Veiqaravi ena Loloma Uasivi

E rawa ni da cakava e dua na veisau levu ena noda vakaraitaka na loloma ena ivalavala matau ni veisiga.

E Dua na iVakaraitaki ni Loloma Uasivi

O Tapaica (ka kilai talega me o Tokasa) e dua na tisaipeli i Jisu Karisito ka a bula voli mai Jopa. A vakatokai o koya me dua na marama “sa dauoga ena cakacaka vinaka, kei na cakacaka loloma” (Cakacaka 9:36). E a lomani o koya baleta ni a cakava e levu na ka me lomani ira kina na tani. Me vaka na iVakabula, a solia o koya na nona bula ki na veiqaravi. A tu vua na kila kei na taledi ka a vakayagataka me kauta mai na veisau.

E dua vei ira na kila oqori sai koya na kena caka na kote kei na qameni, ka so a soli vei ira na yada era a vakaleqai tu. Vei ira era a ciqoma na nona iloloma, o koya a vaka edua ka tala mai na kalou. Ni mai raici koya o Pita ni oti nona mate, “sa tu voleka vua ko ira na yada kecega a ra sa tagi, a ra sa vakatakila na icurucuru eso kei na isulu ka cula ko Tokasa, ni sa bula vata kei ira” (Cakacaka 9:39). A yavalati vakalevu sara na lomana ka mani vakaturi koya cake kina mai na mate, ka vakavuna me ra vakabauta na iVakabula e lewe vuqa (Cakacaka 9:40–42).

Veiqaravi ena Loloma Uasivi

Na loloma uasivi sa ikoya na loloma i Jisu vei keda kei na loloma e namaka o Koya vei keda meda veilomani kina. Sai koya na noda lomani ira na wekada me vaka noda lomani keda vakaikeda (raica na Maciu 22:37–39), noda qaravi ira ena yalololoma vata ga, vosota, kei na loloma veivueti eda gadreva vakaikeda (raica na Maciu 7:12). Noda qaravi vei ira, me vakataki Tapica, ena vakayagataki ni isolisoli kei na taledi sa soli vei keda.

E rawa ni da cakava e dua na veisau levu ena noda vakaraitaka na noda loloma ena sala e matau vei keda—veitalia mada ga ke rawarawa ga na ka eda cakava. Kevaka e nomu taledi na culacula, oqori e rawa ni dua na sala ni veiqaravi, ia de rairai o matai beka ni vakayagataka nai koti ni co mai na misini ni culacula. Se nomu isolisoli beka mo kila na sala mo dau vakarorogo vakavinaka kina, ka dau tu voleka me vaka e dua na itokani dina.

Vakatorocaketaki ni Loloma Uasivi

E rawa vakacava ni da tara cake na ivakarau va-Karisito ni loloma uasivi?

Na loloma uasivi sai koya e dua na isolisoli e solia na Tamada Vakalomalagi vei ira era daumuri Jisu Karisito dina. “Mo dou masuta na Tamada ena yalomudou taucoko me vakasinaiti kemudou ena loloma oqo” (Moronai 7:48).
O Momani a vakavulica se cava na loloma uasivi: “Sa dauvosota vakadede na loloma uasivi, sa yalovinaka, sa sega ni vuvu, sa sega ni vakalevulevui ira, sa sega ni qara na ka me nona ga, sa sega ni vakacudrui vakarawarawa, sa sega ni dauloma ca, ka sega ni rekitaka na caka cala, ia sa rekitaka ga na dina, sa vosota na ka kecega, sa vakabauta na ka kecega, sa vakanuinuitaka na ka kecega, sa vosota na ka kecega” (Moronai 7:45). Oqo e sega walega ni sala o na kila kina ni ko sa vakasinaiti ena loloma; era sa itovo veisemati talega ka na cau ki na vakalevutaki ni noda rawa ni loloma ni da taracake tiko.
Na yalololoma e salamuria na kilai ni ituvaki ni bula.¹ Ni da vakasaqara meda kilai ira na tani, eda solia ki na loloma e dua na madigi levu cake me tubu kina. Vakatovotovotaka mo taroga na taro ena sala e veivukei ka loloma, ka qai vakarorogo ena yalodauvosota kei na veiciqomi.
Vakatovotovotaka na loloma uasivi. Solia na nomu gauna kei na ivurevure tale eso, oka kina na nomu veivosoti, kivei ira era gadreva. E vakavulica o Peresitedi Thomas S. Monson (1927–2018): “Na veivosoti e dodonu me rau salavata kei na loloma. … Na veibeitaki ena sega ni maca kina na mavoa. Na veivosoti duadua ga e veivakabulai.”²