“Veivakauqeti e loma ni Valetabu,” Liaona, Jiulai 2023.

Veivakauqeti e loma ni Valetabu

Mai vei Norman C. Hill

Na vale ni Turaga e dua na vanua ni ivakatakila. Na levu ga ni noda lako ki valetabu, na levu cake ni noda rawa ni ciqoma na ivakatakila.

Na vale ni Turaga e sega walega ni vale tabu eda cakava kina na cakacaka ni veivakabulai ia e dua talega na vanua ni ivakatakila, na vanua e rawa ni yaco kina na veivakauqeti lelevu ka lalai, na vanua e rawa ni vakabulai kina na mavoa ni yaloda, kei na vanua e rawa ni yavalata kina na Turaga na yaloda ena veisala sega ni namaki eso.

Vakilai Edua Na Ka Matalia

Niu a veiqaravi voli vaka-liganicakacaka ena Valetabu e Houston Texas, era a mai kele ena neitou ikelekele ni motoka e dua na ilawalawa dauvodomotovai ka kerea se rawa ni ratou curu ki valetabu. A vakamacalataka na peresitedi ni valetabu, o Richard Sutton, ki na ilawalawa na inaki ni valetabu kei na kena gadrevi e dua na ivolatara ni valetabu me rawa kina na curu ki loma. Na nodratou iliuliu kei nona itokani erau a vakatudaliga sara vakamatua.

“Au a vakila e dua na ka ni keitou lako sivita na nomudou vale,” a kaya o koya. “Au sega ni rawa ni vakamacalataka, ia e a dua na veivakauqeti matalia kau via kila se cava e rawa ni a vakavuna.”

Erau a vinakata na lewe rua me rau kila eso tale na ka, sa mani vakarautaka kina o Peresitedi Sutton me rau sikovi rau na daukaulotu.

Ni sivia e dua veimama na yabaki ki muri, e a rogoca o Peresitedi Sutton edua na tukituki ena katuba ni nona valenivolavola e valetabu. “O na sega ni kilai au, ia ena dua na gauna sa oti keitou a lako mai ki ke kei na so na itokani ena neitou motovai. Ena gauna oya, au a rawa walega ni rai mai taudaku.” Ni taura cake tu e dua na ivolatara ni valetabu, a tomana, “Nikua au sa na rawa ni rai mai loma.”

iKarua ni Vosakilai

Ena gauna rau a kacivi kina o Dean kei Bonnie Hill me rau daukaulotu qase ena Valetabu e Cochabamba Bolivia, e a taqaya o Bonnie. A sega ni bau vulica na vosa vaka-Sipeni ka sega tu ni kila na nona rawa ni qarava na cakacaka vakalotu e gadrevi se veimaliwai kei ira tale eso ena dua na vosa tawakilai. A yalataki vua ena dua na veivakalougatataki ni matabete ni na rawa vua me veitalanoa ruarua ena kena e cavuti kei na kena e vakayalo ena vosa vaka-Sipeni.

“Au sega ni rawa ni vosataka e levu sara na vosa vaka-Sipeni e taudaku ni valetabu,” e kaya o koya. “Ia ena loma ni vale ni Turaga, e vaka me lako mai vakarawarawa vei au.”

Ni oti mada ga nodrau lesu tale ki vale kei watina ka rau dau tiko ena soqoni vaka-Sipeni ena Valetabu e Ogden Utah, era dau qoroya na petereni na irogorogo vakasakiti ni nona vosa.

Cakava e Dua na Ka me Vakilai kina na Reki

O Peresitedi Russell M. Nelson a kaya: “Eda na rawa ni vakauqeti ena loma ni siga taucoko me baleta na ka era a vakila eso mai na cakacaka ni valetabu kei na tuvakawa. Ia e dodonu meda cakava e dua na ka meda vakila kina vakaikeda na marau oqo.”¹

Na reki kei na veivakayarayarataki vakakina na veivakauqeti kei na veivakadeitaki sa waraki keda tu mai na valetabu. E tiko e dua na vosa vakalomalagi cavuti ka kilai vinaka e kea, ka sega ni tiko ena dua tale na vanua e vuravura. Eda na rawata na ivakatakila e gadreva na Turaga me solia vei keda ena valetabu sega ena gauna walega eda tiko kina e kea, ia ena gauna talega eda gole kina ena nanamaki me ciqoma na ivakatakila. Oqo eso na ivakaraitaki ni veivakauqeti a ciqomi:

A vakasaqara o Martin Goury mai Cote d’Ivoire na veidusimaki e loma ni valetabu baleta edua na ka bibi ni bula ka rawata edua na veivakadeitaki veivakurabuitaki ni sa saumi oti na nona masu. Oqo na ivakavuvuli a vakavulici Oliver Cowdery kina na Turaga: “Mo nanuma lesu na bogi ko a tagi mai kina vei au ena yalomu. … Au a sega li ni vakaceguya na nomu vakasama me baleta na ka oqo?” (Vunau kei na Veiyalayalati 6:22, 23).
O Randy Bronson e tiko volekata na Valetabu e Payson Utah ka sa vica vata na yabaki na nona cakava tiko na vakadidike ni tuva kawa. “Ia e tiko e dua na luvequ tagane luluqa vakalotu, kau sega ni kila na cava au rawa ni cakava vua. Au sega walega ni biuta na yacana ena ivola ni masu, ia au dau masu vagumatua e valetabu, meu kila na cava au rawa ni cakava vua. E dau yaco mai vei au eso na vakasama ena ka meu tukuna se cakava vua.”
“O iko e dua na tina vinaka,” a kaya o Stephanie Fackrell Hill vua e dua na vulagi ena Valetabu e Logan Utah. “O kila vakacava?” a taroga ena lomalomarua na tina gone. A kaya o Sisita Hill, “Au a raica na nodratou iboro na luvemu ni tauva tu na ligamu, niu raica, au a vakila na veivakauqeti ni Yalo meu tukuna vei iko.” A saga tiko na tinanigone gone oqo me vunitaka na ligana. E a vakacegu, ni sa vakila oqo o koya ni sa ciqomi ka sega ni laurai levu.

Na valetabu e sega ni vanua walega me vukea na nodra vakabulai na noda qase e liu, ia me da ciqoma talega kina na mataqali ivakatakila e rawa ni dusimaki keda kei ira tale eso ena salatu ni veiyalayalati. O Peresitedi Nelson a kaya, “Oi keda vakayadua eda gadreva tikoga na veivakaukauwataki vakayalo kei na veivakavulici ka rawa duaduaga ena vale ni Turaga.”² Na veivakauqeti kei na veika a vakilai ka ciqomi ena Nona vale savasava e vakavulici keda meda rai me vaka na rai i Jisu, rogoca me vaka e rogoca o Koya, ka bula me vaka na Nona bula.

E vakaitikotiko na dauvolaivola e Utah, Amerika.