O sa Kidavaki Mai ki na iLavelave Oqo

Na Veisureti ni iVakabula me Wasei na Nona Rarama

Ena Gaunisala ki Emeo [On the Road to Emmaus], mai vei Wendy B. Keller, lolomataka na Havenlight

Ni bera ni lako cake ki lomalagi, e a sureti ira na Nona iApositolo ni Veiyalayalati Vou na Karisito sa tucaketale me ra vakadinadinataki Koya “ka yacova nai yalayala kei vuravura” (Cakacaka 1:8). Ni ra vakauqeti ena itavi oqo, o ira na iApositolo era sa “sega ni mudu ni vakatavuvuli ka vunautaki Jisu Karisito” (Cakacaka 5:42).

Ena nona itukutuku ena ilavelave oqo, e vakamacalataka kina e dua na iApositolo ni gauna oqo, o Elder Quentin L. Cook, na sala eda rawa ni wasea kina na kosipeli ni iVakabula veitalia na noda malumalumu. E vola vakaoqo, “Ni da bulataka na kosipeli, lomani ira ka qaravi ira na tani, tudei tu ni da temaki ka vakacacani, ka cavuta na ivakadinadina ena vosa kei na ivalavala, eda na kauti ira mai na tani vei Jisu Karisito” (tabana e 4).

Ni da toro voleka vakaikeda vua na iVakabula, eda sa vunau tiko ena ivakadinadina kei na ivakaraitaki. Ena maliwai keda o Koya, me vaka au vakamacalataka ena noqu itukutuku ena ilavelave oqo, kevaka eda rokova na noda veiyalayalati ka vakasaqara na Nona ivakasala ena nodra vosa na parofita (raica na tabana e 40).

Ena noda vulica na nodra veiqaravi na iApositolo ena Lako Mai, Mo Muri Au ena vula oqo, me da vakananuma na noda dui itavi kei na kaci me da wasea na rarama ni iVakabula vata kei ira era tu wavoliti keda. E a lesu tale na Karisito ki lomalagi ena dua na gauna balavu sa oti, ia ni da vakamasuti Koya me “tiko ga vei keda” (Luke 24:29) nikua, ena lako vata kei keda ena dua na ikalawa ena dua na gauna.

Elder Patricio M. Giuffra

Ena Vitusagavulu