iTabagone Qase Cake

Na Veisau Eda Cakava—ka Sega ni—Via Sotava

Mai vei Elder Ciro Schmeil

Ena Vitusagavulu

Na cava na nomu navunavuci balavu? Kevaka o kila na veika o vinakata tiko, o na vakavakarau, ka marautaka sara mada ga, mo cakava na veisau ena nomu bula.

O sa bau cakava mada e dua na veisau ka o a sega ni vakauqeti vakaidina mo cakava? Se dua na veisau o a sega ni namaka ka gadrevi mo na cakava?

Rauta na 15 na yabaki sa oti e a tukuna vei au na noqu vuniwai meu veisautaka na ivakarau ni bula: “Mo tekivu yavalata na yagomu, kevaka e sega ena sega ni balavu na nomu bula,” a kaya vei au. Au a taura vakabibi sara na nona ivakaro. Au a mani nanuma meu sa na tekivu cici.

Me rawati vinaka na veisau ni ivakarau ni bula oqo, ena gadrevi meu rai vakayawa tiko baleta keu rai tikoga vakalekaleka, ena sega ni dede na veisau.

Na noqu navunavuci balavu sai koya e dua na takete ka dau talevi lesu oya meu ciciva e dua na cici balavu ena veiyabaki. Na takete oqo e vukei au meu tucake ka cici e veisiga baleta niu kila ni ena dua na siga ena yabaki mai oqo, ena gadrevi meu ciciva kina e 26.2 na maile (42.2 na kilomita). Au dau dinata na noqu vakaukauwa yago ka sotava na noqu lalawa-lekaleka e veimacawa baleta niu kila ni na vakarautaki au ki na siga ni veitaucici.

Ena so na gauna, eso na ka era dau tovolea me ra tarovi au, me vaka na draki. E dau katakata se batabata beka vakasivia e tautuba, se dau tau beka na uca. Kau dau cici kina ena misini e lomanivale, dina ga niu taleitaka vakalevu cake meu cici e gaunisala. Na mavoa e dau tovolea talega me tarovi au. E rairai au a sega beka ni vakadretaka vakavinaka na yagoqu, ka mani tadre kina na ua ni yavaqu. Se e a sega beka ni baleti au na noqu vakamavoataki. Ia se a mani yaco vakacava, au sega ni rawa ni soro baleta niu kila niu na cici tiko ena yabaki mai oqo. Au sa qai moica na ivakarau ni noqu vakaukauwa yago. Au sa bula vinaka kau tekivu cici tale.

Na cici sa vakavulica vei au e levu na ka me baleta na kosipeli. Sa tiko na noda navunavuci balavu ni kosipeli meda vosota ki na ivakataotioti ka rawata na bula vakacerecerei. Ia e tiko na noda navunavu leleka me vaka na noda vakayagataka na sakaramede e valenilotu ena veimacawa me vukei keda meda yaco kina ki kea. Eda na vakamavoataki vakayalo ni da caka cala. Ia meda kakua ni soro. Eda veivutuni, ka tovolea tale. Na sala duadua ga eda rawa ni rawata kina na noda navunavuci balavu sai koya na noda cakava eso na veisau lalai ena noda ilakolako me vukei keda meda tiko ga kina ena sala.

Digitaki ni Veisau

Sivia na tini na yabaki, au a cakacaka vaka-ivukevuke ni peresitedi liu ena Walmart mai Brazil. E a tudei tu vakailavo na noqu matavuvale, au marautaka na noqu cakacaka, ka vinaka tu na bula. Ia e a dredre na cakacaka. E gadrevi kina meu veilakoyaki vakalevu, ka vakataotaka tiko na neitou bula ni matavuvale kei na noqu veiqaravi ena Lotu. Ni oti e 11 se 12 na yabaki, au sa sega ni taqea rawa.

Keirau a veivosaki vata vakaveiwatini kau vakatura meu sa biuta na cakacaka oqo. Keirau veitalanoataka vata kei ira na luvei keirau, ka keitou kaya vata, “Sa kena gauna medatou cakava e dua na veisau.”

Niu biubiu, au a botolaki sobu mai na ivukevuke ni peresitedi liu ki na sega ni cakacaka. E a taura e voleka ni dua na yabaki me kunei ka ciqomi e dua tale na cakacaka. Niu sa mai taura e dua na itutu ena dua na kabani lailai ni volitaki vale e Amerika, au a logaloga vinaka kina. Na cakacaka oqo a rawa kina vei au meu solia e levu cake na gauna ki na veika e bibi dina.

Ia eso tale na tamata era tukuna vei au ni sa leqa noqu vakasama. Na cava me biuti kina e dua na cakacaka tudei ka laki cakacaka ena dua na kabani ni volitaki vale sega ni kilai levu? Ka tokia na noqu matavuvale kina veimama kei vuravura ki Amerika?

Era dina ni oqo e a dua na veisau levu keitou a digitaka me keitou cakava. Ia era a cala ena nodra tukuna ni a cala na digidigi oya.

A taura edua na vakabauta levu vei keitou me veisautaki na cakacaka ka toki ki na dua na vanua vou, ia na Turaga a maroroi keitou. Ka sa levu cake na gauna meu vakayacora kina na noqu itavi vaka tagane vakawati, tama, kei na lewe ni tabanalevu.

Au vakabauta ni veisau sa gadrevi me rawati kina na noda icavacava. Eda na sega vakadua ni yaco me vaka na tamata e vinakata vei keda na Tamada Vakalomalagi meda vakataka, kevaka eda tu vakadua ena noda bula. Ka na yaco meda vakataki Koya ni da nakita meda vakayacora na veisau e ganiti ena vakabauta.

Vakasaurarataki me Veisau

E dua tale na veisau levu ka yaco ki na noqu matavuvale oya na gauna a mate kina na taciqu tagane gone duadua ena dua na vakacalaka. Keitou a sega ni digitaka se vinakata me yaco vua se vei keitou, ka se mosi tikoga, dina ni sa oti oqo e 10 na yabaki. E sega ni rawarawa na veisau e suguraki mai vei keda.

Ia na veisau eda sega ni digitaka e rawa talega ni yaco me madigi me tarai cake kina na noda vakabauta na Tamada Vakalomalagi kei Jisu Karisito. E rawarawa na noda yalodina tikoga ni yaco tiko na lomada. Ia e rawa beka ni da yalodina tikoga ena vakabauta ka toso tikoga ke sega ni vaka na lomada na veisau?

Na veisere, sega ni rawa ni vakaluveni, sega ni cakacaka, na tauvimate, kei na veika mosimosi tale eso vakaoqo era sega ni veika eda nuitaka se tuvatuva kina meda sotava. E rawa ni ra cakava meda vakila ni bula sa vaka e yaco tiko e taudaku ni noda vakatulewa. Ia e sega ni ka dina oya—ena loma ni nomu veituvaki tawasureti, e se tiko ga na ka o rawa ni vakatulewataka. E rawa ni o navuca eso na lalawa lalai, na lalawa mada ga mo lako curuma e dua tale na siga. O Rawa Ni Cakava! Sa rawa mo vosota na ka kecega! (raica na Alama 38:4).

E dua na ivakaraitaki uasivi sara ni ka oqo o Josefa mai Ijipita. E a suguraki yani ki na nona bula na veisau—ka vakayalia kina vakarua na nona galala! (Na kena imatai oya na gauna eratou a volitaki koya kina vakabobula na tuakana, ka ikarua na gauna a biuti koya kina ki valeniveivesu o Potifa.) Ia a sega ni yalolailai o Josefa baleta ni a sega ni taleitaki se namaki na veika a yaco vua. E a moici koya ka tubu ena vuku ni veika a sotava. Ia e muri, a vakabula na nona matavuvale kei na dua na matanitu taucoko. Na Turaga e a tuliraki koya ka vakarautaki koya tiko ena gauna kece oya (raica Nai Vakatekivu 37–46).

E dredre me da dau vosota ni vakacalai na noda ituvatuva ena veisau ka vakasaurarataki vei keda, ia mo nanuma tiko ni navunavuci balavu sai koya mo rawata na bula vakacerecerei. Sa kila tu na Tamada Vakalomalagi na veika e gadrevi meda yaco kina ki kea: “Dou sa sega ni tu rawa ena iserau ni Kalou ena gauna oqo, se vei ira na agilosi dauveiqaravi; ia mo dou vosota tikoga me yacova ni dou sa vinaka sara” (Vunau kei na Veiyalayalati 67:13).

Na Veisau e Vukei Keda meda Vakataka na iVakabula

E lomani kemuni na Tamada Vakalomalagi ka vinakata mo rawa ka. E vinakata mo marau. Ka sa tuva tu o Koya e dua na ituvatuva mo rawata ruarua kina na veika oqori.

Niu raica na bula vakayago me vaka na ka a nakiti kina—vakavakarau—na veisau e yaco ena noqu bula e yaco me vakaibalebale vakalevu cake. Na veisau e vukei au meu rawata na noqu navunavuci balavu, oya meu yaco me vaka na noqu iVakabula o Jisu Karisito. Au kila ni Tamada Vakalomalagi e tautauvata na Nona navunavuci balavu vei au kei ira kece na Luvena. Me vaka na nona kila na noqu vuniwai niu gadreva meu veisautaka e dua na ka ena vuku ni noqu bula, na Kalou e kila vakamatata na veisau e gadrevi meda cakava meda yaco me vakataki Koya. E tokoni keda o Koya ka vakarautaka na ivurevure eso me vaka na ivolanikalou, ivavakoso ena veivanua, kei na dua na parofita bula me vukei keda ena noda sasaga me da veisau me vinaka cake.

Ena veisiga dredre duadua—na veisiga ka dau dredre mo duri cake mai na idavodavo ka daramaka na nomu ivava ni cici, ni o kila ni o gadreva mo veivutuni, se ni o sotava tiko eso na veisau sega ni namaki—meda dau vakananumi keda ena loloma tawayalani ni Kalou kei na Nona gagadre vei keda meda marau cake mai na keda ituvaki oqo.

Na veivakananumi oqori e solia vei keda na kaukauwa me da vakayacora na veisau e uqeti keda kina na Yalo me da cakava. Ka vukei keda meda nuitaka ni veisau sega ni namaki eda sa vakasaurarataki meda cakava sa tiki ni Nona ituvatuva me baleta na noda marau cecere duadua.