Na Tamata Kece e Gadreva na Kosipeli

Mai vei Joy Teresa M. Moises

Au a nakita meu laki kaulotu, ia ni oti na vuli torocake au nanuma ni sega ni gadrevi meu laki veiqaravi—me yacova niu sa cakacaka vata kei ira na goneyalewa era a vakacacani. Au a qai raica kina ni tamata kece e gadreva na kosipeli.

Na Tiki ni Siliva ka Yali [The Lost Coin], mai vei Harold Copping © Providence Collection / laiseni mai na GoodSalt.com

Niu a se tiko ena Lalai, au sa sega ni nanuma rawa na levu ni gauna era dau taroga kina na noqu qasenivuli se o cei vei keimami ena laki veiqaravi vaka daukaulotu tudei. Ena noqu vakasama vagone au dau kaya niu na lako.

A vakaraitaka vei au o tinaqu na bibi ni nodra vakasoqoni vata na Isireli ena nodra vukei na daukaulotu tudei me ra vakavulica ka wasea na kosipeli. Dua na gauna au a tomani koya me kunei na nona vale e dua na sisita ena tabanalevu ka sa sega tu ni lotu me dua na gauna. A voleka sara ni keirau sese baleta ni keirau sega ni kila vakavinaka na vanua e vakaitikotiko kina. A vakasaqara matua o tinaqu na nona vale na sisita oya, ka sega ni via yalolailai. Me vaka na marama ena vosa vakatautauvata ni tikinisiliva ka yali (raica na Luke 15:8–10), e a kunea na sisita oya ka reki.

Na sala e a solia kina o tinaqu na nona vinaka duadua ena cakacaka ni Turaga, sega walega ena wasei ni kosipeli ia ena veikacivi tale eso ni Lotu, a vukei au meu kila ni tamata kece e dodonu me qarava na Turaga, ena veisala lalai sara mada ga.

Ni toso tiko na veiyabaki, au a taurivola mai na semineri, ciqoma na noqu metali ni Goneyalewa, tauri ivola mai na koliji, ka tekivu cakacaka. Vakamalua sara, sa vaka me sega ni bibi mai vei au na noqu via laki daukaulotu tudei. E dina ga niu bulabula tiko vakalotu ka vakalevulevuya tiko na noqu veikacivi ena Lotu, au kaya ga e lomaqu, “E sega ni vinaka meu veiqaravi vakadaukaulotu tudei baleta ni sega ni noqu itavi. O au e dua na sisita, kau rawa ni qarava na Turaga ena veisala tale eso.”

Na Cava a Veisautaka Na Noqu Vakasama

Niu sa yabaki 22, a noqu na madigi meu cakacaka ena dua na vanua kau a veiqaravi kina vei ira na goneyalewa era a sotava na veivakacacani kei na tawa kauwaitaki. Au a lomani ira saraga. Au a raica na kena voroki na yalodra ena veivakacacani oqo ka vakarusa na nodra lomani ira vakai ira. Eso vei ira era a tovolea me ra kukuna. Eso vei ira era a sega ni vinakata me ra nuitaka e dua na tamata. E vuqa vei ira era a sega ni nuitaka na bula ka sega ni vakila na loloma ni iVakabula.

Au dau tarogi au wasoma, “E rawa beka ni ra a tarovi na veivakacacani oqo? Vakacava ke ra a ciqoma na kosipeli o ira na a vakacacani ira? Vakacava kevaka mera a sa lewena tu na Lotu o ira na nodra itubutubu na goneyalewa oqo ni bera ni ra sucu?” Au qai kila ni ra na sega beka ni sotava na goneyalewa oqo na veivakatovolei oqo kevaka era a ciqoma ka bulataka na kosipeli na nodra itubutubu kei ira ka a veivakacacani.

Niu vakananuma na veitaro oqo kei na cakacaka ena itikotiko a vukei au meu raica ni tamata kece e gadreva na kosipeli. Me vaka ga ni a vala na mataivalu i Ilamani ena iVola i Momani me taqomaka na nodra vakabauta kei na nodra matavuvale, na Turaga e gadrevi ira na daukaulotu tudei me ra wasea na Nona kosipeli ka taqomaka na Nona matanitu.

Na veika au a sotava kei ira na goneyalewa ena itikotiko a vakauqeti au meu muria na sala a vinakata na Turaga meu lako kina. Au a digitaka meu lewena na mataivalu daukaulotu ni Turaga. A raica o Koya na gagadre oqo, kau a kacivi meu laki veiqaravi ena tabana ni kaulotu na Philippines Cauayan Mission.

Veiqaravi vaka Daukaulotu

Ena noqu kaulotu, au raici ira na tamata ni ra veisau ni ra sa vulica na kosipeli. Au a vakavulici ira na tamata era sega ni kila na veivosoti, era dau vakatavako ka daumateni, ka dokadoka, ka sega ni kila na masu. Ena vuku ni kosipeli, era a biuta kina na nodra itovo makawa me ra kilikili kaya na veika sa yalataka na Kalou: na bula tawamudu.

Ena vuku ni Veisorovaki ni iVakabula, au a vulica kina ni dua e rawa ni tekivuna se lesu tale ki na salatu qiqo ka rabailailai, kevaka e veivutuni. Na kosipeli i Jisu Karisito ena vukei keda meda veisau ka toso ki liu ki na bula uasivi sara ka kilikili kaya na veivakalougatataki cecere sa vakarautaka tu vei keda na Tamada Vakalomalagi. Na veisau oqo e rawa ni da toki kina mai na rarawa ki na marau, mai na veilecayaki ki na vakacegu, mai na cudru ki na veivosoti, mai na malumalumu ki na kaukauwa, mai na veicati ki na loloma.

Au sa vakalougatataki dina niu lewena na Lotu i Jisu Karisito ni Yalododonu Edaidai. Na kosipeli i Jisu Karisito e dau vukei au meu kila vakavinaka na kequ yaga me vaka e dua na luvedrau yalewa na itubutubu vakalomalagi, ena vei ituvaki ca sara mada ga. Na Tamada Vakalomalagi e dau vakacegui au ena Yalo Tabu. Na ivolanikalou era noqu kabasi niu veilecayaki ka gadrevi meu vakataulewa.

Na noqu matavuvale kei au keitou sasaga tiko me keitou vosota ena yalodina ki na ivakataotioti. Au vakavinavinaka niu mai vakamau kei na dua na turaga ka taura tu na matabete ka kaukauwa na nona ivakadinadina me baleta na kosipeli vakalesui mai i Jisu Karisito. Na noqu veiyalayalati kei na Turaga e sega ni baleti au walega ia sa baleta talega na noqu matavuvale kei na Nona Matanitu.

E vakaitikotiko o dauvolaivola mai na yatu Filipaini.