona i ai i lona valaauga fou i le Au Peresitene Aoao o Alii Talavou. Mo le tolu tausaga ua mavae, sa auauna atu ai Brother Nelson o se failautusi faapitoa i le Au Peresitene Aoao o Alii Talavou. Mo le lua tausaga talu ai, sa ia auauna atu ai o se sui auai o le mea lea ua avea nei ma Aufono Faufautua Aoao a Alii Talavou.

Na soifua mai Michael Terry Nelson i le aso 10 Iuni, 1956, i le Aai o Sate Leki, Iuta, ISA, ia Monte Cannon ma Viola Eliza Nelson ma sa soifua ae i le eria o Sate Leki. Ina ua uma ona auauna atu i le Misiona a Chile Santiago, sa ia suesue i fesootaiga faalefaalapotopotoga i le Iunivesite o Polika Iaga ma le Iunivesite o Iuta. I le 1982 sa ia faaipoipo atu ai ia Barbara Fluckiger i le Malumalu o Jordan River. Sa nonofo le au Nelson i Sandy, Iuta, a o lei siitia atu i Wallsburg, Iuta. E toaiva le la fanau.

O Brother Nelson o le ofisa sili o mea tautupe o se kamupani o mea tau pisinisi ma esetete ma tupe faafaigaluega. O le au Nelson, e aofia ai ni tamaiti se toalua o loo latou nonofo, e faagaoioia foi se faatoaga i fanua o lo latou aiga. O le toaga ma faaalu le taimi i fafo e tatau ona taua mo le autalavou o le Ekalesia, o le tala lea a Brother Nelson, e pei ona sa i ai mo lona aiga.

Sa auauna atu Brother Nelson o se peresitene o le siteki, fesoasoani i le au peresitene o le siteki, failautusi faapitoa a le siteki, epikopo, ma le peresitene o Alii Talavou a le uarota ma le siteki. Sa fesoasoani o ia i le suegatupe, lesitala, ma fuafuaga i le 1997 mo le solo o taavale solofanua o le faamanatuga o le 150 tausaga, lea na toefaatino ai le malaga a le uluai vaega i le Vanu o Sate Leki.