Bulataki kei na Wasei ni Kosipeli

era raica vata tiko na ivolanikalou na goneyalewa

Kemuni na iTubutubu Lomani,

E rua na sala eda vakaraitaka kina vua na Kalou na noda vakavinavinakataka na kosipeli sai koya na noda bulataka ka wasea. Na itukutuku ena ilavelave ni vula oqo e vakanamata ena kena vakayacori na kosipeli i Jisu Karisito me dua na tiki levu cake ni noda bula, se na vaqaqacotaki ni vakabauti Koya, vakayacori na veisau bibi eso, se vakatetei na Nona dina e vuravura raraba. Na reki e waraki ira era vulica ka muria na ivakavuvuli ni iVakabula ka wasea na Nona itukutuku ena vosa kei na ivalavala.

Veivosakitaki ni Kosipeli

Wasei ni Kosipeli ena iVakadinadina

Sureta na lewe ni matavuvale yadua me wasea e dua na ivakadinadina lekaleka ena dua na ivakavuvuli ni kosipeli taleitaki. Wasea na vosacavuti me baleta na cakacaka ni kaulotu mai na itukutuku nei Elder Quentin L. Cook ena tabana e 4. Ni vakasamataki tiko na ivakavuvuli ni kosipeli o se qai wasea ga, taroga: E tiko beka eso na tamata eda rawa ni wasea vei ira na ivakavuvuli eso oqo?

Vakila ni o Voleka sara vei Jisu Karisito

Tarogi ira na luvemu ena gauna era vakila ni ra voleka duadua kina vei Jisu Karisito. Cakava e dua na lisi mai na nodra isaunitaro. Vakamacalataka na itaviqaravi e lima nei Elder Patricio M. Giuffra ena tarai cake ni vakabauta (raica na tabana e 42–43). Vakamatavuvale, vakasamataka mo dou cakava e dua vei ira na itaviqaravi oqo ka dou duavata kina ni na rawa ni vakayaco veisau ena nomudou vuvale. Tuvana vata e dua na ituvatuva mo dou vakanamata ki na itaviqaravi oya ena vula oqo.

Na Veisau e Rawa ni Veimuataki ki na Tubu Vakayalo

Oi rau ruarua na veisau, o koya e namaki kei koya e sega ni namaki, e tiki ni veika eda na sotava ena bula oqo. Wilika na itukutuku mai vei Elder Ciro Schmeil ena tabana e 30 me baleta na duidui ni veimataqali veisau e yaco ena noda bula. Ena vukei keda vakacava na veivakavuvuli oqo meda yaco me vakataka vakalevu cake na iVakabula?

Lako Mai, Mo Muri Au Lasa Vakamatavuvale

Na Kalou e Lomani Ira Taucoko na Luvena

Cakacaka 10

“Sa sega ni digitaki ira vakailoa na tamata na Kalou: ia ena veivanua kecega sa vinaka vua ko koya sa rerevaki koya, ka caka dodonu” (Cakacaka 10:34–35).

O ira na Vakaitutu Raraba era lako mai na veivanua duidui. E rauta ni veimama era lako mai Amerika. Eso tale era lako mai na Loma kei na Ceva kei Amerika, Esia, Iurope, Aferika, Oceania, Mexico, kei Kenada.

E rawa beka ni o tukuna na yacana e dua na iApositolo ka a sucu mai Iurope?
E rawa beka ni o tukuna na yacana e dua na iApositolo mai na Ceva kei Amerika?
E rawa beka ni o tukuna na yacana e dua na iApositolo ka rau lako mai Suwiteni kei Finiladi na nona itubutubu?
E rawa beka ni o tukuna na yacana e dua na iApositolo ka a cavutu taumada mai Jaina na nona matavuvale?

E rawa ni da lako mai na veivanua duidui eso, ia na Kalou e lomani keda kece sara.

Veivosaki: Ena sala cava soti beka eda na tautauvata se duatani kina mai vei ira na tamata tale eso? E yavutaki beka na Nona lomani keda na Kalou ena keda irairai se vanua eda lako mai kina? Railesuva na italanoa kei Pita kei Konilio ka kune ena Cakacaka 10. Na cava beka e rau a vulica me baleta na vakalewai ira na tani? Na ivakarau ni bula cava soti era bibi vua na Turaga?