Domodra na Yalododonu Edaidai

Meda Kakua ni Rere

Mai vei Luis Robledo, Tamaulipas, Mexico

Au kila ni da na marau ni da wasea na kosipeli vei ira na tamata kecega eda rawa ni wasea kina.

iTaba e lolomataki mai vei dauvolaivola

E levu na noqu itokani kei na lewe ni kalasi ka ra sega ni lewena Na Lotu i Jisu Karisito ni Yalododonu Edaidai era dau tarogi au vakavuqa me baleta na Lotu. Ni oti edua na gauna, au sa oca sara ga ena sauma na veitaro vata ga o ya e veigauna, kau nanuma cake sara e dua na kena iwali.

Au taleitaka meu caka vidio ena initaneti meu vakamarautaki ira na tamata. Au dau cakava na vidio ni sereivakatagi, vidio vakaitukutuku, kei na vidio ni vakalasalasa. Dua na siga niu a vakasamataka tiko na ka meu na cakava ena vidio e tarava, au a nanuma meu cakava e dua na vidio ka saumi kina na taro baleta na Lotu.

Au a dreta mai na noqu itaba ni veitaba. Oti oya, au a sega ni vola na veika meu na tukuna ia niu nanuma tiko na ivolanikalou bibi au via tukuna, au a cakava na vidio. Au a sega ni kila na cava ena yaco. Au a vakila ga na veiuqeti meu cakava na vidio. “A sa liutaki au tiko ena Yalo, ia kau a sega ni kila rawa tiko yani na ka meu na cakava” (1 Nifai 4:6).

Au a sega ni via lomaleqataka na veika era nanuma na noqu itokani, lewe ni kalasi, kei ira na wekaqu—se ra lewe ni Lotu se sega—kau biuta yani ena initaneti.

Ni oti e vica na macawa ena kena vakavodoki na vidio, au sa tekivu ciqoma na itukutuku lesu mai ena noqu akaude ni vakauitukutuku raraba. O ira na tamata au sega mada ga ni kila era sa tekivu vosa ka vakavinavinakataki au ena vuku ni noqu vidio. Ena vuku ni noqu vidio, a tekivu me veitalanoa kina e dua na tamata kei rau na daukaulotu. E muri, a lewa na tamata oya me papitaiso.

Me tekivu mai na gauna au a cakava kina na vidio, o ira au kila era sega ni lewe ni Lotu era a taleitaki au vakakina—ka rairai vakalevu cake. E vica vei ira era sa muduka nodra dau vakalewa na Lotu. Eso tale era sa tarova na tarogi ni taro era dau taroga wasoma baleta na Lotu baleta ni sa qai saumi vei ira.

Meda kakua ni rere ni cakava na veika sa vakarota vei keda na Turaga. O Koya e tukuna, “Dou lako yani ki vuravura taucoko ka vunautaka nai tukutuku vinaka vei ira na tamata kecega” (Marika 16:15).

Au yalataka ni da na sega ni rarawa ni da talairawarawa Vua.